ރާއްޖޭގެ ޚާއްސަ އިގްތިސާދީ ސަރަހައްދު (އީއީޒެޑް) އިން ބޭރުން ދާއަޅައިގެންނާއި މަސްވެރިކަމުގެ އެހެނިހެން ވަސީލަތްތައް ބޭނުންކޮށްގެން ނަގާ މަސް ރާއްޖެއަށް ގެނެސް ޕްރޮސެސްކުރުމާމެދު މަޝްވަރާކުރަންޖެހޭ ކަމަށް ފިޝަރީޒް މިނިސްޓަރު އަހުމަދު ޝިޔާމް ރޭ ވިދާޅުވެއްޖެއެވެ.
ސަރުކާރުން ބޭއްވި "އަހާ ފޯރަމް" ގައި އާންމުންގެ މީހަކު ކުރި ސުވާލަކަށް ޖަވާބުދެއްވަމުން މިނިސްޓަރު ޝިޔާމް ވިދާޅުވީ، މޫސުމަށް އަންނަ ބަދަލުތަކާއެކު ކަނޑުގެ މަތީ ފަށަލައިން ކުރާ މަސްވެރިކަން ދަށްވަމުންދާ ކަމަށެވެ. ނަމަވެސް ރާއްޖޭގެ އީއީޒެޑުން ބޭރުން ދާޖަހައިގެންނާއި އެހެނިހެން ގޮތްގޮތަށް ބޭރުގެ ބޯޓުފަހަރުން މަސް ނަގައިގެން އެހެން ގައުމުތަކަށް ގެންގޮސް، ޕްރޮސެސްކޮށްގެން ބައިނަލްއަގުވާމީ ބާޒާރަށް ނެރެމުންދާކަން އޭނާ ފާހަގަކުރެއްވިއެވެ.
https://x.com/MFAORmv/status/2104256408963391623
މިގޮތަށް ނަގާ މަސް ރާއްޖެއަށް ގެނެވިދާނެ ގޮތުގެ މިސާލެއް ދައްކަވަމުން މިނިސްޓަރު ވިދާޅުވީ، އައްޑޫ ސިޓީ ފަދަ ސަރަހައްދެއްގައި މަސް ބަނދަރެއް ހަދައިގެން އެ މަސް ގަނެ، ޕްރޮސެސްކުރެވޭނެ އިންތިޒާމު ހަމަޖައްސައިފިނަމަ ދައުލަތަށް ބޮޑު އާމްދަނީއެއް ލިބޭނެ ކަމަށެވެ. އަދި އެކަން މެނޭޖްކުރާނެ އެންމެ ރަނގަޅު އުސޫލުތަކާ މެދު މަޝްވަރާކުރުމަކީ މުހިންމު ކަމެއްގެ ގޮތުގައި ދެކެވަޑައިގަންނަވާ ކަމަށް ވެސް ޝިޔާމް ވިދާޅުވިއެވެ.
ދުނިޔޭގެ އެހެން ގައުމުތަކުގައި ދާ އަޅައިގެން ކުރާ މަސްވެރިކަމުގެ ސަބަބުންނާއި ދުނިޔޭގެ މޫސުމަށް އަންނަ ބަދަލުތަކުގެ ސަބަބުން ތިމާވެއްޓާ ރައްޓެހިކޮށް އަޅުގަނޑުމެން މިކުރާ މަސްވެރިކަމުން ފައިދާ މިހާރު ދަށްވޭ. އެހެންވީމަ އަޅުގަނޑުމެން އީއީޒެޑުން ބޭރުން ނަގާ މަސް ރާއްޖޭގައި ޕްރޮސެސްކުރުމަށް ވިސްނުމަކީ މިހާރު ކުރުން މުހިންމު ކަމެއް، ފިޝަރީޒް މިނިސްޓަރު އަހުމަދު ޝިޔާމް
މީގެ އިތުރުން ކަނޑުގެ މަތީ ފަށަލައިގެ މަސްވެރިކަން ދަށްވަމުންދާތީ ސަރުކާރުން ކުރިން ލޭނު މަސްވެރިކަމަށް ހުއްދަ ދޭން ނިންމިކަން މިނިސްޓަރު ހަނދާންކޮށްދެއްވިއެވެ. ނަމަވެސް އެ މަސައްކަތް ރައްކާތެރި ފިޔަވަޅުތަކާއެކު ކުރިއަށްގެންދަން އުޅުނު ނަމަވެސް، އާންމު މަސްވެރިންނަށް ދެރައެއް ލިބިދާނެތީ ރައީސް ޑރ. މުހައްމަދު މުއިއްޒު އެކަން އިހަށް މަޑުޖައްސާލައްވާފައިވާ ކަމަށްވެސް ޝިޔާމް ވިދާޅުވިއެވެ.