އިދިކޮޅު އެމްޑީޕީގެ ކޮންގްރެސް ބާއްވަން އުޅޭ ގޮތާ މެދު ޕާޓީގެ އެތެރޭގައި ޚިޔާލުތަފާތުވުންތައް ބޮޑުވެއްޖެއެވެ.
މިކަމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި އެމްޑީޕީގެ ބާރަށު ދާއިރާގެ ކުރީގެ މެންބަރު އަހުމަދު އަބްދުﷲ ވިދާޅުވީ މިހާރު މިއޮތް އެމްޑީޕީގެ ގައުމީ މަޖިލީހަށް މެންބަރުން ހޮވާފައި ވަނީ މިދިޔަ ހޮނިހިރު ދުވަހުގެ ނިޔަލަށް ކަމަށެވެ. އެގޮތުން ހޮނިހިރު ދުވަހުގެ ފަހުން މިހާރުގެ ގައުމީ މަޖިލީހުގެ ގާނޫނީ ހައިސިއްޔަތެއް ނޯންނާނެ ކަމަށް އޭނާ ވިދާޅުވިއެވެ.
https://x.com/ahmedabdulla2a/status/2102063616967229531
'ސަން' އާ ވާހަކަދެއްކެވި އެ ޕާޓީގެ މެންބަރަކު ވިދާޅުވި ގޮތުގައި ވެސް ކޮންގްރެސް ބާއްވަން އުޅެނީ އެމްޑީޕީގެ އަސާސީ ގަވާއިދާ ޚިލާފަށެވެ. އަދި އެކަމަށް ޕާޓީގެ ގިނަ މެންބަރުންތަކެއް ނުރުހޭ ކަމަށް އޭނާ ވިދާޅުވިއެވެ.
"މިހާރު މިއޮތް 20 ވަނަ ރައްޔިތުންގެ މަޖިލީހުން ދައުރު ދަންމާލަން އުޅޭ ކަހަލަ ވާހަކަތަކެއް ދޭތެރެއަކުން އަޅުގަނޑުމެންނަށް އެބަ އަޑު އިވޭ. އެމްޑީޕީން މުޅިން ދެކޮޅު ކަމެއް އެއީ. އެކަމަކު މިއަދު އެމްޑީޕީން ގާނޫނާ ޚިލާފަށް ކޮންގެރެސް ބާއްވަން ބުނެ ކުރަން މިއުޅެނީ ހަމަ މިފަދަ ކަމެއް ނޫންތޯ؟" އޭނާ ވިދާޅުވިއެވެ.
ހަމައެއާއެކު އެމްޑީޕީގެ ގޮފިތައް ކަނޑައެޅުމުގައި ވެސް އަސާސީ ގަވައިދާ ޚިލާފަށް އަމަލުކޮށްފައިވާ ކަމަށް އޭނާ ތުހުމަތުކުރެއްވިއެވެ.
ނަމަވެސް 'ސަން'އިން ސުވާލުކުރުމުން އެމްޑީޕީގެ ޑެޕިއުޓީ ޗެއާޕާސަން މުޙައްމަދު ޝިފާޒް ވިދާޅުވީ އެމްޑީޕީގެ ގައުމީ މަޖިލީހުން ނިންމައިގެން ކުރާ ކަމެއް އެ ޕާޓީގެ އަސާސީ ގަވައިދާ ޚިލާފުނުވާނެ ކަމަށެވެ. މިހާރު މި އޮތް އެމްޑީޕީގެ ގައުމީ މަޖިލީހުގެ މުއްދަތު އެ ޕާޓީގެ ކޮންގްރެސް ނިމެންދެން އިތުރުކޮށްފައިވާކަން ޝިފާޒް ފާހަގަކުރެއްވިއެވެ.
އެމްޑީޕީއިން މީގެ ކުރިން އެންމެ ފަހުން އެ ޕާޓީގެ ކޮންގްރެސް އެއް ބާއްވާފައި ވަނީ 2022 ވަނަ އަހަރުއެވެ. އޭގެ ފަހުން އެމްޑީޕީގެ ކޮންގްރެސް ބޭއްވުމަށް މަސައްކަތް ކުރުމަށް ފަހު، ފަހުން ވަނީ ކޮންގްރެސް އެހެން ތާރީޚެއްގައި ބޭއްވުމަށް ނިންމައިފައެވެ.
އެމްޑީޕީގެ ކޮންގްރެސް އަކީ އެ ޕާޓީގެ މުސްތަގުބަލާ ގުޅޭ މުހިންމު ކަންކަން އަދި ރިޔާސީ އިންތިޚާބާ ގުޅޭ މުހިންމު ނިންމުންތައް ނިންމާ މުހިންމު ބައްދަލުވުމެކެވެ. އެގޮތުން 2028 ވަނަ އަހަރުގެ ރިޔާސީ އިންތިޚާބުގައި އެ ޕާޓީގެ ފަރާތުން ވާދަކުރައްވާނެ ބޭފުޅަކު ކަނޑައެޅުއްވުން ހިމެނެއެވެ.
މިހާރު ވެސް އެމްޑީޕީގެ ރިޔާސީ ޓިކެޓަށް ހަތަރު ބޭފުޅަކު ވާދަކުރައްވާކަން ހާމަކުރައްވާފައިވެއެވެ. އެއީ ކުރީގެ ނައިބު ރައީސް ފައިސަލް ނަސީމާއި، އެމްޑީޕީގެ ކުރީގެ ރައީސް އަބްދުﷲ ޝާހިދާއި، އެ ޕާޓީގެ ކުރީގެ ޗެއާޕާސަން ފައްޔާޒު އިސްމާއީލްގެ އިތުރުން ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހުމަދު ޝަމްހީދެވެ.
މީގެ ތެރެއިން ޝާހިދު ވަނީ މިފަހުން އެމްޑީޕީގެ ރައީސް ކަމުގެ މަގާމުގައި ހުންނެވުމަށްފަހު، ރިޔާސީ ޓިކެޓަށް ވާދަކުރެއްވުމަށް އެ މަގާމުން އިސްތިއުފާދެއްވައިފައެވެ. އަދި ފައްޔާޒު ނުކުންނަވަނީ މިހާރު އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދުގެ ތާއީދާއެކުއެވެ. އަދި އެނގިފައިވާ ގޮތުގައި ކުރީގެ ރައީސް އިބްރާހީމް މުހައްމަދު ސޯލިހު ހުންނެވީ ފައިސަލްގެ ފަހަތްޕުޅުގައެވެ.
އިދިކޮޅު އެންމެ ބޮޑު ޕާޓީ އެމްޑީޕީގެ އެތެރޭގައި ރިޔާސީ ޓިކެޓަށް މިހާ ބޮޑު ވާދަވެރިކަމެއް އޮތްއިރު، ސަރުކާރު މައި ޕާޓީ ޕީއެންސީން މި މަހު ބޭއްވި ކޮންގްރެސްގައި ރައީސް ޑރ. މުހައްމަދު މުއިއްޒަށް ދެވަނަ ދައުރަކަށް ވަނީ ވޯޓަކާ ނުލައި ޓިކެޓު އަރުވައިފައެވެ. އަދި އެމަނިކުފާނަށް އެންމެ ބޮޑަށް ފާޑުވިދާޅުވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވެސް ރިޔާސީ އިންތިޚާބުގައި ވާދަކުރައްވާނެކަން ވަނީ އިއުލާނުކުރައްވައިފައެވެ.