ސްވިމް މޯލްޑިވްސް ފަރާތުން އިންތިޒާމްކޮށްގެން ބާއްވާ "އޮޑިން ރަށަށް" ފެތުމުގެ މުބާރާތުގެ މިއަހަރު ޓައިޓަލް ސްޕޮންސަރަކަށް އެސްއެމްއީ ޑިޖިޓަލް ހަމަޖައްސައިފިއެވެ.
"އޮޑިން ރަށަށް" އަކީ ސްވިމް މޯލްޑިވްސް އިން މުޅިން އަލަށް ތަފާތު ގޮތަކަށް ބާއްވާ ފެތުމުގެ މުބާރާތެކެވެ.
މި މުބާރާތް ހަމަޖެހިފައިވަނީ، އިވެންޓް އޮންނަ ރަށެއްގެ 500 މީޓަރު ބޭރުން، ރަށަށް ފަތާފައި އަންނަންޖެހޭ ގޮތަށެވެ. މިއީ މިފަދަ ގޮތަކަށް އިންތިޒާމްކޮށްގެން ރާއްޖޭގައި ފެތުމުގެ މުބާރާތް ބާއްވާ ފުރަތަމަ ފަހަރެވެ.
"އެސްއެމްއީ ޑިޖިޓަލް އޮޑިން ރަށަށް" ފުރަތަމަ އިވެންޓް ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހު ވިލިމާލޭގައިއެވެ. މި މުބާރާތުގައި 100 ފެތުންތެރިން ވާދަކުރުމަށް ހަމަޖެހިފައިވެއެވެ.
އެސްއެމްއީ ޑިޖިޓަލްއިން ބުނީ، އޮޑިން ރަށަށް ފެތުމުގެ މުބާރާތްތަކަކީ ފެތުމުގެ އިވެންޓްތަކެއް ރާއްޖޭގެ އެކި ކަންކޮޅުތަކުގައި އިންތިޒާމްކޮށް ފެތުންތެރިންނަށް މުޅި އަހަރުތެރޭ ވާދަވެރިކަމާއެކު ބައިވެރިވެވޭ މުބާރާތްތަކެއްގެ ފުރުސަތު ހޯދައިދިން ކަމަށެވެ.
އަންނަ އަހަރު ރާއްޖޭގެ ފަސް ރަށެއްގައި މި މުބާރާތް ބޭއްވުމަށް ވަނީ ހަމަޖެހިފައެވެ. މީގެ އިތުރުން، މިއަހަރު ނިމުމުގެ ކުރިން "އެސްއެމްއީ ޑިޖިޓަލް އޮޑިން ރަށަށް" ދެވަނަ އިވެންޓެއް ސްވިމް މޯލްޑިވްސް އިން އިންތިޒާމްކުރުމަށް ވަނީ ހަމަޖެހިފައިއެވެ.
އެސްއެމްއީ ޑިޖިޓަލްއިން ބުނީ، މިފަދަ މުބާރާތެއް ސްޕޮންސާ ކުރުމުގެ އެންމެ ބޮޑު ބޭނުމަކީ އަތޮޅު ތެރޭގައި ބާއްވާ މި ފަދަ އިވެންޓްތަކުގެ ތެރެއިން ރަށް ރަށުގެ ކޮމިއުނިޓީއާ ގުޅުން ބަދަހިކޮށް، އަތޮޅުތެރޭގައި އެސްއެމްއީ ޑިޖިޓަލްގެ ދައުރު ފުޅާކުރުމަށް ކުރެވޭ މަސައްކަތަކަށް ވުމުން ކަމަށެވެ.
މީގެއިތުރުން، މި ފަދަ އިވެންޓްތައް ބާއްވާ ރަށްރަށުގެ ކުދި ވިޔަފާރިތައް ކުރިއަރައިގެން ދިޔުމާއި އެސްއެމްއީ ޑިޖިޓަލް އިން ފޯރުކޮށްދޭ ފައިނޭންސިން ފެސިލިޓީގެ މައުލޫމާތު ހިއްސާ ކުރުމަށް މި އިވެންޓްތައް ބޭނުންކުރެވޭތީ ކަމަށް އެސްއެމްއީ ޑިޖިޓަލްއިން ވަނީ ބުނެފައެވެ.