ސައިކަލުގެ މަޑިދަށުގައި 500 އެމްއެލްގެ ފެންފުޅިއަކަށް އަޅައިގެން ބަނގުރާ (ބަނގުއާވި) ގެންގުޅުނު މައްސަލައެއްގައި އދ. އޮމަދޫ، މީހަކު، 10,600 ރުފިޔާއިން ޖޫރިމަނާކުރުމަށް އދ. އޮމަދޫ މެޖިސްޓްރޭޓް ކޯޓުން ޙުކުމްކޮށްފިއެވެ.
މި މައްސަލައަކީ 14 މާރިޗު 2024 ދުވަހުގެ ހަވީރު 17:25 އެހައިކަންހައިރު، ޏ. ފުވައްމުލަކު މުޙައްމަދު ޖަމާލުއްދީން ނައިބު ތުއްތު މަގުގެ އެމްޓީސީސީ ސައިޓާ ދިމާލުގައި ފުލުހުން ޓްރެފިކް ބަލަހައްޓަމުން ދަނިކޮށް، އެ މީހާ ދުއްވި ސައިކަލު މަޑުކުރުވައި ޗެކްކުރުމުގެ ތެރޭގައި ސައިކަލު މަޑިދަށުން ފެނުނު 500 އެމްއެލްގެ ލައިފް ފެންފުޅީގައި ހުރި ދިޔާ ތަކެތި ތަހުލީލުކުރިއިރު ބަނގުއާތްވަށް ޕޮޒިޓިވްވެފައިވާ މައްސަލައެކެވެ.
މިކަމާ ގުޅިގެން ދައުލަތުން އޭނާގެ މައްޗަށް އުފުލާފައިވަނީ ދިވެހިރާއްޖޭގެ ގާނޫނުލްއުގޫބާތުގެ 613 ވަނަ މާއްދާގެ (ށ) އާ ޙަވާލާދީ، އެ މާއްދާގެ (ނ) ގެ ހަތަރުވަނަ ނަންބަރުގެ ދަށުން "ހުއްދަނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ" ކުށުގެ ދަޢުވާއެވެ.
ޝަރީޢަތުގެ އިބްތިދާޢީ މަރުޙަލާގައާއި އަވަސްނިޔާގެ އަޑުއެހުމުގައި ދައުވާ ލިބުނު މީހާވަނީ ދަޢުވާއަށް އިޢުތިރާފްވެފައެވެ. އޭނާ ދައުވާއަށް އިއުތިރާފްވުމުން، ޤާނޫނުލްއުގޫބާތުގެ ދަށުން އަދަބު އެއް ދަރަޖަ ލުއިކޮށް، އަދި ބަންދުގައި ހޭދަކުރި އެއް ދުވަސް އުނިކުރުމުން އޭނާގެ މައްޗަށް އަންނަނީ އެއް މަހާއި 23 ދުވަހުގެ ޖަލު އަދަބެކެވެ.
ނަމަވެސް އޭނާއަކީ ވަޒީފާއެއް އަދާކުރާ މީހަކަށްވެފައި، މި މައްސަލައަކީ ޖިނާއީ ބޮޑު ކުށަކަށް ނުވާތީއާއި، ޖަލު އަދަބުގެ ބަދަލުގައި އެހެން އަދަބެއް ކަނޑައެޅުމުގެ މަސްލަހަތު ބޮޑުކަމަށް ފެންނާތީ، މެޖިސްޓްރޭޓް އާމިނަތު ނިޔާޝާ ވަނީ ޖަލު އަދަބު ޖޫރިމަނާގެ އަދަބަކަށް ބަދަލުކުރައްވާފައެވެ.
އެގޮތުން، އަންނަ ނޮވެމްބަރުގެ ނިޔަލަަށް 10,600 ރުފިޔާ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކައި ޚަލާސްކުރުމަށް ވަނީ އަންގާފައެވެ.