ޖަޕާނުގެ އައިޗީ ނަގޯޔާގައި ކުރިއަށްދިޔަ 20 ވަނަ އޭޝިއަން ގޭމްސް 2026 ގައި ދިވެހިރާއްޖޭގެ ޤައުމީ ޝޫޓިން ޓީމުން ތާރީޚީ ކާމިޔާބީއެއް ހޯދައި، މުބާރާތުގައި އެންމެ ގިނަ ޤައުމީ ރިކޯޑު ހެދި ޓީމުގެ ޝަރަފު ހޯދައިފިއެވެ.
ދެ ޖިންސުގެ 12 ޝޫޓަރުން ހިމެނޭހެން އޭޝިއަން ގޭމްސްއަށް ދިޔަ މިހާތަނަށް އެންމެ ބޮޑު ޝޫޓިން ކޮންޓިންޖެންޓުން ވަނީ ވާދަކުރި 10 އިވެންޓުގެ ތެރެއިން 9 އިވެންޓަކުން ޤައުމީ ރިކޯޑު މުގުރާލާފައެވެ. މިއީ އޭޝިއަން ގޭމްސްގެ ތާރީޚުގައިވެސް ރާއްޖޭގެ ކުޅިވަރު ޓީމަކުން މިހާތަނަށް ހޯދާފައިވާ އެންމެ ފުރިހަމަ އަދި އެންމެ ފާހަގަކޮށްލެވޭ އެއް ކާމިޔާބީއެވެ.
މިފަހަރުގެ އޭޝިއަން ގޭމްސްގައި ދިވެހި އެތުލީޓުން ވަނީ ކުރިން ދަމަހައްޓަމުން އައި ޤައުމީ 5 ރިކޯޑެއް އައުކޮށްފައެވެ. އޭގެ ތެރޭގައި އިންޑިވިޖުއަލް އަދި މިކްސްޑް ޓީމު އިވެންޓުތައް ހިމެނެއެވެ.
އޭޝިއަން ގޭމްސް 2026 ގައި ރާއްޖޭގެ ޝޫޓިން ޓީމު-- ފޮޓޯ: އެމްއޯސީ އެގޮތުން 10 މީޓަރު އެއާ ރައިފަލް އަންހެން އިންޑިވިޖުއަލް އިވެންޓުގައި، 2025 ގެ ޤައުމީ މުބާރާތުގައި އާއިޝަތު އީޝާ ޝަހީދު ހަދާފައިވާ 609.6 ގެ ރިކޯޑު، އާއިޝަތު އީން އަސްލަމް ވަނީ 609.9 ގެ ސްކޯއަކުން ފުރަތަމަ މުގުރާލާފައެވެ. ނަމަވެސް، ހަމަ މި އިވެންޓުގެ ތެރެއިން އީޝާ ވަނީ 624.1 ގެ މަތީ ސްކޯއެއް ހޯދައި، ޖުމްލަ 14.5 ޕޮއިންޓުގެ ކުރިއެރުމަކާއެކު އަލުން ރިކޯޑު އަމިއްލަ ކުރައްވާފައެވެ.
ފިރިހެނުންގެ 10 މީޓަރު އެއާ ރައިފަލް އިވެންޓުންވެސް ވަނީ އެފަދަ ބޮޑު ކުރިއެރުމެއް ފެނިގެންގޮސްފައެވެ. 2025 ވަނަ އަހަރު ބެންކޮކްގައި ބޭއްވި އޭޝިއަން ކަޕްގައި އިބްރާހީމް ޝިފާން ހަދާފައިވާ 605.5 ގެ ރިކޯޑު، އުމަރު މުހައްމަދު ނަޝީދު ވަނީ 610.2 ގެ ސްކޯއަކުން އައުކޮށްފައެވެ.
އެއަށްފަހު އަހުމަދު މާއިދު މުހައްމަދު ވަނީ 614.5 ގެ ސްކޯއަކާއެކު ޖުމްލަ 9.0 ޕޮއިންޓުގެ ކުރިއެރުމެއް ހޯދައި، އެ އިވެންޓުގެ ރިކޯޑު އައުކޮށްފައެވެ. މީގެ އިތުރުން، 10 މީޓަރު އެއާ ރައިފަލް މިކްސްޑް ޓީމު އިވެންޓުން މާއިދު އާއި އީޝާގެ ޕެއާ ވަނީ 617.6 ގެ ސްކޯއެއް ހޯދައި، 16.0 ޕޮއިންޓުގެ ބޮޑު ކުރިއެރުމަކާއެކު ޝިފާން އާއި ޔޫހާގެ ކުރީގެ ރިކޯޑު މުގުރާލާފައެވެ.
އޭޝިއަން ގޭމްސް 2026 ގައި ރާއްޖޭގެ ޝޫޓިން ޓީމު-- ފޮޓޯ: އެމްއޯސީ ޕިސްޓަލް އިވެންޓުތަކަށް ބަލާއިރު، 2019 ވަނަ އަހަރު ނޭޕާލުގައި ބޭއްވި 13 ވަނަ ސައުތު އޭޝިއަން ގޭމްސްގައި ރިއުޝާ މުހައްމަދު ހަދާފައިވާ 546 ގެ ރިކޯޑު، 10 މީޓަރު އެއާ ޕިސްޓަލް އަންހެން ކެޓަގަރީއިން މަރްޔަމް އީޝަލް މިސްބާހު ވަނީ 558 ގެ ސްކޯއަކުން މުގުރާލާފައެވެ. އަދި 10 މީޓަރު އެއާ ޕިސްޓަލް މިކްސްޑް ޓީމު އިވެންޓުގައި އީޝަލް އާއި ޒިޔާން ޒިއާއު ވަނީ 557 ގެ ސްކޯއެއް ހޯދައި، ކުރިން ރިއުޝާ އާއި ޒިޔާންގެ މައްޗަށް އޮތް ރިކޯޑު އައުކޮށްފައެވެ.
މި މުބާރާތަކީ ޓީމު އިވެންޓުތަކުން ޤައުމީ ރިކޯޑު ފުރަތަމަ ފަހަރަށް ރަސްމީކޮށް ސެޓު ކުރެވުނު މުބާރާތަށްވުމާއެކު، މުޅިން އަލަށް 4 ޤައުމީ ޓީމު ރިކޯޑެއްވެސް ވަނީ ޤާއިމުކޮށްފައެވެ. އެގޮތުން 10 މީޓަރު އެއާ ރައިފަލް އަންހެން ޓީމު އިވެންޓުން އީޝާ، އީން އަދި އައިނާ ވަނީ 1833.5 ގެ ސްކޯއެއް ހަދާފައެވެ.
އޭޝިއަން ގޭމްސް 2026 ގައި ރާއްޖޭގެ ޝޫޓިން ޓީމު-- ފޮޓޯ: އެމްއޯސީ ފިރިހެން ރައިފަލް ޓީމު އިވެންޓުން މާއިދު، އުމަރު އަދި ޝިފާން 1822.0 ގެ ސްކޯއެއް ހެދިއިރު، 10 މީޓަރު އެއާ ޕިސްޓަލް އަންހެން ޓީމު އިވެންޓުން އީޝަލް، ފައިހާ އަދި މަލަކް ވަނީ 1584 ގެ ސްކޯއެއް ހޯދާފައެވެ. އަދި ޕިސްޓަލް ފިރިހެން ޓީމު އިވެންޓުން ޒިޔާން، މާދިހު އަދި ސުބްހާތު ވަނީ 1652 ގެ ސްކޯއަކާއެކު އައު ރިކޯޑެއް ޤާއިމުކޮށްފައެވެ.
ވާދަކުރި 10 އިވެންޓުގެ ތެރެއިން ޤައުމީ ރިކޯޑު އައު ނުކުރެވި އޮތީ އެންމެ އިވެންޓަކުންނެވެ. އެއީ 10 މީޓަރު އެއާ ޕިސްޓަލް ފިރިހެން އިންޑިވިޖުއަލް އިވެންޓެވެ.
އޭޝިއަން ގޭމްސް 2026 ގައި ދިވެހި ޝޫޓިން ޓީމުން ހޯދި މި ތާރީޚީ ކާމިޔާބީއަކީ ކުރު މުއްދަތެއްގެ ތެރޭގައި ހޯދި ބޮޑު ކާމިޔާބީއެކެވެ. ކުރިން ސިފައިންގެ ތެރޭގައި އެކަނި ބޭއްވި މި ކުޅިވަރު އާންމުކޮށް ހުޅުވާލައި، ސްކޫލް ކުދިންނާ އާންމުންނަށް ބައިވެރިވެވޭ ގޮތަށް ހުޅުވާލި ފަހުން އުންމީދީ ގިނަ އެތުލީޓުންތަކެއް ދަނީ ފެންނަމުންނެވެ.