އޮފީސް މާޙައުލުގައި މަސައްކަތުގެ އުފެއްދުންތެރިކަން އިތުރުކުރުމަށްޓަކައި ޖަޕާނުގެ ކުންފުނިތަކުން ދަނީ ޢާންމުކޮށް ގެންގުޅޭ އުސޫލުތަކާ ތަފާތު، އީޖާދީ ފިޔަވަޅުތަކެއް އަޅަމުންނެވެ. އެގޮތުން މަސައްކަތު ވަގުތުގެ ތެރެއިން 45 މިނެޓުގެ ވަގުތުކޮޅެއް މުވައްޒަފުން ނިދާލުމަށް ޚާއްސަކޮށް، ގޭގޭގެއިން ބާލީސް ގެނައުމަށް ބާރުއެޅުން ހިމެނެއެވެ.
މި އާދައަކީ ފުރަތަމަކޮޅު ބޭރު ޤައުމުތަކުގެ މުވައްޒަފުންނަށް ނުހަނު ޙައިރާންކަން ގެނުވި ކަމެއް ކަމުގައިވިޔަސް، ތަޖުރިބާކޮށްލުމަށްފަހު ގިނަ މުވައްޒަފުން ދަނީ މިއީ އޮފީސް މާޙައުލުގައި ނުހަނު ބޭނުންތެރި އުސޫލެއްކަން ޤަބޫލުކުރަމުންނެވެ.
ޖަޕާނުގައި އޮފީސް މާޙައުލުގައި ނިދާލުމަކީ "އިނެމުރީ"ގެ ނަމުން މަޝްހޫރުވެފައިވާ ޤަދީމީ ސަޤާފީ އާދައެކެވެ. މީގެކުރިން މިއީ މުވައްޒަފަކު ވަރަށް ބުރަކޮށް މަސައްކަތްކޮށް ވަރުބަލިވެފައިވާކަން ދައްކުވައިދޭ ނިޝާނެއްގެ ގޮތުގައި ބެލެވުނު ކަމެއް ކަމުގައިވިޔަސް، މިހާރު ޖަޕާނުގެ ގިނަ ކުންފުނިތަކުން މިކަން ބަލައިގަންނަނީ މުވައްޒަފުންގެ ސިއްހަތާއި އުފެއްދުންތެރިކަން އިތުރުކޮށްދޭ މުހިންމު ވަސީލަތެއްގެ ގޮތުގައެވެ. ދިރާސާތަކުން ދައްކާ ގޮތުގައި މެންދުރުފަހު ކުރު ވަގުތުކޮޅަކަށް ނިދާލުމަކީ ސިކުނޑީގެ ހާސްކަން ފިލުވައިދީ، މަސައްކަތުގެ ސަމާލުކަމާއި ތޫނުފިލިކަން އިތުރުކޮށްދޭ ކަމެކެވެ.
ޖަޕާނު ކުންފުންޏެއްގައި މަސައްކަތް ކުރަމުން އަންނަ އެމެރިކާއަށް ނިސްބަތްވާ މީހަކު އޮފީހަށް ބާލީހެއް ގެންނަ މަންޒަރު ސޯޝަލް މީޑިއާގައި ހިއްސާކޮށްފައި -- ފޮޓޯ/ ފޭސްބުކްޓޯކިޔޯގެ މަޝްހޫރު ސްލީޕް ރިސާޗް އިންސްޓިޓިއުޓްގެ ނިއުރޯލޮޖިސްޓް އަދި ނިދުމާ ބެހޭ ޚާއްޞަ މާހިރު ޑރ. ކެންޖީ ސާމޯޓޯ ބަޔާންކުރައްވާ ގޮތުގައި، ދުވަހުގެ މެދުތެރެއިން ނަގާ ކުރު ނިދިކޮޅަކީ ސިކުނޑީގެ މަސައްކަތްތައް އާ ގޮތެއްގައި ތާޒާކޮށްދޭ ކަމެކެވެ.
އޭނާ އިރުޝާދު ދެއްވާ ގޮތުގައި މެންދުރުފަހު ނިދާލުމަށް އެންމެ އެކަށީގެންވަނީ 20 މިނެޓާއި 30 މިނެޓާ ދެމެދުގެ ވަގުތުކޮޅެކެވެ. މިވަގުތުކޮޅުގެ ސަބަބުން ގަދައަށް ނިދިގޮސް، ހޭލާއިރު ބޮލަށް ބަރުވުމުގެ ފުރުޞަތު ކުޑަވެ، ހަށިގަނޑަށް ތާޒާކަން ލިބިގެންދެއެވެ.
އޮފީސް މާޙައުލުގައި މުވައްޒަފުންގެ ނަފްސާނީ އަދި ޖިސްމާނީ ދުޅަހެޔޮކަމަށް އިސްކަންދިނުމަކީ ޒަމާނީ ވިޔަފާރީގެ ދުނިޔޭގައި ކުންފުނިތަކުގެ ކާމިޔާބީއާ ސީދާ ގުޅިފައިވާ ކަމެކެވެ. ޖަޕާނުން ފެށުނު މި އީޖާދީ އާދައަކީ ދުނިޔޭގެ އެހެން ގައުމުތަކުގެ އޮފީސްތަކުން ވެސް ނަމޫނާއަކަށް ނަގަންވެއްޖެ މުހިންމު ފިލާވަޅެކެވެ.