ރާއްޖޭގައި މިދިޔަ ހަފުތާގެ ތެރޭގައި ހިމަބިއްސަށް ފައްސިވީ ދެ މީހުން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފިއެވެ.
އެޗްޕީއޭއިން މިއަދު އާންމުކުރި ތަފާސްހިސާބުގައިވާ ގޮތުން، މިދިޔަ ހަފުތާގައި ބަލި ޖެހުނު ދެ މީހުންނާއެކު، މި އަހަރު ތެރޭގައި އެ ބަލި 282 މީހަކަށް ވަނީ ޖެހިފައެވެ.
ހިމަބިހިން ރައްކާތެރިވުމަށް ޖަހާ އެމްއާރު ވެކްސިންގެ ޑޯޒްތައް ފުރިހަމަ ނުކުރާ މީހުންނަށް ވެކްސިން ޖަހައި ދެމުން އަންނައިރު، މި އަހަރު ތެރޭ 16،453 މީހުންނަށް ވެކްސިން ޖަހައިފައިވާ ކަމަށް އެޗްޕީއޭއިން ބުންޏެވެ.
ރާއްޖެއަކީ ހިމަބިހި ނައްތާލައިފައިވާ ގައުމެއްގެ ގޮތުގައި ކަނޑައަޅައިފައިވަނިކޮށް، މި އަހަރުގެ މެއި މަހުގެ ތެރޭގައި ރާއްޖޭގައި ހިމަބިހި ފެތުރެން ފެށިއެވެ. އޭރު ކޮންމެ ހަފުތާއެކު ގިނަ އަދަދެއްގެ ކޭސްތައް ފެނުނު ނަމަވެސް، މިހާރު ބަލި ޖެހޭ މީހުންގެ އަދަދު ވަނީ ވަރަށް ބޮޑަށް މަދުވެފައެވެ.
އެ ބައްޔާ ގުޅޭ ގޮތުން، ދިވެހިރާއްޖޭގެ އަޑުގެ ޕްރޮގްރާމެއްގައި ހެލްތު މިނިސްޓަރު ގީލާ އަލީ ދާދި ފަހުން ވިދާޅުވީ، ހިމަބިހި ޖެހޭ މީހުންގެ ނިސްބަތް މިހާރު ވަރަށް ބޮޑަށް ދަށްކުރެވިފައިވާ ކަމަށެވެ. އެގޮތުން އެ ބަލީގެ އެކްޓިވް ކޭސްއެއް ނެތް ކަމަށް، މިދިޔަ ހޮނިހިރު ދުވަހު އޭނާ ވިދާޅުވިއެވެ.
ގީލާ ވިދާޅުވީ އެ ބަލި ރާއްޖެ އެތެރެވީ ބޭރު ގައުމުތަކަށް ޒިޔާރަތް ކޮށްފައި އައިސްފައިވާ މީހުންނާއި ރާއްޖެއަށް އައިސްފައިވާ ބޭރުގެ މީހުންގެ ފަރާތުން ކަމަށެވެ. ނަމަވެސް، މިހާތަނަށް އެތައް ހާސް މީހުންނަށް ވެކްސިން ޖަހައިފައިވާއިރު، އޭގެ ސަބަބުން ބަލި އަލަށް ފެންނަ މިންވަރު މަދުކުރެވިފައިވާކަން އޭނާ ފާހަގަކުރެއްވިއެވެ.
ގީލާ ވަނީ، ހިމަބިހި މި އަހަރު ރާއްޖޭގައި ފެތުރުނު ނަމަވެސް، ރާއްޖެއަކީ އެ ބަލި ނައްތާލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައަޅައިފައިވާ ކަނޑައެޅުމަށް ބަދަލެއް ނާންނާނެ ކަމަށެވެ.
ގައިންގަޔަށް ފަސޭހައިން އަރާ ބައްޔެއް ކަމަށްވާ ހިމަބިހީގެ ވެކްސިންގެ ދެ ޑޯޒް ފުރިހަމަކޮށްފައިވާކަން ޔަގީންނުވާ މީހުންނަށް، ކަނޑައެޅިފައިވާ ވެކްސިން ދޭ މަރުކަޒުތަކަށް ޒިޔާރަތްކޮށް ވެކްސިން ފުރިހަމަ ކޮށްދޭނެ ކަމަށް އެޗްޕީއޭއިން މީގެ ކުރިން ވަނީ ބުނެފައެވެ.
ސިއްހީ މާހިރުން އިރުޝާދު ދެއްވާ ގޮތުގައި، ހުން އައުމާ އެކު ހަށިގަނޑުން ރަތް ބިހިތަކެއް ފެންނަން ފަށައިފި ނަމަ، ލަސްނުކޮށް ޞިއްޙީ ފަރުވާ ހޯދުމަކީ ވަރަށް މުހިއްމު ކަމެކެވެ. ބަލީގެ އަލާމާތްތަކަށް ސަމާލުވުމަކީ ބަލި އިތުރަށް ފެތުރުން ހުއްޓުވުމަށް އެޅޭނެ މުހިއްމު ފިޔަވަޅެކެވެ.