ރަސްފަންނު ރުއްތަކުން ވަގަށް ކުރުނބާ އެޅި މީހަކު ހަތް ދުވަހަށް ބަންދުކުރުމަށް ކްރިމިނަލް ކޯޓުން މިއަދު ނިންމައިފިއެވެ.
މި މައްސަލައިގައި ހައްޔަރުކޮށްފައި ވަނީ ސ. ހިތަދޫ، ވައިޓްހީރާ އުމުރުން 56 އަހަރުގެ އަބްދުއްލަތީފެވެ.
ކޯޓު އަމުރުގައިވާ ގޮތުން އޭނާ ހައްޔަރުކޮށްފައި ވަނީ ވައްކަމުގެ މައްސަލައެއްގައި އޭނާގެ މައްޗަށް ތުހުމަތުކުރެވިފައިވާ ކޮންމެވެސް މިންވަރެއްގެ ހެކި ހުށަހަޅާފައިވުމުންނެވެ. އެގޮތުން މައްސަލައިގެ ހާދިސާ ރިޕޯޓު ހުށަހަޅާފައިވާކަން ކޯޓު އަމުރުގައި ވަނީ ފާހަގަކޮށްފައެވެ.
މީގެ އިތުރުން ކޯޓު އަމުރުގައި ވަނީ އޭނާ ރަސްފަންނުގައި ހުރި ރުއްތަކަކުން ހުއްދަ ނެތި ކުރުނބާ އަޅާފައިވާކަން ފުލުހުން ފާހަގަކޮށްފައިވާ ކަމަށެވެ. ނަމަވެސް ކުރުނބާ އެޅުމަކީ މަނާކަމެއްކަން އޭނާއަށް ނޭނގޭ ކަމަށް ވަނީ ކޯޓުގައި ބުނެފައެވެ.
ކޯޓު އަމުރުގައި އޭނާއަކީ ބަންދު ރިކޯޑް އޮތް މީހެއް ކަމަށާއި އޭނާ ހައްޔަރުކޮށްފައި ވަނީ އިޖުރާއަތާ އެއްގޮތަށް ކަމަށް ވަނީ ބުނެފައެވެ.
އޭނާގެ ބަންދަށް މިއަދު ހަތް ދުވަސް ޖަހާފައިވާއިރު ބަންދުގެ މުއްދަތު ހަމަވާނީ އަންނަ އޮކްޓޯބަރު މަހުގެ ހަތެއްވާ ބުދަ ދުވަހަށެވެ.