ޗެޓްޖީޕީޓީ ބޭނުންކުރާ ފަރާތްތަކަށް އަމާޒުކޮށްގެން މަހަކު 500 ޑޮލަރު ދައްކަންޖެހޭ "ޕްރޯ 500" ގެ ނަމުގައި އާ ސަބްސްކްރިޕްޝަން ޕްލޭނެއް އޯޕަންއޭއައި އިން ތައާރަފުކޮށްފިއެވެ.
މީގެ އިތުރުން، އެ ކުންފުނިން ކުރިން ދޫކުރަމުން އައި 200 ޑޮލަރުގެ ޕްލޭންގެ ކޮމްޕިއުޓް އެލަވަންސް ވަނީ ދެބައިކުޅަ އެއްބަޔަށް ކުޑަކޮށްފައެވެ. މި ބަދަލުތައް އިއުލާންކޮށްފައިވަނީ އެމެރިކާގެ ސެން ފްރެންސިސްކޯގައި 2،500 ޑިވެލޮޕަރުންނާއެކު އިއްޔެ ބޭއްވި ޑެވްޑޭ 2026 އިވެންޓުގައެވެ.
އަލަށް ތައާރަފުކުރި 500 ޑޮލަރުގެ ޕްލޭންގައި ޗެޓްޖީޕީޓީ ޕްލަސް ޕްލޭނަށް ވުރެ 25 ގުނަ އިތުރަށް ބޭނުންކުރެވޭނެއެވެ. އަދި މި ޕްލޭންގައި ހިމެނޭ "އަލްޓްރާފާސްޓް" ފީޗާ މެދުވެރިކޮށް، ކޯޑެކްސް އަދި ޗެޓްޖީޕީޓީ ވޯކްގައި ޖީޕީޓީ-6 އެސްޓްރާ މޮޑެލް އަށް ގުނަ އަވަހަށް މަސައްކަތްކުރާނެއެވެ. މިއީ ސިކުންތަކު 300 ޓޯކެން ޖެނެރޭޓްކުރެވޭނެ ސްޕީޑެކެވެ.
އަނެއްކޮޅުން، 200 ޑޮލަރުގެ ޕްލޭނަށް ގެނައި ބަދަލާއެކު، އަންނަ މަހުގެ 30 އިން ފެށިގެން އެ ޕްލޭންގެ ލިމިޓު 20 ގުނައިން 10 ގުނައަށް ދަށްވާނެއެވެ. އަދި ހަފުތާއަކު ފޮނުވޭ ޖީޕީޓީ-6 ޕްރޯ މެސެޖުގެ އަދަދު 200 އިން 100 އަށް މަދުވާނެއެވެ. ނަމަވެސް، މިހާރު 200 ޑޮލަރުގެ ޕްލޭން ގެންގުޅޭ ފަރާތްތަކަށް ބަދަލުގެ ގޮތުގައި 2،500 ޑޮލަރުގެ އަގުހުރި ވަން-ޓައިމް ކްރެޑިޓެއް ދިނުމަށް ވަނީ ނިންމާފައެވެ.
މީގެ އިތުރުން، ޕްރޯ ޕްލޭންތައް ގެންގުޅޭ ފަރާތްތަކަށް "ޑޮޓްސް" ގެ ނަމުގައި އާ އޭއައި އޭޖެންޓެއް ލިބޭނެ ކަމަށާއި، އެ އޭޖެންޓާއެކު ކުރާ މުއާމަލާތްތައް ލިމިޓުން ނުކެނޑޭނެ ކަމަށް އޯޕަންއޭއައި އިން ބުނެފައިވެއެވެ.
އޯޕަންއޭއައިގެ ކޯޑެކްސް އިންޖިނިއަރިން ލީޑް ތިބޯ ސޮޓިއޯ ވިދާޅުވި ގޮތުގައި، 200 ޑޮލަރުގެ ޕްލޭނަށް ގެނައި ބަދަލަކީ އޭޕީއައި ހަރަދުގެ ނިސްބަތުން ބަލާއިރު ކުރީގެ ޕްލޭންގެ ދެބައިކުޅަ އެއްބަޔާ އެއްވަރުގެ ބަދަލެކެވެ. މި ބަދަލުތައް ގެނެސްފައިވަނީ އެޑްވާންސް އޭއައި މޮޑެލްތައް ހިންގުމަށް ބޭނުންވާ އިންފްރާސްޓްރަކްޗާ ހަރަދުތައް ބޮޑުވަމުންދާތީ ކަމަށް ރިޕޯޓުތައް ބުނެއެވެ.
އަހަރަކު 6،000 ޑޮލަރު ހަރަދުވާ އާ ޕްލޭނަކީ އާންމު ބޭނުންތަކަށްވުރެ ބޮޑަށް، ޓޯކެން ލިމިޓުތަކާ ކުރިމަތިލާންޖެހޭ ޑިވެލޮޕަރުންނާއި ކުދި ވިޔަފާރިތަކަށް އަމާޒުކޮށްގެން ނެރެފައިވާ ޕްލޭނެކެވެ. މި ބަދަލުތަކާއެކު، އޯޕަންއޭއައި އިން ވަނީ އަގުހެޔޮކޮށް ބޭނުންކުރެވޭ "ޖީޕީޓީ-6.1 ސޯލް" ގެ ނަމުގައި އާ މޮޑެލްއެއް ވެސް ތައާރަފުކޮށްފައެވެ.