އަޅުގަނޑު ދެކޭގޮތުގައި، ހަގީގީ މާނައިގައި ތަރައްގީވެފައިވާ މުޖުތަމައަކީ ހަމައެކަނި އެތަނެއްގެ މަގުތަކާއި ގޮނޑުދޮށްތަކާއި އާންމު މައިދާންތަކާއި ބާއްވާ ހަރަކާތްތަކަކުން އެކަނި ކަނޑައެޅޭނެ އެއްޗެއް ނޫނެވެ. އެއަށްވުރެ ބޮޑަށް އެކަން ކަނޑައެޅެނީ، އެ މުޖުތަމައެއްގައި ދަތިހާލުގައި އުޅޭ މީހުން ދެނެގަނެ، އެމީހުންގެ އަޑުއަހާ، އެމީހުންނަށް އެހީތެރިކަން ފޯރުކޮށްދޭ މިންވަރެއްގެ މައްޗަށެވެ.
ދާދިފަހުން އަޅުގަނޑަށް ކުރެވުނު ތަޖުރިބާއެއްގެ ސަބަބުން، އިޖުތިމާއީ އަޅާލުމާއި އެހީތެރިކަމާމެދު އިތުރަށް ވިސްނާލުމަށް މަޖުބޫރުވިއެވެ. ސަބަބަކީ މުޖުތަމަޢަކީ ހަމައެކަނި އެއްތަނެއްގައި އެކުގައި ދިރިއުޅޭ ބަޔަކަށް ނުވާކަމެވެ.
މުޖުތަމައެއްގެ އެންމެ މުހިންމު އެއް ޒިންމާއަކީ، ނާޒުކު ހާލަތުގައި ދިރިއުޅޭ، ނުވަތަ ދަތިއުނދަގޫ ހާލަތްތަކާއި ކުރިމަތިލާންޖެހިފައިވާ މީހުން އެކަހެރިކޮށްލާ، އެމީހުން އެކަނިމާއެކަނި އެމީހުންގެ ތުރާތަކާ ކުރިމަތިލާން ދޫކޮށް ނުލުމެވެ.
އަޅުގަނޑުމެންގެ މުޖުތަމައުގައި މި ޒިންމާއަކީ ހަމައެކަނި ވަކި މުއައްސަސާއަކަށް ނިސްބަތްކުރެވޭނެ ކަމެއް ނޫނެވެ. ސަރުކާރުގެ އިދާރާތަކާއި ކައުންސިލްތަކާއި މަދަނީ ޖަމްއިއްޔާތަކަކީ މީގެ ތެރޭގައި ހިއްސާވާ ބައިވެރިންނެވެ. އަދި މި ފަރާތްތަކުން މިދެންނެވިފަދަ އިޖުތިމާޢީ އަޅާލުމާއި އެހީތެރިކަން ފޯރުކޮށްދިނުމުގައި ގުޅިގެން މަސައްކަތްކުރަންޖެހެއެވެ.
އެކަމަށްބޭނުންވާ ވަސީލަތްތަކާއި މައުލޫމާތާއި ޚިދުމަތްދިނުމުގެ އިންތިޒާމުތަކާއި ނާޒުކުހާލަތްތަކުގައި ދިރިއުޅޭ ފަރާތްތަކުގެ މައުލޫމާތު، އެފަރާތްތަކަށް ލިބިފައި ހުންނާތީއެވެ. އެހެންނަމަވެސް، ވަރަށްގިނަފަހަރަށް އެހީތެރިކަން ބޭނުންވާ މީހާއަށް އިސްކަންދީގެން – ގުޅިގެން ކަންކަން ރާވާނެ ހަރުދަނާ ނިޒާމެއް ހަރުދަނާގޮތެއްގައި ތަރުތީބުކުރެވިފައި ނެތުމުގެ ސަބަބުން، ނާޒުކު ހާލަތްތަކުގައި އުޅޭ ފަރާތްތައް އިތުރަށް ނިކަމެތިވެގެން ދެއެވެ. މިއީ އަޅުގަނޑުގެ ތަޖުރިބާއިން ފާހަގަވި އެއްކަމެވެ.
މިކަން އެންމެ މުހިންމުވަނީ ނަފްސާނީ ދުޅަހެޔޮކަމާ ގުޅޭގޮތުން ވާހަކަދައްކާއިރުއެވެ.
ނަފްސާނީގޮތުން އެތަކެއް ގޮންޖެހުންތަކެއް ތަހައްމަލުކުރަމުންދާ، މީހުންގެ ފުރައްސާރައާއި ނުރުހުމާއި އެކަހެރިކަން ތަޖުރިބާކުރަން ޖެހިފައިވާ އެތައް ބަޔަކު އަޅުގަނޑުމެންގެ މުޖުތަމައުތަކުގައި އެބައުޅެއެވެ. މިގޮތުން ކުރިމަތިލާންޖެހޭ މަލާމާތާއި އެނޫންގޮތްގޮތަށް ކުރިމަތިވާ ހިތްދަތިކަމާހެދި ބައެއް މީހުންގެ ހާލަތު އިތުރަށް ގޯސްވެގެން ދާތަން ވެސް އާދެއެވެ. އުތުރުގެ ރަށެއްގެ ޒުވާން މަންމައަކު ނަފްސާނީބައްޔަށް ކެތްނުކުރެވި އެންމެ ފަހުން ދުނިޔެއަޅާދިޔައީވެސް ދާދި ފަހަކުންނެވެ.
އަޅުގަނޑުމެންގެ ކުރިމަތީގައި އޮތް ހިތްދަތި ހަގީގަތަކީ – ބައެއް ފަހަރު، މުޖުތަމައުގެ އަޅާލުމާއި ލޯތްބަށް އެންމެ ބޮޑަށް ބޭނުންޖެހިފައިވާ މީހުންނަކީ މުޖުތަމައުން އެންމެ ބޮޑަށް އެކަހެރިކޮށްލާ ބާކީކޮށްލާ މީހުންކަމުގައިވުމެވެ.
މިއީ އަޅުގަނޑުމެން ފުންކޮށް ވިސްނާލަންޖެހޭ ކަމެއްކަމުގައި އަޅުގަނޑު ދެކެމެވެ.
ނަފްސާނީ ގޮތުން ނާޒުކު ހާލަތެއްގައި އުޅޭ މީހަކަށް އެންމެ ހައްގުވަނީ އެހެންމީހުންގެ ފާޑުކިޔުމާއި ނުރުހުމެއް ނޫނެވެ. އެމީހުންގެ ހިތްދަތި އިހުސާސްތަކުގެ އަޑުއަހާލާނެ އިތުބާރު ކުރެވޭ އަދި އަޅާލާ އޯގާތެރި މީހަކު އެމީހުނަށް ބޭނުންވެއެވެ.. އެމީހުންނަކީވެސް މުޖުތަމައުގެ މުހިންމު ބައެއްކަން އިހުސާސްކޮށްދޭނެ މީހެކެވެ.
ނަމަވެސް، މިހާލަތުގައި އުޅޭ މީހުންގެ އަޑުއަހާލުމުން އެގެނީ – އެމީހުންގެ އަޑުއަހާނެ، އަޅާލާނެ އަދި އެހީތެރިވާނެ މީހަކު ނެތްކަމުގެ ހިތްދަތި އިހުސާސްތަކުގެ ތެރޭގައި އެެމީހުން ދުވަސްތައް ގުނަމުންދާކަމެވެ.
އިޖުތިމާއީ އެހީތެރިކަމަކީ ހަމައެކަނި ފައިސާއިން ފުރިހަމަކުރެވޭ ކަމެއް ނޫނެވެ. އެއީ ދޭތެރެއަކުން ހާލު ބަލާލުން ފަދަ ކުޑަކުޑަ ކަމަކުން ފެށޭކަމެކެވެ.
ފާޑުކިޔުމެއްނެތި އަޑުއަހާނެ މީހަކުހުރުމާއި، ހިދުމަތެއް ހޯދުމުގައި އެހީތެރިވުމާއި ޑޮކްޓަރަށް ދެއްކުމަށް އެކުގައި ގޮސްދޭނެ މީހަކު ހުރުމާއި، ބޭނުންޖެހޭ ވަގުތު އެހީތެރިވާނެ މީހަކު ހުރިކަން އިހުސާސް ކުރެވުމަކީ އިޖުތިމާއީ އެހީތެރިކަމާއި އަޅާލުމުގެ ތެރޭގައި ހިމެނޭ ކަންކަމެވެ. މިފަދަ ހިތްވަރާއި އަޅާލުމަކީ، އެކަނިވެރިވެފައިވާ މީހަކަށް ދިރިއުޅުމުގެ އުންމީދު އާކޮށްދިނުމުގައި މުހިންމެ ކަމެކެވެ.
މިއީ އަޅުގަނޑުމެންގެ ކައުންސިލްތަކަށާއި ހޮސްޕިޓަލްތަކާއި ފުލުސްއޮފީހާއި މިނޫންވެސް ރަށު ފެންވަރުގެ މުއައްސަސާތަކަށް މުހިންމު ދައުރެއް އަދާކުރެވިދާނެ ދާއިރާއެކެވެ.
ރަށުގެ ނާޒުކުހާލަތުގައި އުޅެންޖެހިފައިވާ ފަރާތްތަކަށް ދިމާވާ ގޮންޖެހުންތައް އެންމެ ރަނގަޅަށް އެނގޭނީ ކައުންސިލްތަކަށެވެ. އެހެންކަމުން، މުބާރާތްތައް ބޭއްވުމާއި އިމާރާތްތަކާއި މައިދާންތަކާއި މަގުތަކާއި ބަނދަރު ބެލެހެއްޓުމުން ފަދަ ކަންކަމަށް އެކަނި ޚާއްޞަވުމުގެ ބަދަލުގައި، ނާޒުކު ހާލަތްތަކުގައި އުޅޭ ފަރާތްތަކަށް އެހީތެރިކަން ފޯރުކޮށްދީ އަޅާލުމުގެ ނިޒާމެއް ގާއިމުކުރުމުގެ ދައުރަކީ ވެސް ކައުންސިލްތަކުން އިސްނަގައިގެން ކުރަންޖެހިފައިވާ މުހިންމު މަސައްކަތެކެވެ. ކައުންސިލްތަކުން މިކަންކުރުމަށް ބޭނުންވާ ވަސީލަތްތަކާއި ޖާގައާއި ސިޔާސަތުތައް ސަރުކާޜުން އެކަށައަޅާ ތަންފީޒުކުރަން ޖެހެއެވެ.
ކުޅިވަރާއި މުނިފޫހިފިލުވުމާއި މުބާރާތްތަކާއި ރަށުގެ ޒީނަތްތެރިކަމާއި ރީތިގޮނޑުދޮށްތަކަކީ – މުޖުތަމައަށް އުފާވެރިކަމާއި ދިރުން ގެނެސްދޭނެ ކަންކަމެވެ.
ހަމައެފަދައިން، ގޭގޭގެ ހަތަރުފާރުން އެތެރޭގައި ހިތްދަތިކަމުގައި އުޅޭ މީހާއަށް އަޅާލުމަކީ މުޅި މުޖުތަމައުގެ އުފާވެރިކަމާއި ފާގަތިކަން ފުރިހަމަކޮށްދޭނެ ކަންކަމެކެވެ. ސަބަބަކީ މުޖުތަމައުގެ ހަގީގީ ތަރައްގީއަކީ ހަމައެކަނި ބޭރުފުށަށް ފެންނަ ޒީނަތްތެރިކަން އެކަނިކަމުގައި ނުވާތީއެވެ.
މަގުތަކާއި އިމާރާތްތަކާއި ކުޅިވަރު ދަނޑުތަކުގެ އިތުރުން، އިންސާނީ ކަރާމާތާއި ރައްކާތެރިކަމާއި ނަފްސާނީ ދުޅަހެޔޮކަމާއި ނިކަމެތިންނަށް އެހީތެރިވާނެ ނިޒާމުތައް ގާއިމުކުރުމަކީ ތަރައްގީގެ ބައެއްގެ ގޮތުގައި އަޅުގަނޑުމެން ދެކިގެން މެނުވީ ހަގީގީ ތަރައްގީއަށް އަޅުގަނޑުމެންނަށް ވާސިލެއް ނުވެވޭނެއެވެ.
ދާދިފަހުން އަޅުގަނޑު ވާހަކަދެއްކި ނާޒުކު ހާލަތްތަކުގައި އުޅޭ ބައެއް މީހުންގެ ފަރާތުންވެސް އެންމެ ބޮޑަށް ފާހަގަވި އެއްކަމަކީ، އެމީހުންގެ ނުތަނަވަސްކަމާއި ކެކުޅުންތަކުގެ ވާހަކަ އަޑުއަހާނެ މީހަކު ނެތްކަމަށާއި ބާކީކޮށްލާފައި ތިބި ބައެއްކަމުގައި އެމީހުންކުރާ އިހުސާސެވެ.
ކޮންމެ ފަހަރަކު އެމީހުން ބޭނުންވަނީ ވަގުތުން ހައްލެއް ހޯދައިދިނުމެއް ނޫނެވެ. ތިމަންނަގެ ހިތާމަ ކޮންމެވެސް މީހަކު ބަލައިގަނެ، އެހީތެރިކަމާ ހަމައަށް ގެންދިއުމަށް އެކުގައި ހުންނާނެކަމުގެ ޔަގީންކަމެވެ.
އޯގާތެރި މުޖުތަމައެއްގައި، މީހަކު މާ ބޮޑަށް ހާލުގައި ޖެހެންދެން މަޑެއް ނުކުރާނެއެވެ. ކުރިއަށްލާ ދަތިތައް ދެނެގަނެ، އިހުތިރާމާއެކު އެހީތެރިކަން ފޯރުކޮށްދޭނެއެވެ. އަދި ނިކަމެތިން ފުރައްސާރައާއި މަލާމާތުން ރައްކާތެރިކޮށްދޭނެއެވެ. މިނިޒާމްތައް އަޅުގަނޑުމެންގެ ގާނޫނުތަކުން ވެސް ލާޒިމުކުރެއެވެ. އެކަން ކުރަން އަދިވެސް އަޅުގަނޑުމެން އަހުލުވެރި ނުވަނީއެވެ.
އިޖުތިމާޢީ އެހީތެރިކަމާއި އަޅާލުމަށް ފައްކާވެފައިވާ މުޖުތަމައެއްގައި – މީހުން އެމީހުންގެ އުންމީދުތައް ކަނޑާލުމުގެ ކުރިން އެމީހުންގެ އަޑުއަހާނެއެވެ. އެކަނިވެރިކަން ކެތްނުކުރެވޭ ވަރުވުމުގެ ކުރިން އެމީހުންގެ ހާލު ބަލާނެވެ. އަދި ދިރިއުޅުމުގެ ދަތި ދުވަސްތަކެއް ތަހައްމަލުކުރަން ޖެހޭ އެއްވެސް މީހަކީ މުޖުތަމައަށް ނުފެންނަ ބޭކާރު މީހަކަށް ވެގެންދިޔަނުދޭނެކަން ކަށަވަރުކޮށްދޭނެއެވެ.