މިއަދު ފާހަގަކުރާ ބައިނަލްއަޤްވާމީ ކޮފީ ދުވަހާ ގުޅިގެން ކޮފީ ތަށީގެ ފޮޓޯތަކުން ސޯޝަލް މީޑިއާ މިވަނީ ފުރާލާފައެވެ.
ތަފާތު އެކި ދިރާސާތަކުން ބަރޯސާވާގޮތުގައި ދުނިޔޭގައި ދުވާލަކު 2.25 ބިލިއަން ތަށި ކޮފީ ބޯއިރު، މިއީ ތެޔޮ ފިޔަވައި ދުނިޔޭގެ ބާޒާރުގައި އެންމެ ގިނައިން ވިޔަފާރިކުރެވޭ ރޯ-މެޓީރިއަލްއެވެ. މިއަދުގެ ޒުވާނުންގެ މެދުގައި ކޮފީވެފައިވަނީ ދިރިއުޅުމުގެ ވައްޓަފާޅި އާއި އިޖުތިމާޢީ ގުޅުންތަކުގެ އިތުރުން މަސައްކަތުގެ މާޙައުލު ބައްޓަންކޮށްދޭ އެންމެ މުހިންމު އެއް ބަހާއަށެވެ.
ކޮފީގެ ތާރީޚު ފެށިގެން އަންނަނީ ނުވަ ވަނަ ޤަރުނުގެ ތެރޭގައި އިތިއޯޕިއާއިންނެވެ. ބުނެވޭގޮތުގައި ކޮފީ އޮށް ބޭނުންކޮށްގެން ބުއިމެއް އުފެއްދުމުގެ އާދަ ފުރަތަމަ ފެށުނީ އިތިއޯޕިއާގެ ކަލްދީ ނަމަކަށް ކިޔާ މީހަކު އޭނާ ގެންގުޅުނު ބަކަރިތައް ގަހަކުން ރަތްކުލައިގެ މޭވާތަކެއް ކެއުމަށްފަހު އާދަޔާޚިލާފަށް މާގިނައިން ޙަރަކާތްތެރިވެ، ނަށަން ފެށުމުންނެވެ. އެއަށްފަހު ޢަރަބިކަރައަށް ދަތުރުކޮށް، 17 ވަނަ ޤަރުނުގެ ތެރޭގައި ވިލާތުގެ ޤައުމުތަކަށް ކޮފީގެ މަޤުބޫލުކަން ފެތުރިގެން ދިޔައެވެ.
ޒުވާނުންތަކެއް ކެފޭއެއްގައި ކޮފީގެ ބުއިންތަކަށް އިންސާފުކުރަނީ--ފޮޓޯ/ޕިންޓްރެސްޓްދުނިޔޭގައި މައިގަނޑު ގޮތެއްގައި އުފައްދަނީ ކޮފީގެ ދެ ވައްތަރެކެވެ. އެއީ "އަރަބިކާ" އަދި "ރޮބަސްޓާ"އެވެ. ދުނިޔޭގެ އުފެއްދުންތަކުގެ 60 އިންސައްތައަކީ އަރަބިކާ ކޮފީއެވެ. ކޮފީ އުފެއްދުމުގައި ދުނިޔޭގައި އެންމެ މަޝްހޫރު އަދި އެންމެ ގިނައިން ކޮފީ އެކްސްޕޯޓްކުރާ ޤައުމުތަކުގެ ތެރޭގައި ބްރެޒިލް، ވިއެޓްނާމް، ކޮލަމްބިއާ، އިންޑޮނޭޝިއާ އަދި އިތިއޯޕިއާ ހިމެނެއެވެ.
މިހާރުގެ ޒުވާނުންގެ މެދުގައި އެންމެ މަޤުބޫލީ އެސްޕްރެސޯ ބޭސްޑް ކެޕުޗީނޯ އަދި ލާޓޭގެ އިތުރުން، އައިސްޑް ކެރަމެލް މެކިއާޓޯ، ވެނީލާ ލާޓޭ، މަޗާ ލާޓޭ އަދި ކޯލްޑް ބްރޫ ފަދަ ފްލޭވާޑް ކޮފީތަކެވެ. އަދި ސިއްޙަތަށް ބަލައިގެން އާމަންޑް ނުވަތަ އޯޓް މިލްކް ބޭނުންކޮށްގެން ތައްޔާރުކުރާ ޕްލާންޓް-ބޭސްޑް ކޮފީތަކުގެ ޓްރެންޑް އަންނަނީ ވަރަށް ބޮޑަށް އިތުރުވަމުންނެވެ.
އިތިއޯޕިއާގައި ކޮފީ ހައްދާ ދަނޑެއްގައި މަސައްކަތްތެރިއަކު ހަރަކާތްތެރިވަނީ--ފޮޓޯ/ފޭސްބުކްސިއްހީ ގޮތުން ބަލާއިރު ކޮފީއަކީ އެންޓިއޮކްސިޑެންޓްސްއިން މުއްސަނދި، ސިކުނޑީގެ ޙަރަކާތްތެރިކަން އިތުރުކޮށްދީ ސަމާލުކަން މަތީގައި ބަހައްޓައިދޭ ބުއިމެކެވެ. މަޝްހޫރު ސިއްހީ މާހިރު ޑރ. ސާރާ ބްރޫވަރު ފާހަގަކުރައްވާ ގޮތުގައި، މިންގަނޑެއްގައި ކޮފީ ބުއިމަކީ "ޓައިޕް-2" ހަކުރުބަލިންނާއި ހިތުގެ ބަލިތަކުން ރައްކާތެރިކޮށްދީ، އަލްޒައިމާސް އަދި ޕާކިންސަންސް ފަދަ ނާރުތަކުގެ ބަލިތަކުން ދުރުހެލިކޮށްދޭ ކަމެކެވެ.
ނަމަވެސް ބައެއް ސިއްހީ މާހިރުން އިރުޝާދު ދެއްވަނީ ކޮފީ ބުއިމުގައި ވަކި މިންގަނޑުތަކެއް ގެންގުޅުމަށެވެ. އެގޮތުން ދުވާލަކު 400 މިލިގްރާމަށްވުރެ ގިނައިން ކެފެއިން (ގާތްގަނޑަކަށް 3-4 ތަށި ކޮފީ) ނުބުއިމަށް ސަމާލުވާންޖެހެއެވެ. މީގެ އިތުރުން، ނިދުމުގެ ހަ ގަޑިއިރު ކުރިން ކޮފީ ބުއިން ހުއްޓާލުމަށާއި، ފްލޭވާޑް ސިރަޕް އަޅައިގެން ކޮފީ ބުއިމުގެ ބަދަލުގައި ސާދާކޮށް ބުއިމަށް ޑޮކްޓަރުން އިރުޝާދުދެއްވައެވެ.