ބެންކޮކްގައި ފެންބޮޑުވުން: ފްލައިޓުތަކެއް ކެންސަލްވެ، ލަގެޖުން އެއާޕޯޓް "ފުރިއްޖެ"

ފްލައިޓްތައް ކެންސަލް ވުމުގެ ސަބަބުން ބެންކޮކް އެއާޕޯޓްގައި ލަގެޖުތައް ތާށިވެފައި--- ފޮޓޯ: ރޮއިޓާސް

ދިވެހީން އާއްމުކޮށް ގޮސް އުޅޭ، ތައިލެންޑުގެ ގައުމީ އެއާލައިން، ތައި އެއާވޭސްގެ 30 ފްލައިޓެއް ކެންސަލްކޮށްފިއެވެ. އެ ކުންފުނިން މި ފްލައިޓުތައް ކެންސަލްކުރީ ވެރިރަށް ބެންކޮކަށް ބޯކޮށް ވާރޭވެހި ފެންބޮޑުވުމާ ގުޅިގެން އޮޕަރޭޝަންތަކަށް ބުރޫއެރުމުންނެވެ.

ތައި އެއާވޭސްގެ ޗީފް އެގްޒެކެޓިވް ޗައި އީމްސިރީ ނޫސްވެރިންނަށް މައުލޫމާތު ދެމުން ވިދާޅުވި ގޮތުގައި، މިއަދު ކެންސަލްކުރީ ބެންކޮކުން ފުރަން ހަމަޖެހިފައިވާ ފްލައިޓުތަކުގެ 30 ޕަސެންޓެވެ. އަދި ފްލައިޓުތައް މަދުކުރުމުގެ މި ފިޔަވަޅު މަދުވެގެން ތިން ދުވަހަށް ދެމިގެންދާނެ ކަމަށް އޭނާ ވިދާޅުވިއެވެ.

ފާއިތުވި ދެ ދުވަހުގެ ތެރޭގައި އެ އެއާލައިންގެ ގާތްގަނޑަކަށް 100 ޕަސެންޓް ފްލައިޓު ޑިލޭވެފައިވާއިރު، ގަޑިއަށް ފުރިފައިވަނީ ތިން ޕަސެންޓަށް ވުރެ މަދު ފްލައިޓެއް ކަމަށް ވެސް އޭނާ ފާހަގަކުރެއްވިއެވެ.

ފްލައިޓްތައް ކެންސަލް ވުމުގެ ސަބަބުން ބެންކޮކް އެއާޕޯޓްގައި ލަގެޖުތައް ތާށިވެފައި--- ފޮޓޯ: ރޮއިޓާސް

ބޯ ވާރެޔާއި ފެންބޮޑުވުމުގެ ތެރޭގައި ވެސް ބެންކޮކްގެ މައި އެއާޕޯޓުތަކުގެ އޮޕަރޭޝަންތައް ހުއްޓުމަކަށް ނާދެއެވެ. ނަމަވެސް، ސުވަރްނަބޫމީ އެއާޕޯޓުގައި ލަގެޖް އުފުލުމުގެ މަސައްކަތަށް ވަނީ ވަރަށް ބޮޑަށް ބުރޫއަރާފައެވެ. މިކަމާ ގުޅިގެން، ތައި އެއާވޭސްގެ ގްރައުންޑް އޮޕަރޭޝަންތަކަށް އެހީތެރިވުމަށް ހޯމަ ދުވަހު ތައި އެއާ ފޯސްގެ 69 ސިފައިން ވަނީ ނެރެފައެވެ. ޗައި ވިދާޅުވި ގޮތުގައި، އެ އެއާލައިންގެ 5،600 އެއްހާ ލަގެޖް އެއާޕޯޓުގައި ތާށިވެފައި އެބަހުއްޓެވެ. ނަމަވެސް ކުރިއަށް އޮތް 72 ގަޑިއިރުގެ ތެރޭގައި އެ ތަކެތި ފޮނުވައި ނިންމާލެވޭނެ ކަމަށް އޭނާ ވިދާޅުވިއެވެ.

ފާއިތުވި ހަފުތާގެ ދެތިން ދުވަހެއްގެ ތެރޭގައި ބެންކޮކަށް ވަނީ 320 މިލިމީޓަރުގެ ވާރޭ ވެހިފައެވެ. މިއީ އާންމުކޮށް މުޅި ސެޕްޓެންބަރު މަހު އެ ސިޓީއަށް ވާރޭ ވެހޭ މިންވަރާ ގާތްކުރާ އަދަދެކެވެ. ތައިލެންޑުގެ އިންޓީރިއާ މިނިސްޓްރީން ނެރުނު ބަޔާނެއްގައި ބުނެފައިވާ ގޮތުގައި، ސެޕްޓެންބަރު 16 އިން ފެށިގެން 42 ޕްރޮވިންސަކަށް ކުރި ވިއްސާރައިގައި މިހާތަނަށް މަދުވެގެން 23 މީހުން ވަނީ މަރުވެފައެވެ.

އޭގެ ތެރޭގައި ބެންކޮކުން މަރުވި ހަތަރު މީހުން ވެސް ހިމެނެއެވެ. އިތުރަށް ވާރޭ ނުވެހޭ ނަމަ، ކުރިއަށް އޮތް ތިން ދުވަހުގެ ތެރޭގައި ބެންކޮކްގެ ފެންގަނޑު ހިނދޭނެ ކަމަށް ސަރުކާރުން ވަނީ ލަފާކޮށްފައެވެ.

ފްލައިޓްތައް ކެންސަލް ވުމުގެ ސަބަބުން ބެންކޮކް އެއާޕޯޓްގައި ލަގެޖުތައް ތާށިވެފައި--- ފޮޓޯ: ރޮއިޓާސް

ފެންބޮޑުވުމުގެ ސަބަބުން ލިބުނު ގެއްލުންތަކުން އަރައިގަތުމަށް ހަތަރު ބިލިއަން ބާތު (119 މިލިއަން ޑޮލަރު) ގެ ފަންޑެއް ކެބިނެޓުން ފާސްކޮށްފައިވާ ކަމަށް ބޮޑުވަޒީރު އަނުޓިން ޗާންވިރަކުލް ވިދާޅުވިއެވެ. އަދި ދިގު މުއްދަތަކަށް އަމާޒުކޮށްގެން ފެން ހިންދުމުގެ ނިޒާމު ގާއިމުކުރުމަށް 160 ބިލިއަން ބާތުގެ މަޝްރޫއަކަށް ވެސް ވަނީ ހުއްދަ ދީފައެވެ.

ތައިލެންޑުގެ އިންޑަސްޓްރީ މިނިސްޓަރު ވަރާވުތު ސިލްޕާ-އާޗާ ވިދާޅުވި ގޮތުގައި، 40 ޕްރޮވިންސަކުން 1،267 ވިޔަފާރިއަކަށް ވަނީ އަސަރުކޮށްފައެވެ. މީގެ ތެރޭގައި 52 ކާރުހާނާއާއި 1،162 ކުދި އަދި މެދު ފަންތީގެ ވިޔަފާރި ހިމެނެއެވެ. މުޅި ގައުމަށް ބަލާއިރު، ފެންބޮޑުވުމުގެ ސަބަބުން އިގުތިސާދަށް ލިބުނު ގެއްލުމުގެ އަގު 320 މިލިއަން ޑޮލަރަށް ވުރެ މައްޗަށް އަރާނެ ކަމަށް ވަނީ އަންދާޒާކޮށްފައެވެ.

comment ކޮމެންޓް