ކުރިއަށް އޮތް ދެ މަހެއްހާ ދުވަހުގެ ތެރޭގައި ރާއްޖޭގައި ޕޯސްޓްމޯޓަމް ހަދާ ޔުނިޓުގެ އަމަލީ މަސައްކަތް ފެށޭނެ ކަމަށް ލަފާކުރެވޭ ކަމަށް އައިޖީއެމްއެޗުން މިއަދު ބުނެފިއެވެ.
އެ ޔުނިޓު ގާއިމުކުރުމަށް ހުޅުމާލެ ސަހަރާ ކައިރިން އައިޖީއެމްއެޗަށް ސަރުކާރުން ވަނީ ބިމެއް ހަމަޖައްސަދީފައެވެ.
'ސަން'އިން ސުވާލުކުރުމުން އައިޖީއެމްއެޗުގެ މީޑިއާ އޮފިޝަލް މިއަދު ވިދާޅުވީ، މިހާރު ކުރިއަށް ދަނީ އެ ޔުނިޓުގެ ކޮންސެޕްޓުއަލް އަދި ޑީޓެއިލްޑް ކުރެހުން ނިންމުމުގެ މަސައްކަތްތަކެވެ.
އެގޮތުން، މަސައްކަތް ހަވާލުކުރާނެ ބަޔަކު ހޯދައި، ފުރިހަމަ ކުރަން ޖެހޭ ކަންކަން ނިންމުމަށް ފަހު ކުރިއަށް އޮތް ދެ މަހެއްހާ ދުވަހުގެ ތެރޭގައި އެ ޔުނިޓުގެ އަމަލީ މަސައްކަތް ފެށޭނެ ކަމަށް އޭނާ ވިދާޅުވިއެވެ.
އެމްބިއުލާންސެއް: ދެ މަހެއްހާ ދުވަހުގެ ތެރޭގައި ޕޯސްޓްމޯޓަމް ޔުނިޓުގެ އަމަލީ މަސައްކަތް ފަށަނީ -- ސަން ފޮޓޯ/ މުހައްމަދު ޝާތިއު އަބްދުﷲ ފާހަގަކުރެވޭ ގޮތުގައި، މިހާރު ޕޯސްޓްމޯޓަމްގެ ހަދަނީ ހަށިގަނޑު ރާއްޖޭން ބޭރަށް ފޮނުވައިގެންނެވެ. އެ ކަމަށް ބޮޑު ޚަރަދެއް ސަރުކާރުން ކުރަން ޖެހޭއިރު، ފުލުހުންގެ ތެރޭގައި ވެސް ޕޯސްޓްމޯޓަމް ހެދޭ ފެންވަރުގެ އޮފިސަރުން އެބަތިއްބެވެ.
އެ ކަން ރާއްޖޭގައި ފަށަން ތައްޔާރުވަމުން އަންނަކަން ހާމަކުރެއްވީ، މިދިޔަ ޖުލައި މަހު އަށެއްގައި ހެލްތު މިނިސްޓަރު ގީލާ އަލީ ރައްޔިތުންގެ މަޖިލީހުގައި ވާހަކަދައްކަވަމުންނެވެ.
އެ ދުވަހު ގީލާ ވިދާޅުވި ގޮތުގައި، ރާއްޖެއިން ބޭރުން ޕޯސްޓްމޯޓަމް ހަދަން ބައި ލައްކައެއްހާ ރުފިޔާ ހޭދަވެއެވެ.
ރާއްޖޭގައި ޕޯސްޓްމޯޓަމް ޔުނިޓް ގާއިމްވުމުން މާލެ ސަރަހައްދުގެ އިތުރުން މުޅި ރާއްޖެއަށް ބޭނުންވާ ކްލިނިކަލް ފޮރެންސިކް ޚިދުމަތްތަކާއި ޕޯސްޓްމޯޓަމްގެ ޚިދުމަތް ހަރުދަނާ ނިޒާމެއްގެ ދަށުން ފޯރުކޮށްދިނުމަށް މަގުފަހިވާނެކަން ގީލާ ފާހަގަކުރައްވާފައިވެއެވެ.
މި ޔުނިޓުން ފޯރުކޮށްދޭނެ މައިގަނޑު ޚިދުމަތްތަކުގެ ތެރޭގައި ޝަރުއީ ގޮތުން ބަލަންޖެހޭ މަރުގެ މައްސަލަކުގައި މަރުވި ސަބަބު ދެނެގަތުމަށް ހަށިގަނޑު ތަހުލީލު ކުރުމާއި ޖިންސީ އަދި ޖިސްމާނީ ގޯނާގެ މައްސަލަތައް ތަހުލީލުކުރުން ހިމެނެއެވެ.
މީގެއިތުރުން، ލާއިންސާނީ އަނިޔާތަކާއި ބަންދުގައި ތިބޭ މީހުންނަށް ކުރާ އަނިޔާތަކާ ގުޅިގެން ކުރެވޭ ތަހުލީލުތައް ކުރުމާއި ޝަރުއީ އަދި އިންޝުއަރެންސް ބޭނުންތަކަށްޓަކައި މީހަކަށް ލިބިފައިވާ އަނިޔާގެ މިންވަރު ވަޒަންކޮށްދިނުމުގެ ޚިދުމަތް ވެސް އެ ޔުނިޓުން ފޯރުކޮށްދިނުމަށް ވަނީ ނިންމާފައެވެ.
ރާއްޖޭގައި ޕޯސްޓްމޯޓަމް އާއްމުކޮށް ހަދަނީ މަރުގެ މައްސަލަތަކުގައާއި ޖަލުގައި މަރުވާ މީހުންގެ ތަހުގީގީ ބޭނުންތަކަށެވެ.