މަގު ކޮނުމުގެ އެކި މަސައްކަތުގެ ތެރެއިން ކަރަންޓު ކޭބަލަކަށް ގެއްލުންވެއްޖެނަމަ، އެ މީހަކު ޒިންމާދާރު ކުރުވައި އެ ކަން ހައްލުކުރުމަށް ޚަރަދު ނެގުމަށް ސްޓެލްކޯއިން ނިންމައިފިއެވެ.
މި ފަހުން ވެސް ދެ ހަފުތާއެއް ތެރޭ ދެ ފަހަރަށް ހުޅުމާލެއިން ކަރަންޓު ކެނޑުނެވެ. އެ ދެ ފަހަރު ވެސް ކަރަންޓު ކެނޑުނީ، އިމާރާތް ކުރުމުގެ މަސައްކަތް ކުރާ މީހުން މަގު ކޮނުމުގެ ތެރޭގައި ކަރަންޓު ކޭބަލަކަށް ގެއްލުންވެގެނެވެ. މިކަން ހުޅުމާލޭގައި ވަނީ އާއްމުވެފައެވެ.
އެ މައްސަލައަށް ހައްލެއް ގެނައުމަށް ސްޓެލްކޯއިން ވަނީ، ފިޔަވަޅުތަކެއް އަޅަން ނިންމާފައެވެ.
މިގޮތުން، އެ ކުންފުނިން މިއަދު ބުނީ، މަގު ކޮނުމުގެ އެކި މަސައްކަތްތަކުގެ ތެރެއިން ކަރަންޓު ވިއުގައިގައި ހިމެނޭ ކޭބަލްތަކަށް ގެއްލުންވެގެން ކަރަންޓުގެ ޚިދުމަތް މެދުކެނޑި، ރައްޔިތުންނަށް އެތަކެއް ތަކުލީފުތަކަކާއި ދަތިތަކަކާ ކުރިމަތިވަމުންދާ ކަމަށެވެ.
ކޭބަލަކަށް ގެއްލުންވި ސަރަހައްދު: ސްޓެލްކޯގެ ކަރަންޓު ކޭބަލަކަށް ގެއްލުންވުމުން ޚަރަދު ނެގުމަށް ވަނީ ނިންމާފައި -- ސަން ފޮޓޯ/ އަހުމަދު ސާއިލު އަލީމިފަދަ ހާދިސާތައް ދުވަހެއް ދުވަހަކަށް އިތުރުވާކަން ފާހަގަކޮށް ސްޓެލްކޯއިން ބުނީ، މަގު ކޮނުމުގެ މަސައްކަތްތައް ކުރިއަށްގެންދާ މީހުންގެ އިހުމާލުން މި ފަދަ ކަމެއް ދިމާވެއްޖެ ހާލަތެއްގައި، އެ ފަރާތެއް ޒިންމާދާރު ކުރުވަން ނިންމާފައިވާ ކަމަށެވެ. އަދި، އެ މައްސަލަ ހައްލުކޮށް އަލުން ޚިދުމަތްދޭން ހިނގާ ޚިރަދު އެ މީހެއްގެ އަތުން ނެގުމަށް ނިންމާފައިވާ ކަމަށް އެ ކުންފުނިން ބުނެފައިވެއެވެ.
ސްޓެލްކޯއިން ބުނި ގޮތުގައި، މިއީ ކަރަންޓުގެ ޚިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ޚިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމާފައިވާ ނިންމުމެކެވެ.
އެހެންވެ، މަގު ކޮނުމުގެ މަސައްކަތްތައް ކުރާ ހުރިހާ އެންމެން ވެސް ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައި، ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
ފާއިތުވި އަހަރުތަކުގައި މާލެއާއި ހުޅުމާލޭން ކަރަންޓު ކެނޑުމުގެ މައްސަލަތައް ވަނީ ބޮޑުވެފައެވެ. އެގޮތުން ހުރިހާ ސަރަހައްދަކުން ކަރަންޓު ކެނޑި 'ބްލެކްއައުޓް'އަކަށް ދިޔުމާއި، ހުޅުމާލެ ދެވަނަ ފިޔަވަހީގައި ގިނަ ބަޔަކު ދިރިއުޅޭ ޓަވަރުތަކުން ކަރަންޓު ކެނޑި ގިނައިރު ވުމުގެ މައްސަލަތައް ހިމެނެއެވެ.
ސްޓެލްކޯއިން އަންނަނީ، މާލެ ސަރަހައްދުގައި ކަރަންޓުގެ ޑިމާންޑް ބޮޑުވަމުން އަންނަ މިންވަރާ އެއްވަރަށް ކަރަންޓު ފޯރުކޮށްދިނުމަށް މަސައްކަތް ކުރަމުންނެވެ.