ކަރަންޓު ކެނޑުމުގެ މައްސަލަ ދޭތެރެއަކުން ފެންމަތިވާ އައްޑޫ ސިޓީގައި ކަރަންޓުގެ ޚިދުމަތް ފޯރުކޮށްދޭން ސްޓެލްކޯއިން އަނެއްކާވެސް ހަވާލުވެއްޖެއެވެ.
ފާހަގަކޮށްލެވޭ ގޮތުގައި މިއީ އައްޑޫއަށް ކަރަންޓުގެ ޚިދުމަތް ފޯރުކޮށްދިނުމަށް ސްޓެލްކޯއިން ހަވާލުވި ދެވަނަ ފަހަރެވެ. މީގެ ކުރިން އެ ސިޓީއަށް ކަރަންޓު ފޯރުކޮށްދެމުން އައީ ފެނަކަ ކޯޕަރޭޝަން މެދުވެރިކޮށެވެ.
ސްޓެލްކޯއިން އައްޑޫގައި ކަރަންޓުގެ ޚިދުމަތް ރަސްމީކޮށް ފެށުމަށްޓަކައި މިއަދު ވަނީ އައްޑޫ ސިޓީ ހިތަދޫގައި ޚާއްސަ ދިދަ ނެގުމުގެ ރަސްމިއްޔާތެއް ވެސް ބާއްވާފައެވެ.
އެ ރަސްމިއްޔާތުގައި ވާހަކަދައްކަވަމުން ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރު ވަނީ މީގެ 17 އަހަރު ކުރިން ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދީފައިވާކަން ފާހަގަކުރައްވާފައެވެ. އަދި އައްޑޫ ސިޓީގެ ކަރަންޓުގެ ޚިދުމަތް އަލުން އަނބުރާ ސްޓެލްކޯއާ ހަވާލުކުރެއްވުމަށް ރައީސް ޑރ. މުޙައްމަދު މުއިއްޒު ނިންމެވި ނިންމެވުމަކީ އައްޑޫގެ ރައްޔިތުންނަށް އިތުބާރުހުރި، ދެމެހެއްޓެނިވި ޚިދުމަތެއް ކަށަވަރުކޮށްދިނުމަށް އެޅުއްވި މުހިންމު ފިޔަވަޅެއްކަން އެމްޑީ ވަނީ ފާހަގަކުރައްވާފައެވެ.
އައްޑޫއަށް ކަރަންޓު ފޯރުކޮށްފޭން ސްޜެލްކޯއިން އަނެއްކާވެސް ހަވާލުވެއްޖެ --- ފޮޓޯ: ސްޓެލްކޯއެ ރަސްމިއްޔާތަށްފަހު އެމްޑީގެ އިތުރުން ކުންފުނީގެ އިސްވެރިން ވަނީ އެ ސިޓީގެ ސެންޓްރަލް ޕަވާ ސްޓޭޝަނަށް ޒިޔާރަތްކުރައްވާފައެވެ. އެ ޒިޔާރަތުގައި އިންޖީނުތަކުގެ ހާލަތާއި ކަރަންޓު އުފެއްދުމުގެ ނިޒާމު ހުރިގޮތް ވަނީ ބައްލަވާލައްވާފައެވެ.
މީގެ އިތުރުން އެ ރަސްމިއްޔާތަށްފަހު އެމްޑީއާއި ކުންފުނީގެ އިސް ވެރިން ވަނީ، ކުންފުނީގެ މަރަދޫފޭދޫ އޮފީހަށް ވަޑައިގެން، އެ ތަނުގައި ކުންފުނީގެ ދިދަ ނަންގަވާފައެވެ.
އެ ޒިޔާރަތުގައި މަރަދޫފޭދޫ އޮފީހުގެ މުވައްޒަފުންނާ މުހާތަބުކުރައްވައި ވާހަކަދައްކަވަމުން އެމްޑީ ވަނީ ސްޓެލްކޯއިން އައްޑޫ ސިޓީގެ ކަރަންޓުގެ ޚިދުމަތާ ދެވަނަ ފަހަރަށް ހަވާލުވުމަކީ އެ ސިޓީގެ ރައްޔިތުންނަށް އައު އުއްމީދުތަކެއް ގެނުވި ކަމެއް ކަމަށާއި ޒަމާނީ ވަސީލަތްތަކާއެކު ދެމެހެއްޓެނިވި، ފެންވަރު ރަނގަޅު ޚިދުމަތެއް ރައްޔިތުންނަށް ފޯރުކޮށްދެއްވާނެ ކަމަށެވެ.
އައްޑޫއަށް ކަރަންޓު ފޯރުކޮށްފޭން ސްޜެލްކޯއިން އަނެއްކާވެސް ހަވާލުވެއްޖެ --- ފޮޓޯ: ސްޓެލްކޯފާހަގަކޮށްލެވޭ ގޮތުގައި އައްޑޫއިން ކަރަންޓު ކެނޑޭ މައްސަލައަކީ ވަރަށް ދުވަސްވެފައިވާ، ހައްލުނުކުރެވި އޮތް މައްސަލައެކެވެ. އޭގެ އުނދަގޫ ރައްޔިތުންނަށް އެތައް ގޮތަކުން ކުރާއިރު، ވިޔަފާރިތަކަށާއި އާއްމު ގޭގޭގައި ހުންނަ ކަރަންޓު ސާމާނަށް ވެސް ބޮޑެތި ގެއްލުންތައް ލިބެއެވެ.
ގިނަ ބަޔަކު ދެކޭ ގޮތުގައި އައްޑޫގެ ކަރަންޓު މައްސަލަ ހައްލުވާނީ އެ ސިޓީގައި އަލަށް ގާއިމުކުރާ ޕަވާ ހައުސް ނިމުމުންނެވެ. ނަމަވެސް، އެ ތަނުގެ މަސައްކަތް މި ސަރުކާރުން ޗައިނާގެ ކުންފުންޏަކާ ހަވާލުކޮށްފައިވީ ނަމަވެސް މަޝްރޫއުގެ އަމަލީ މަސައްކަތް ފަށާފައެއް ނުވެއެވެ.