ކޮންކާކަފް ނޭޝަންސް ލީގުގައި އެންގުއިލާ އާއި އެންޓީގުއާ އެންޑް ބާބިއުޑާ ބައްދަލުކުރި މެޗުގައި އެންގުއިލާގެ އޭޑަން ސިޕިއޯގެ ފައިގެ ފުންނާބާ ހަމައަށް ދިގުކޮށް ހުރި އިސްތަށިގަނޑަށް ހިފާ ދަމައިގަތުމުގެ ސަބަބުން އިދިކޮޅު ޓީމުގެ ދެ ކުޅުންތެރިއަކަށް ރަތްކާޑު ދައްކައިފިއެވެ.
ފުޓްބޯޅައިގެ ދިގު ތާރީޚުގައި ވެސް ދުވަހަކު ފެނިފައިނުވާ ފަދަ މަޖާ އަދި ހައިރާންކުރުވަނިވި މި ހާދިސާ ކޮންކާކަފް ނޭޝަންސް ލީގުގައި އެންގުއިލާ އާއި އެންޓީގުއާ އެންޑް ބާބިއުޑާ ބައްދަލުކުރި މެޗުގައި ވަނީ ފެނިއެވެ.
އެންޓީގުއާގެ ދެ ކުޅުންތެރިއަކަށް ސީދާ ރަތް ކާޑު ދައްކާ ދަނޑުން ފޮނުވާލަން ޖެހުނީ އިދިކޮޅު ކުޅުންތެރިއެއްގެ ފައިގެ ފުންނާބާ ހަމައަށް ދިގުކޮށް ހުރި އިސްތަށިގަނޑަށް ހިފާ ދަމައިގަތުމުގެ ސަބަބުންނެވެ. މި ހާދިސާގެ ސަބަބުން މުޅި ދުނިޔޭގެ ފުޓްބޯޅަ ސަޕޯޓަރުންގެ ސަމާލުކަން މިހާރު ވަނީ މި މެޗަށް ހުއްޓިފައެވެ.
މި ދިގު އިސްތަށިގަނޑާއެކު ކުޅުނު ކުޅުންތެރިއަކީ އެންގުއިލާ ގައުމީ ޓީމުގެ އުމުރުން 36 އަހަރުގެ މިޑްފީލްޑަރު އޭޑަން ސިޕިއޯއެވެ. ސިޕިއޯ އަކީ އޭނާގެ ފައިގެ ކަކުލުން ތިރިއާ ހަމައަށް ދިގުކޮށް ހުންނަ ޑްރެޑްލޮކްސް އިސްތަށިގަނޑުގެ ސަބަބުން ދުނިޔޭގެ ފުޓްބޯޅައިގައި ވެސް ފާހަގަކޮށްލެވޭ ކުޅުންތެރިއެކެވެ.
އޭނާ ދަނޑުމަތީގައި ދުވާއިރު މި ދިގު އިސްތަށިގަނޑު ހިފަހައްޓާ ބެހެއްޓުމަށްޓަކައި އުނަގަނޑުގައި ހާއްސަ ބޭންޑެއް ވެސް ބޭނުންކުރެއެވެ. ނަމަވެސް، މި މެޗުގައި އޭނާގެ މި ހިތްގައިމު އިސްތަށިގަނޑު ވެގެންދިޔައީ އިދިކޮޅު ކުޅުންތެރިންނަށް ކެތްތެރިކަން ކޮޅުންލައިދިޔަ "މަޅިއަކަށެވެ".
ކޮންކާކަފް ނޭޝަންސް ލީގުގައި އެންގުއިލާ އާއި އެންޓީގުއާ އެންޑް ބާބިއުޑާ ބައްދަލުކުރި މެޗުގައި ރަތްކާޑު ދެއްކި ދެ ހާލަތު-- ހާދިސާ ހިނގި ގޮތަށް ބަލާއިރު، ސިޕިއޯ ކުޅެން އެރީ މެޗުގެ 68 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައެވެ. އެ ވަގުތު އޭނާގެ ޓީމު އޮތީ 5-0 ގެ ބޮޑު ނަތީޖާއަކުން ބަލިވެފައެވެ. ނަމަވެސް އޭނާ ދަނޑަށް އެރިތާ އެންމެ 3 މިނެޓު ތެރޭގައި އެންޓީގުއާގެ ކީއޮން ގްރީން ވަނީ ސިޕިއޯ އަތުން ބޯޅަ އަތުލަން އުޅުމުގެ ތެރޭގައި އޭނާގެ ދިގު އިސްތަށިގަނޑުގައި ހިފާ ފަހަތަށް ވަރަށް ބާރަށް ދަމައިގަނެފައެވެ. މި ގޯސް ފެނި، ރެފްރީ ވަނީ ވަގުތުން ގްރީންއަށް ސީދާ ރަތް ކާޑެއް ދައްކާ ދަނޑުން ފޮނުވާލާފައެވެ.
އެންމެ ބޮޑު ހައިރާންކަމެއް ލިބުނީ މެޗުގެ ފަހު މިނެޓުގައެވެ. މެޗުގެ އިތުރު ވަގުތުގެ ގޮތުގައި ދެއްކި 93 މިނެޓުގައި، އެންޓީގުއާގެ އެހެން ކުޅުންތެރިއެއް ކަމަށްވާ ޝަލޮން ނައިޓް ވެސް ވަނީ ހަމަ އެއް ގޯހެއް ތަކުރާރުކޮށްފައެވެ. ސިޕިއޯ ދުވެފައި ދަނިކޮށް ފަހަތުން އައިސް އޭނާގެ އިސްތަށިގަނޑަށް ހިފާ ދަމައިގަތުމުން، ސިޕިއޯ ދަނޑުމައްޗަށް ވެއްޓުނެވެ.
މި ފަހަރު ސިޕިއޯ ވަރަށް ބޮޑަށް ރުޅިއައެވެ. އެއާއެކު ރެފްރީ ވަނީ ނައިޓްއަށް ވެސް ސީދާ ރަތް ކާޑެއް ދައްކާ ދަނޑުން ފޮނުވާލާފައެވެ. މިއާއެކު، ސިޕިއޯ ދަނޑުމަތީގައި ހޭދަކުރި 21 މިނެޓުގެ ތެރޭގައި އިދިކޮޅު ދެ ކުޅުންތެރިން ރަތް ކާޑު ހޯދައިގެން ދަނޑުން ފައިބަން ޖެހުނެވެ.
މި މެޗު 5-0 އިން އެންޓީގުއާ ކާމިޔާބުކުރި ނަމަވެސް، ފުޓްބޯޅަ ސަޕޯޓަރުން ސޯޝަލް މީޑިއާގައި މިހާރު ޖޯކު ޖަހަމުން ބުނަނީ، ސިޕިއޯގެ އިސްތަށިގަނޑަކީ އިދިކޮޅު ޓީމުތައް ރަތް ކާޑު މަޅީގައި ޖައްސަން ޓީމުން ބޭނުންކުރާ "ސިއްރު ހަތިޔާރެއް" ކަމަށެވެ.