މާލޭ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަޝްރޫއުގެ ދަށުން އެތެރޭގެ އޮޕަރޭޝަންތަކަށް ތަރައްގީކުރާ ސަރަހައްދު މި ފެށޭ އޮކްޓޯބަރު މަހުގެ ކުރީކޮޅު ނިންމައިލެވޭނެ ކަމަށް، ވިޔަފާރި ބަނދަރުތަކާ ބެހޭ ކުންފުނި މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފިއެވެ.
އިކޮނޮމިކް މިނިސްޓަރު މުޙައްމަދު ސަޢީދު މިއަދު ވަނީ، މާލޭ ވިޔަފާރި ބަނދަރު ތިލަފުށްޓަށް ބަދަލުކުރުމަށް ކުރާ މަސައްކަތްތަކުގެ އަދާހަމަ އެކުލެވޭ ވީޑިއޯއެއް 'އެކްސް'ގައި އާންމުކުރައްވައިފައެވެ.
އެމްޕީއެލުން އެ ވީޑިއޯގައި ބުނެފައިވަނީ، ވިޔަފާރި ބަނދަރުގެ އެތެރޭގެ އޮޕަރޭޝަންތަކަށް ތަރައްގީކުރާ ސަރަހައްދުގައި ތަރައްގީކުރަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކުރި 100 މީޓަރުގެ ކީވޯލްގެ މަސައްކަތް ވަނީ ނިމިފައެވެ. މިހާރު ކުރިއަށްދަނީ 40.1 އަކަކިލޯމީޓަރުގެ ޔާޑު ޕޭވިން މަސައްކަތް ކަމަށް އެމްޕީއެލުން ބުންޏެވެ.
https://x.com/em_saeed/status/2105170195203723374
އެ މަސައްކަތް މި ފެށޭ އޮކްޓޯބަރު މަހު ކުރީކޮޅު ނިންމައިލެވޭނެ ކަމަށް އެމްޕީއެލުން ވަނީ ލަފާކޮށްފައެވެ.
އެ ކުންފުނިން ބުނިގޮތުގައި އެ ސަރަހައްދުގެ މަސައްކަތް ފުރިހަމަވުމުން މާލޭގެ ވިޔަފާރި ބަނދަރުގައި މިހާރު ދެމުން އަންނަ ދޯންޏާއި ކާގޯ ކްލިއަރެންސްގެ އޮޕަރޭޝަންތައް އެއްކޮށް ތިލަފުށްޓަށް ބަދަލުކުރެވޭނެއެވެ. އެ އޮޕަރޭޝަންތައް ފެށުމަށްޓަކައި އެ ސަރަހައްދުގައި ގާއިމްކުރަންޖެހޭ އިތުރު އުމްރާނީ ވަސީލަތްތައް ގާއިމުކޮށް ތަރައްގީކުރުމަށް ކުރަންޖެހޭ މަސައްކަތްތައް ވެސް ކުރިއަށް އެބަދާ ކަމަށް އެމްޕީއެލުން ބުންޏެވެ.
ހަމަ އެއާއެކު ބޭރުގެ އޮޕަރޭޝަންތަކަށް ތަރައްގީކުރާ ބަނދަރުގެ 375 މީޓަރުގެ ކީވޯލާއި ދެ ކިލޯމީޓަރުގެ ޑޮމެސްޓިކް ކީގެ މަސައްކަތްތައް ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)އިން ދަނީ ބާރު ސްޕީޑުގައި ކުރަމުން ކަމަށް އެމްޕީއެލުން ބުންޏެވެ. އެގޮތުން އެމްޕީއެލުން ބުނީ، 820 މީޓަރުގެ ޑޮމެސްޓިކް ކީއަށް ބޭނުންވާ ބިން ހިއްކުމުގެ މަސައްކަތުގެ 40 އިންސައްތަ ސީއެޗްއީސީން ވަނީ ފުރިހަމަކޮށްފައި ކަމަށެވެ.
އޭގެ އިތުރުން ތިލަފުށީގައި ތަރައްގީކުރާ ބަނދަރުގެ އޮޕަރޭޝަނަށް ބޭނުންވާ އިކުއިޕްމަންޓް ހޯދަން ފަށައިފައިވާ ކަމަށާއި، އެ ތަކެތި އަންނަ އޮކްޓޯބަރު މަހުގެ ހިސާބު ގެނެވޭނެ ކަމަށް އެމްޕީއެލުން ވަނީ ލަފާކޮށްފައެވެ.
އެ ކުންފުނިން ލަފާކުރާ ގޮތުގައި ޑޮމެސްޓިކް ކީގެ މަސައްކަތް އަންނަ ނޮވެންބަރު މަހުގެ ނިޔަލަށް ނިންމައިލެވޭނެއެވެ. އަދި އިންޓަނޭޝަނަލް ކީގެ މަސައްކަތް އަންނަ ޖުލައި މަހުގެ ނިޔަލަށް ނިންމައިލެވޭނެ ކަމަށް ވެސް އެމްޕީއެލުން ވަނީ ލަފާކޮށްފައެވެ.
އެ ވީޑިއޯ އާންމުކުރެއްވުމަށްފަހު 'އެކްސް'ގައި ސަޢީދު ފާހަގަކުރެއްވި ގޮތުގައި، އެތައް ޒަމާނެއް ވެގެން ދިޔައިރު ވެސް ރާއްޖޭގެ މައި ވިޔަފާރި ބަނދަރަށް ގެނެވިފައި ވަނީ ކުދިކުދި ތަރައްގީއެވެ.
ތިލަފުށީގައި ތަރައްގީކުރާ އާ ބަނދަރަކީ ގާތްގަނޑަކަށް 250 މިލިއަން ޑޮލަރުގެ މަޝްރޫއެކެވެ. މި މަޝްރޫއުގެ ފުރަތަމަ ފިޔަވަހީގެ މަސައްކަތް މި އަހަރުގެ ފެބްރުއަރީ މަހު ވަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ) އާ ހަވާލުކޮށްފައެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މައުލޫމާތު ދީފައިވާ ގޮތުގައި، 20 ހެކްޓަރުގެ ބިމެއްގައި ތަރައްގީކުރާ މި ބަނދަރު ނިމުމުން، އަހަރަކު ތިން ލައްކަ ޓީއީޔޫ (ކޮންޓެއިނަރު) ހެންޑްލް ކުރުމުގެ ގާބިލުކަން ލިބިގެންދާނެއެވެ. މިއީ މިދިޔަ އަހަރު މާލޭގެ ބަނދަރުން ހެންޑްލްކުރި 135،000 ޓީއީޔޫއާ އަޅައި ބަލާއިރު ދެގުނައަށް ވުރެ ބޮޑު އަދަދެކެވެ. ސަރުކާރުން އަމާޒު ހިފާފައިވަނީ އަންނަ އަހަރުގެ ނޮވެންބަރު 11ގެ ނިޔަލަށް މާލޭގެ ވިޔަފާރި ބަނދަރު އެއްކޮށް ތިލަފުއްޓަށް ބަދަލުކުރުމަށެވެ.
މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަކީ، މިހާރު މާލޭގެ ބަނދަރަށް ދިމާވެފައިވާ ޖާގައިގެ ދަތިކަމާއި ތޮއްޖެހުމުގެ މައްސަލައަށް އޮތް ދާއިމީ ހައްލު ކަމަށް ކަމާބެހޭ ފަރާތްތަކުން ފާހަގަކުރެއެވެ. އެންމެ ފަސް ހެކްޓަރުގެ ބިމެއްގައި 1980 ގެ އަހަރުތަކުގައި ތަރައްގީކޮށްފައިވާ މާލޭގެ ބަނދަރު ތޮއްޖެހުމުގެ ސަބަބުން، މުދާ ކްލިއާ ކުރުމަށް ބައެއް ފަހަރު ދެ ހަފުތާއަށް ވުރެ ގިނަ ދުވަސް ނަގައެވެ. މިކަމުގެ ސަބަބުން ޑެމަރޭޖް ޗާޖުގެ ގޮތުގައި ވިޔަފާރިވެރިންނަށް ބޮޑެތި ގެއްލުންތަކާ ކުރިމަތިލާން ޖެހި، މުދަލުގެ އަގު އުފުލުމަށް މަގުފަހިވާ ކަމަށް ވިޔަފާރިވެރިންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
މި ދަތިތަކަށް ވަގުތީ ހައްލެއް ހޯދައިދިނުމުގެ ގޮތުން، މުދާ ކްލިއާ ކުރުމުގެ ހިދުމަތް 24 ގަޑިއިރަށް ބަދަލުކޮށް، ޑެމަރޭޖް ފްރީ މުއްދަތު 80 ގަޑިއިރުން 124 ގަޑިއިރަށް މި ސަރުކާރުން ވަނީ އިތުރުކޮށްދީފައެވެ. މި އަހަރުގެ ކުރީކޮޅު ބަނދަރު ތޮއްޖެހުމުގެ ސަބަބުން ރާއްޖެއަށް މުދާ ހިފައިގެން އައި 4،200 އެއްހާ ކޮންޓެއިނަރު ސްރީލަންކާގެ ކޮލަމްބޯ ބަނދަރުގައި ތާށިވެފައި އޮތްކަންވެސް ފާހަގަކޮށްލެވެއެވެ. އާ ބަނދަރު ހުޅުވުމާއެކު، މުދާ ކްލިއާ ކުރުމަށް މިހާރު ނަގާ ހަތް ދުވަހުގެ މުއްދަތު 48 ގަޑިއިރަށް ކުޑަކުރެވޭނެ ކަމަށް ސަރުކާރުން ވަނީ އިއުލާންކޮށްފައެވެ.