މާބަނޑު ދުވަސްވަރަކީ އުފާވެރި ދުވަސްވަރަކަށް ވާންޖެހޭނެ ކަމަށް ގިނަ ބަޔަކު ގަބޫލުކުރެއެވެ. ނަމަވެސް، އަބަދު އުފާވެރިކޮށް ހުންނަން އަމިއްލަ ނަފުސަށް މަޖުބޫރު ކުރުމަކީ އޭގެ ނޭދެވޭ އަސަރު މައިމީހާއަށާއި ދަރިފުޅަށް ކޮށްފާނެ ކަމެއް ކަމަށް ތަޖުރިބާކާރުން ބުނެއެވެ. ހާސްވެފައި ހުންނަ މާބަނޑު މީހަކު ކައިރީގައި "ސްޓްރެސް ނުވާށޭ" ނުވަތަ "އަބަދުވެސް ޕޮޒިޓިވްކޮށް ހުންނާށޭ" ބުނުމަކީ ހައްލެއް ނޫނެވެ.
ސިންގަޕޫރުގައި މި އަހަރު ހަދާފައިވާ ދިރާސާއަކާ ހަވާލާދީ ސީއެންއޭ ލައިފްސްޓައިލް އިން ރިޕޯޓުކޮށްފައިވާ ގޮތުގައި، މައިމީހާގެ ނަފުސާނީ ދުޅަހެޔޮކަމާއި ދަރިފުޅުގެ ސިކުނޑި ތަރައްގީވުމާ ގުޅިފައިވެއެވެ. ނަމަވެސް މިއީ މައިމީހާ ކުށްވެރިކުރަން އޮތް ސަބަބެއް ނޫން ކަމަށް ސެރެނިޓީ ކްލިނިކްގެ ސައިކޭޓްރިސްޓް ޑރ. ޗުއާ ޓްޒީ-އާން ފާހަގަކުރިއެވެ. އޭނާ ބުނި ގޮތުގައި އެއްވެސް މީހަކީ އަބަދު އުފާވެރިކޮށް ހުންނާނެ މީހެއް ނޫނެވެ. ދެރަވުމާއި، ރުޅިއައުމާއި، ހާސްވުމަކީ ވެސް އިންސާނީ ތަބީއަތުގައި ހިމެނޭ ކަންކަމެވެ. މިއީ މައިމީހާގެ މައްސަލައެއް ހުރެގެން ވާކަމެއް ނޫން ކަމަށާއި، މިއީ ބަދަލުވަމުންދާ ހާލަތްތަކަށް ހޭނުމުގެ ތެރެއިން އަންނަ އިހުސާސްތަކެއް ކަމަށް އޭނާ ބުންޏެވެ.
ގައިނެކޮލޮޖިސްޓް ޑރ. ރެޖީނާ ޒުޒާޓޭ-އެންޖީ ފާހަގަކުރި ގޮތުގައި މާބަނޑު ދުވަސްވަރަކީ ހަށިގަނޑަށް ބޮޑެތި ބަދަލުތަކެއް އަންނަ އުނދަގޫ ދުވަސްވަރެކެވެ. މޭނުބައިކުރުމާއި، ކާހިތްނުވުމާއި، ބުރަކަށީގައި ރިއްސުން ފަދަ ކަންކަމާ ކުރިމަތިލާއިރު، ވަޒީފާ އަދާކުރާ މައިންނަށް މިކަންކަން އިތުރަށް ބުރަވެއެވެ. އެހެންކަމުން، މިފަދަ ހާލަތެއްގައި ހުންނަ މީހަކަށް އަބަދު އުފާވެރިކޮށް ހުންނަން ބުނުމަކީ އެ މީހަކަށް ކުރިމަތިވާ އިތުރު ޕްރެޝަރެކެވެ.
ތުއްތުކުއްޖެއްގެ ސޮނޮގްރާމްއެއް: -- މާބަނޑު ދުވަސްވަރު ނަފުސާނީ ދުޅަހެޔޮކަން ދެމެހެއްޓުމަށް ކުރެވިދާނެ ބައެއް ކަންކަން ތަޖުރިބާކާރުން ވަނީ ހިއްސާކޮށްފައެވެ. މީގެ ތެރޭގައި:
އަމިއްލަ އައިޑެންޓިޓީ ހިމާޔަތްކުރުން: މަންމައަކަށް ވުމަކީ ދިރިއުޅުމަށް އަންނަ ބޮޑު ބަދަލެކެވެ. ނަމަވެސް އަމިއްލަ ރައްޓެހިންނާއި، ވަޒީފާ އަދި ކުރާހިތްވާ ކަންކަމަށް ވަގުތު ހުސްކުރުން މުހިންމު ކަމަށް ކްލިނިކަލް ސައިކޮލޮޖިސްޓް ޕޯ ޕިންގް ޗީ ބުންޏެވެ.
ކުދިކުދި އުފާތަކަށް ވަގުތު ހޯދުން: ބޮޑު ޗުއްޓީއަކަށް ދިއުމުގެ ބަދަލުގައި، ހޫނުކޮށް ކޮފީތައްޓެއް ބޯލުން ނުވަތަ 10 މިނެޓު ބޭރުގައި މަޑުކޮށްލުން ފަދަ ކަންކަމުން ހިތްހަމަޖެހުން ހޯދިދާނެ ކަމަށް ޑރ. ޗުއާ ލަފާދިނެވެ.
ސޯޝަލް މީޑިއާ ބޭނުންކުރުން މަދުކުރުން: ސޯޝަލް މީޑިއާއިން ފެންނަ "ފުރިހަމަ" މަންޒަރުތަކާ އަމިއްލަ ނަފުސު އަޅައިނުކިޔުމަށް ސައިކޮލޮޖިސްޓުން ލަފާދެއެވެ.
ހުރިހާ ކަމެއް ފުރިހަމަކުރަން ނޫޅުން: މާބަނޑު ދުވަސްވަރު ކާންވީ އެންމެ ރަނގަޅު ކާނާއާއި، ކުދިން ތަރުބިއްޔަތު ކުރާނެ ގޮތުގެ މައުލޫމާތު ވަރަށް ގިނައިން ލިބެން ހުރެއެވެ. ނަމަވެސް މި ހުރިހާ ކަމެއް އެއްފަހަރާ ކުރަން އުޅުމަކީ ނުވާނެ ކަމެއް ކަމަށް ޑރ. ޗުއާ ފާހަގަކުރިއެވެ.
ސިއްހަތަށް ފައިދާހުރި ބަދަލުތައް ގެނައުން: ޑރ. ރެޖީނާ ބުނި ގޮތުގައި މާބަނޑު ދުވަސްވަރު ވަރުބަލިވުމަކީ ބައެއް ފަހަރު ދަގަނޑުގެ ބައި މަދުވުމުން ދިމާވާ ކަމެކެވެ. އެހެންކަމުން ޕްރޮޓީން އަދި ދަގަނޑު އެކުލެވޭ ކާނާ ކެއުމާއި ކަސްރަތު ކުރުމަކީ ނަފުސާނީ ދުޅަހެޔޮކަމަށް ވެސް މުހިންމު ކަމެކެވެ.
މާބަނޑު ދުވަސްވަރު މައިމީހާގެ ނަފުސާނީ ދުޅަހެޔޮކަމަކީ މުހިންމު ކަމެކެވެ. ނަމަވެސް އެއީ ހަމައެކަނި މައިމީހާގެ ޒިންމާއެއް ނޫނެވެ. އާއިލާއާއި ފިރިމީހާގެ ފަރާތުން ލިބޭ އަމަލީ އެހީތެރިކަމާއި، އިހުސާސްތައް ބަލައިގަތުމަކީ މާބަނޑު މީހާއަށް ލިބޭނެ އެންމެ ބޮޑު ހިތްހަމަޖެހުމެވެ. "ސްޓްރެސް ނުވާށޭ" ބުނުމުގެ ބަދަލުގައި، އަމަލީ ގޮތުން އެހީތެރިކަން ފޯރުކޮށްދިނުމަކީ މާބަނޑު މީހާއަށް މާ ފައިދާހުރި ކަމެކެވެ.