ދުނިޔޭގެ އެންމެ ބޮޑު އެއް ޝިޕިން ކުންފުނި ކަމަށްވާ މާސްކުން، ރާއްޖެއިން ޔޫރަޕަށް މުދާ އުފުލާ ކޮންޓެއިނަރުތަކުން ނަގާ އިމަޖެންސީ ކޮންޓިންޖެންސީ ސާޗާޖު (އީސީއެސް) ކުޑަކޮށްފިއެވެ.
މިއީ ރާއްޖެއިން އުތުރު ޔޫރަޕަށާއި މެޑިޓަރޭނިއަން ސަރަހައްދަށް ފޮނުވާ މުދަލަށް ޚާއްސަކޮށްގެން ގެނައި ބަދަލެކެވެ. މާސްކުން ނެރުނު އެންމެ ފަހުގެ ރޭޓު އިއުލާނުގައިވާ ގޮތުން، މި ބަދަލަށް އަމަލުކުރަން ފަށާނީ އަންނަ ބުދަ ދުވަހުން ފެށިގެންނެވެ.
މި ސާޗާޖަކީ އަސާސީ ފްރެއިޓް ރޭޓާއި އެހެނިހެން ލޯކަލް ފީތަކުގެ އިތުރުން ވަކިން ނަގާ ޗާޖެކެވެ.
އާ ރޭޓުތަކަށް ބަލާއިރު، ރާއްޖެއާއި ސްރީލަންކާއިން އުތުރު ޔޫރަޕަށް ފޮނުވާ 20 ފޫޓުގެ އާންމު ކޮންޓެއިނަރަކުން ނަގާ އީސީއެސް ފީ 3،500 ޑޮލަރުން 3،200 ޑޮލަރަށް ކުޑަކުރާނެއެވެ. އަދި 40 ފޫޓާއި 45 ފޫޓުގެ ބޮޑެތި ކޮންޓެއިނަރުތަކުން ނަގާ ފީ 3،900 ޑޮލަރުން 3،300 ޑޮލަރަށް ކުޑަކުރާނެއެވެ. މިއީ 20 ފޫޓުގެ ކޮންޓެއިނަރަކުން 300 ޑޮލަރު އަދި ބޮޑެތި ކޮންޓެއިނަރުތަކުން 600 ޑޮލަރުގެ ލުޔެކެވެ.
އެމްޕީއެލްގެ މަސައްކަތްތަކުގެ ތެރެއިން: ފޮޓޯ: އެމްޕީއެލް ހަމަމިގޮތަށް، މެޑިޓަރޭނިއަން ސަރަހައްދަށް ފޮނުވާ މުދަލަށް ވެސް މި ރޭޓުތައް ހިނގާނެއެވެ. މާސްކުން ބުނި ގޮތުގައި، އާންމު ކޮންޓެއިނަރުތަކުގެ އިތުރުން، އޯއޯޖީ، އެސްއޯސީ އަދި އެންއޯއާރު ފަދަ ޚާއްސަ ކޮންޓެއިނަރުތަކަށް ވެސް މި ރޭޓުތައް އަމަލުކުރާނެއެވެ. މީގެ ތެރެއިން 40 ފޫޓުގެ ފްލެޓް އަދި އޯޕަން ކޮންޓެއިނަރުތަކުން ނަގާނީ 40 ފޫޓުގެ އާންމު ކޮންޓެއިނަރުތަކުން ނަގާ މިންވަރެވެ.
މި ބަދަލުގެ ސަބަބުން ރާއްޖެއިން ޔޫރަޕަށް މުދާ އެކްސްޕޯޓުކުރާ އަދި އިމްޕޯޓުކުރާ ވިޔަފާރިތަކަށް ޝިޕިން ހަރަދު ކުޑަވުމުގެ ފުރުސަތު އޮންނާނެއެވެ. ޚާއްސަކޮށް ޔޫރަޕުގެ މާކެޓުތަކާ ގުޅިފައިވާ ދިވެހި ކުންފުނިތަކަށް މިއީ މުހިންމު ލުޔަކަށް ވާނެއެވެ. ނަމަވެސް، ސާޗާޖު ކުޑަކުރި ނަމަވެސް، މުޅި ޝިޕިން ހަރަދު އޮޓަމެޓިކުން ކުޑަވާނެ ކަމަށް ނުބެލެވެއެވެ. ސަބަބަކީ، ފައިނަލް ފްރެއިޓް ހަރަދު ބިނާވަނީ އަސާސީ ފްރެއިޓް ރޭޓާއި، ތެލުގެ އަގާއި، ބަނދަރު ފީތަކުގެ އިތުރުން ކޮންޓެއިނަރުގެ ބާވަތާއި މަންޒިލަށް ކަމަށް ވާތީއެވެ. މީގެ އިތުރުން، ޝިޕަރާއި ކެރިއަރާ ދެމެދު ވެވޭ އެއްބަސްވުމުގެ ޝަރުތުތަކަކީ ވެސް ޖުމްލަ އަގަށް އަސަރުކުރާނެ ކަންކަމެވެ. އެހެންކަމުން، ކޮންމެ ޝިޕްމަންޓެއްގެ ވެސް ޖުމްލަ އަގު ކަނޑައެޅޭނީ މި ހުރިހާ ކަމަކަށް ރިއާޔަތްކުރުމަށްފަހުގައެވެ.
މާސްކުން އަންނަނީ ބައިނަލްއަގުވާމީ އެކި ރޫޓުތަކުގެ ސާޗާޖުތަކަށް މެދުކެނޑުމެއްނެތި ބަދަލު ގެންނަމުންނެވެ. މިގޮތުން، މިދިޔަ އޮގަސްޓު މަހު އެ ކުންފުނިން ވަނީ ދެކުނު އޭޝިއާގެ ގައުމުތަކުން، އޭގެ ތެރޭގައި އިންޑިއާ، ބަންގްލަދޭޝް، ސްރީލަންކާ، ނޭޕާލް އަދި ރާއްޖެ ހިމެނޭހެން، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ފޮނުވާ މުދަލުގެ ސާޗާޖަށް ވެސް ބަދަލުތަކެއް ގެނެސްފައެވެ.
މާސްކުގެ އިއުލާނުގައިވާ ގޮތުން، މި ފަހަރު ގެނައި ބަދަލުތައް ރަސްމީކޮށް އަމަލުކުރަން ފަށާނީ ކަމާބެހޭ ފަރާތްތަކުގެ ހުއްދަތައް ލިބުމަށްފަހުގައެވެ. އަދި އާ ރޭޓުތައް ކުރިއަށް އޮތް ތަނުގައި ކަސްޓަމަރުންނަށް ފޮނުވާ އިންވޮއިސްތަކުން ފެންނާނެއެވެ.