ސ. ފޭދޫ ސްކޫލުގައި ކުރިއަށްދާ ކެޑޭޓް ކޭމްޕެއްގެ ތެރެއިން ހޮޑުލުމާއި ބޭރަށްހިންގުމުގެ އަލާމާތްތައް ފެނިގެން ގިނަ އަދަދެއްގެ ދަރިވަރުންތަކަކަށް އެޑްމިޓްކޮށްގެން ފަރުވާ ދޭން ފަށައިފިއެވެ.
އައްޑޫ އިކުއިޓޯރިއަލް ހޮސްޕިޓަލުން "ސަން" އަށް މައުލޫމާތު ދިން ގޮތުގައި، މި މައްސަލައިގައި ޖުމްލަ 31 ކުއްޖަކު ވަނީ ސިއްހީ ފަރުވާއަށް ގެންގޮސްފައެވެ.
އެގޮތުން ފޭދޫ ސިއްހީ މަރުކަޒުގައި 12 ކުދިންނަށް އަދި މަރަދޫ ސިއްހީ މަރުކަޒުގައި 12 ކުދިންނަށް އެޑްމިޓްކޮށްގެން ފަރުވާ ދެމުން އަންނަ އިރު، އައްޑޫ އިކުއިޓޯރިއަލް ހޮސްޕިޓަލަށް ހަތް ކުއްޖަކު ގެންގޮސް ފަރުވާ ދެމުން އަންނަ ކަމަށް ބުންޏެވެ.
މައުލޫމާތު ދިން ބެލެނިވެރިއަކު ބުނި ގޮތުގައި، މި ހާދިސާގައި ބަލިވެގެން ފަރުވާ ދެމުން އަންނަނީ އެ ސްކޫލުގެ ގްރޭޑް 7 އަދި 8 ގެ ދަރިވަރުންތަކަކަށެވެ.
ހޮސްޕިޓަލުން ބުނި ގޮތުގައި ފަރުވާ ދެމުންދާ ކުދިންގެ ފަރާތުން ފެންނަމުންދާ މައިގަނޑު އަލާމާތްތަކަކީ ބޭރަށްހިންގުމާއި، ހޮޑުލެވުމުގެ އިތުރުން ބަނޑުގައި ރިއްސުމެވެ.
ނަމަވެސް އެއްވެސް ކުއްޖެއްގެ ހާލު ސީރިއަސް ނޫން ކަމަށާއި، ފަރުވާ ދެމުންދާ ވަރަކަށް ކުދިންގެ ހާލަތު މަޑުމަޑުން ރަނގަޅުވަމުން އަންނަ ކަމަށް ވެސް ހޮސްޕިޓަލުން މައުލޫމާތު ދެއެވެ.
މި ކުދިންނަށް މިފަދަ ހާލަތެއް މެދުވެރިވާން ދިމާވި ސަބަބެއް އަދި ސާފެއް ނުވެއެވެ.
މި ހިނގާ ހަފުތާގެ ހޮނިހިރު ދުވަހުން ފެށިގެން ރާއްޖޭގެ އެކި ކަންކޮޅުތަކުގެ ސްކޫލުތަކުގައި ކެޑޭޓާއި އެހެނިހެން ޔުނިފޯމް ހަރަކާތްތަކުގެ ކޭމްޕްތައް އަންނަނީ ބާއްވަމުންނެވެ.