މޯލްޑިވްސް ހައްޖު ކޯޕަރޭޝަންގެ މާލީ ހާލަތު ރަނގަޅުކޮށް ކުންފުންޏަށް މާލީ ފައިދާ ހޯދުމަށް ކުރެވެމުންދާ މަސައްކަތްތަކުގެ ތެރޭގައި އެ ކޯޕަރޭޝަނުން ތަރައްގީކުރާ ލަގްޒަރީ ހައުސިން އިމާރާތެއް ކަމަށްވާ "ނިއަމް ރެސިޑެންސް" ގެ އެޕާޓްމަންޓް ޔުނިޓުތައް އާންމުކޮށް ވިއްކުމަށް ހުޅުވާލަން ނިންމައިފިއެވެ.
ހައްޖު ކޯޕަރޭޝަނުން ބުނީ މި ޕްރޮޖެކްޓުގެ ތެރެއިން ތަރައްގީކުރެވޭ ކޮންމެ އެޕާޓްމަންޓު ޔުނިޓަކުން ކުންފުންޏަށް އެންމެ ބޮޑު ފައިދާ ލިބޭނެހެން ޕްރޮޖެކްޓު ކުރިޔަށް ގެންދިޔުމަށް ޓަކައި ޔުނިޓުތަކުގެ އަގުތައް ކަނޑައެޅުމުގެ މަސައްކަތާއި، ޔުނިޓުތައް ވިއްކުމަށް އާންމުކޮށް ހުޅުވާލުމަށް ކުރަންޖެހޭ މަސައްކަތްތައް ކުރިއަށްދާ ކަމަށެވެ. އަދި މިކަންކަން ފުރިހަމަކުރުމަށްފަހު "ނިއަމް ރެސިޑެންސް" ގެ ޔުނިޓުތައް ވިއްކުމަށް އާންމުކޮށް ހުޅުވާލާނެ ކަމަށް ވެސް އެ ކޯޕަރޭޝަނުން ބުންޏެވެ.
މީގެއިތުރުން، މި މަސައްކަތްތަކުގެ ތެރެއިން މުވައްޒަފުންނަށް އެޕާޓްމަންޓުތައް ވިއްކުމަށް މިހާތަނަށް ކޮށްފައިވާ އެންމެހައި މުއާމަލާތްތައް ބާތިލުކުރުމަށް ނިންމާފައިވާ ކަމަށް ވެސް ހައްޖު ކޯޕަރޭޝަނުން ވަނީ ހާމަކޮށްފައެވެ.
ހުޅުމާލޭ ފޭސް ދޭއްގައި އިމާރާތްކުރާ މި ރެސިޑެންޝަލް އިމާރާތުގެ މަސައްކަތް ކުރާނެ ބަޔަކު ހޯދުމަށް ހައްޖު ކޯޕަރޭޝަނުން ވަނީ މީގެކުރިން ޖެނުއަރީ ހަތެއްގައި އިއުލާނުކޮށްފައެވެ.
'ނިއަމް ރެސިޑެންސް' ގެ ނަމުގައި ކުރިއަށްގެންދާ މި މަޝްރޫއުގެ ޑިޒައިން އަދި ކޮންސަލްޓެންސީ މަސައްކަތްތައް ކުރަނީ ފަހި ދިރިއުޅުން ކޯޕަރޭޝަން (އެފްޑީސީ) އިންނެވެ. މިދިޔަ އަހަރުގެ ސެޕްޓެމްބަރު މަހު ވެވުނު އެއްބަސްވުމުގެ ދަށުން، އެފްޑީސީން ދަނީ މި މަޝްރޫއަށް ބޭނުންވާ ކުރެހުންތައް ފޯރުކޮށްދިނުމުގެ މަސައްކަތް ކުރަމުންނެވެ.