ކަނޑު މަގުން ރާއްޖެ އެތެރެކުރަން އުޅެނިކޮށް އަށް މިލިއަނަށް ވުރެ ގިނަ ސިނގިރޭޓު ސްޓިކްސް އަތުލައިގެންފިއެވެ.
ކަސްޓަމްސްއިން ކުރި ޕޯސްޓެއްގައި ވަނީ، މިދިޔަ އާދިއްތަ ދުވަހު އެ ތަކެތި އަތުލައިގަތީ މާލެ ވިޔަފާރި ބަނދަރުގައި ހިންގި ޚާއްސަ އޮޕަރޭޝަނެއްގައި ކަމަށެވެ.
އެގޮތުން، 'ޖެނެރަލް ކާގޯ'ގެ ގޮތުގައި ޑިކްލެއާކޮށްފައިވާ ޝިޕުމަންޓެއް ބަލައިފާސްކުރި އިރު، 8.5 މިލިއަނަށް ވުރެ ގިނަ ސިނގިރޭޓު ސްޓިކްސް ފެނިފައިވާ ކަމަށް ކަސްޓަމްސްއިން މައުލޫމާތުދެއެވެ.
އެ ތަކެތި މިހާރު ވަނީ ކަސްޓަމްސްގެ ބެލުމުގެ ދަށަށް ގެންގޮސްފައެވެ.
މި ސަރުކާރުން ވަނީ ދުންފަތުގެ އިސްތިއުމާލު ކުރުމާ ދެކޮޅަށް މީގެ ކުރިން ހަރުކަށި ފިޔަވަޅުތަކެއް އަޅައިފައެވެ. އޭގެ ތެރޭގައި 2024ގައި ވޭޕް މަނާކުރުން ހިމެނެއެވެ. އަދި 2007އިން ފެށިގެން، އޭގެ ފަހަށް ރާއްޖޭގައި އުފަންވެފައިވާ ހުރިހާ ކުދީންނަށް، އަދި މީގެ ފަހުން އުފަންވާނެ ހުރިހާ ކުދީންނަށް ވެސް، ދުންފަތުގެ އިސްތިޢުމާލު ކުރުމާއި ދުންފަތް ގަނެވިއްކުން ވެސް ވަނީ މަނާކޮށްފައެވެ.
މި ސަރުކާރުން ނޮވެންބަރު 2024އިން ފެށިގެން ދުންފަތުން ނަގާ ޑިއުޓީ ބޮޑުކުރި ނަމަވެސް، އެ ނިންމުން ބަދަލުކޮށް، މިދިޔަ ޖުލައި މަހު ޑިއުޓީ ވަނީ ކުޑަކޮށްފައެވެ. އެ ބަދަލު ގެނައީ ދުނިޔޭގެ ސިއްހަތު ޖަމިއްޔާގެ ލަފަޔާއެކު ކަމަށް ސަރުކާރުން ވަނީ ބުނެފައެވެ.