މިއަހަރު ބޭއްވި 78 ވަނަ އެމީ އެވޯޑްސް ހަފުލާގައި، އެޕަލް ޓީވީގެ ހޮރޯ-ކޮމެޑީ ސީރީޒް "ވިޑޯސް ބޭ"އިން ޖުމްލަ 14 އެވޯޑު ކާމިޔާބުކޮށް ބޮޑު ކުރިއެރުމެއް ހޯދައިފިއެވެ.
"ލޯ އެންޑް އޯޑާ: އެސްވީޔޫ"ގެ މަޝްހޫރު ތަރި މަރިސްކާ ހާގިޓޭ ހުށަހަޅައިދިން މި ހަފުލާގައި، އެންމެ މޮޅު ޑްރާމާ ސީރީޒްގެ މަގާމު ހޯދާފައިވަނީ އެޗްބީއޯގެ މެޑިކަލް ޑްރާމާ "ދަ ބެއިޓް"އެވެ.
ޕްރައިމްޓައިމް އަދި ކްރިއޭޓިވް އާޓްސް ހަފުލާ ހިމެނޭހެން ޖުމްލަ 19 ނޮމިނޭޝަނާއެކު ވާދަކުރި "ވިޑޯސް ބޭ"އިން ވަނީ އެންމެ މޮޅު ކޮމެޑީ ސީރީޒްގެ އެވޯޑުގެ އިތުރުން މުހިންމު ގިނަ އެވޯޑުތަކެއް ކާމިޔާބުކޮށްފައެވެ. އެގޮތުން، މި ސީރީޒްއިން ކޮމެޑީ ބައިން އެންމެ މޮޅު އެކްޓަރުގެ އެވޯޑު މެތިއު ރީސް ކާމިޔާބުކުރިއިރު، އޭނާ ވަނީ ލިމިޓެޑް ސީރީޒް "ދަ ބީސްޓް އިން މީ"އިން އެންމެ މޮޅު އެކްޓަރުގެ އެވޯޑުވެސް ހޯދައި، އެއް ހަފުލާއެއްގައި ދެ އެވޯޑު ހޯދި އެކްޓަރެއްގެ ގޮތުގައި ތާރީޚުގެ ތެރެއަށް ވަދެފައެވެ. މީގެއިތުރުން "ވިޑޯސް ބޭ"ގެ ޓީމުން ހަތަރު ކެޓަގަރީއަކުން އެވޯޑު ކާމިޔާބުކުރިއިރު އޭގެތެރޭގައި އެންމެ މޮޅު ސަޕޯޓިން އެކްޓްރެސް (ކޭޓް އޯފްލިން)، އެންމެ މޮޅު ސަޕޯޓިން އެކްޓަރު (ސްޓީވަން ރޫޓް)، އެންމެ މޮޅު ޑައިރެކްޓަރު (ހީރޯ މުރާއީ) އަދި އެންމެ މޮޅު ރައިޓަރު (ކޭޓީ ޑިޕޯލްޑް)ގެ އެވޯޑު ހިމެނެއެވެ.
މިއަހަރު ބޭއްވި 78 ވަނަ އެމީ އެވޯޑްސް ހަފުލާ ހުށަހަޅައިދިން، މަރިސްކާ ހާގިޓޭ، "ވިޑޯސް ބޭ" ސީރީޒްއިން އެންމެ މޮޅު ކޮމެޑީ އެކްޓަރުގެ އެވޯޑު ކާމިޔާބުކުރި މެތިއު ރީސް އަދި ކޮމެޑީ ސީރީޒް ބައިން އެންމެ މޮޅު އެކްޓްރެސްގެ އެވޯޑު "ހެކްސް"އިން ކާމިޔާބުކުރި ޖީން ސްމާޓް--ފޮޓޯ/ޕީޕްލްމިއަހަރުގެ އެމީ އެވޯޑްސްގައި 25 ނޮމިނޭޝަނާ އެކު އެންމެ ގިނަ ނޮމިނޭޝަން ލިބުނު "ދަ ބެއިޓް"އިން ވަނީ ޖުމްލަ ހަތް އެވޯޑު ކާމިޔާބުކޮށްފައެވެ. މި ސީރީޒްއިން ޑްރާމާ ބައިން އެންމެ މޮޅު އެކްޓަރުގެ އެވޯޑު ނޯއާ ވައިލީ ކާމިޔާބުކޮށްފައިވަނީ ޖެހިޖެހިގެން ދެވަނަ އަހަރަށެވެ. މިއީ ފާއިތުވި އަހަރާ އަޅާބަލާއިރު އެ ސީރީޒްއަށް ލިބުނު ކާމިޔާބީ ގާތްގަނޑަކަށް ދެގުނައަށް އިތުރުވި އަހަރެކެވެ.
މިއަހަރުގެ އެމީ އެވޯޑްސްގެ އެހެނިހެން ވަކިވަކި ކެޓަގަރީތަކަށް ބަލާއިރު، ޑްރާމާ ސީރީޒްއިން އެންމެ މޮޅު އެކްޓްރެސްގެ އެވޯޑު "ޕްލޫރިބަސް"އިން ރިއާ ސީހޯން ކާމިޔާބުކުރިއިރު، އެ ސީރީޒްގެ ލިޔުންތެރިޔާ ވިންސް ގިލިގަން ވަނީ އެންމެ މޮޅު ރައިޓިންގެ އެވޯޑު ހޯދާފައެވެ. ޑްރާމާ ބައިން ސަޕޯޓިން އެކްޓަރުގެ އެވޯޑު "ޓާސްކް"އިން ޓޮމް ޕެލްފްރީ އަދި ސަޕޯޓިން އެކްޓްރެސްގެ އެވޯޑު "ދަ ޑިޕްލޮމެޓް"އިން އެލިސަން ޖެނީ ހޯދިއިރު، ޑްރާމާ ސީރީޒްގެ އެންމެ މޮޅު ޑައިރެކްޓަރަކަށް ހޮވުނީ "ސްލޯ ހޯސަސް"ގެ ސޯލް މެޓްޒްސްޓެއިންއެވެ.
ޝައުގުވެރި މުނިފޫހިފިލުވުމުގެ ގިނަ ހަރަކާތްތަކަކާއެކު ކުރިއަށްދިޔަ މިއަހަރުގެ ހަފުލާގެ ހާއްސަ ކަމެއްގެ ގޮތުގައި، ހުށަހެޅުންތެރިޔާ މަރިސްކާ ހާގިޓޭއާއެކު މަޝްހޫރު ލަވަކިޔުންތެރިއާ ޓޭލާ ސްވިފްޓް ވަނީ "އެސްވީޔޫ އިން އިންސްޕަޔާވެގެން ތައްޔާރުކުރި ކުރު ސްކެޗެއްގައި ބައިވެރިވެފައެވެ.