އެޕަލް ކުންފުނިން ދެން އެންމެ އަވަހަށް ބާޒާރަށް ނެރުމަށް ތައްޔާރުވަމުން އަންނަ އާ ޖީލުގެ އެޕަލް ޓީވީ 4ކޭގައި ސިރީ އޭއައި ހިމެނޭ ގޮތަށް މަދުވެގެން އައު ފަސް ފީޗާއެއް ފެނިގެންދާނެ ކަމަށް ލީކުވެފައިވާ މައުލޫމާތުތަކުން ހާމަވެއްޖެއެވެ.
މި އާ ޑިވައިސްގައި އޭ17 ޕްރޯ ޗިޕް ނުވަތަ އެއަށްވުރެ ފަހުގެ ޕްރޮސެސަރަކާއި، ރެމް ބޮޑުކުރުމާއި، ސިރީ އޭއައިގެ ސަޕޯޓާއި، އެޕަލްގެ އަމިއްލަ އެން1 ވައިފައި 7 ޗިޕްގެ އިތުރުން އަޕްގްރޭޑްކޮށްފައިވާ އާ ސިރީ ރިމޯޓެއް ހިމެނޭނެ ކަމަށް ރިޕޯޓްތައް ބުނެއެވެ.
މިހާރު ބޭނުންކުރާ އެޕަލް ޓީވީގައި ހިމެނޭ އޭ15 ބަޔޮނިކް ޗިޕްގެ ބަދަލުގައި، އާ މޮޑެލްގައި އޭ17 ޕްރޯ ނުވަތަ އޭ18 ޕްރޯ ނޫންނަމަ އޭ19 ޕްރޯ ޗިޕެއް ހިމެނުމަށް ދަނީ ވިސްނަމުންނެވެ. މި ބަދަލާއެކު ގޭމް ކުޅުމަށް ބޭނުންވާ ގްރެފިކްސް ރެންޑަރިންއަށް ހާޑްވެއާ-އެކްސެލެރޭޓެޑް ރޭ ޓްރޭސިން ލިބިގެންދާނެ ކަމަށާއި، މިހާރު ހުރި 4 ޖީބީގެ ރެމް މަދުވެގެން 8 ޖީބީއަށް އިތުރުކުރެވިގެންދާނެ ކަމަށް ބެލެވެއެވެ.
އަލަށް ނެރޭ އެޕަލްޓީވީގައި އެޕަލް އިންޓެލިޖެންސްގެ ބާރުގަދަ 'ސިރީ އޭއައި' ފީޗާތައް ބޭނުންކުރެވޭނެ --
މި އިތުރުކުރެވޭ މެމޮރީއާއެކު، އަލަށް ތައާރަފްކުރާ ޓީވީއޯއެސް 27 މެދުވެރިކޮށް އެޕަލް އިންޓެލިޖެންސްގެ ބާރުގަދަ 'ސިރީ އޭއައި' ފީޗާތައް ބޭނުންކުރެވޭނެ މަގު ތަނަވަސްވެގެންދާނެއެވެ.
އެޕަލްގެ އެތެރޭގެ ކޯޑުތަކުން ފެނިފައިވާ މައުލޫމާތުތަކަށް ބަލާއިރު، މިއީ ހަމައެކަނި ސިސްޓަމް ފަންކްޝަނެއްގެ ގޮތުގައި ނުވަތަ އެޕަލް ޓީވީއަށް ޚާއްސަ ވަކި ސިރީ އެޕެއްގެ ގޮތުގައި ވެސް ތައާރަފްކުރެވިދާނެ ފީޗާއެކެވެ.
މީގެއިތުރުން، އެޕަލްގެ އެންމެ ފަހުގެ ޑިވައިސްތަކުގައި ބޭނުންކުރާ އަމިއްލަ އެން1 ޗިޕް މެދުވެރިކޮށް ވައިފައި 7 އާއި ބްލޫޓޫތު 6 ގެ ސަޕޯޓް ލިބިގެންދާނެއެވެ. މީގެ ސަބަބުން 2.4 ގިގަހާޓްޒް، 5 ގިގަހާޓްޒް އަދި 6 ގިގަހާޓްޒް ބޭންޑުތައް އެއްފަހަރާ ބޭނުންކޮށްގެން މާ ބާރުމިނުގައި އަދި ލޭޓެންސީ ކުޑަކޮށް މުވާސަލާތުކުރުމުގެ ފުރުސަތު ލިބި، ކުރީގެ މޮޑެލްތަކަށްވުރެ އިންޓަނެޓް ގުޅުން ވަރުގަދަވެގެންދާނެއެވެ.
ޑިޒައިނަށް ބަލާއިރު މިހާރުގެ މޮޑެލްއާ އެއްގޮތް ސިފަތަކެއް ހުންނާނެ ކަމަށް ބެލެވޭއިރު، ފޭސްޓައިމް އަދި ޖެސްޗާ ކޮންޓްރޯލަށް ބޭނުންކުރެވޭ ކެމެރާއެއް އެޕަލް ޓީވީއަށް ގެނައުމާމެދު ކުރިން މަޝްވަރާކުރެވިފައި ވީނަމަވެސް މި މޮޑެލްގައި އެފަދަ ކެމެރާއެއް ހިމަނާނެ ކަމުގެ ޔަގީންކަމެއް އަދި ނެތެވެ.
މިހާރުވެސް ކޮންޓިނިއުޓީ ކެމެރާ މެދުވެރިކޮށް އައިފޯން ނުވަތަ އައިޕެޑް ބޭނުންކޮށްގެން ޓީވީން ފޭސްޓައިމް ކޯލް ކުރެވޭއިރު، ޓީވީއޯއެސް 26 އަދި 27 ގައި ވަނީ ކޮންޓެކްޓް ޕޯސްޓަރުތަކާއި އެކި ބަސްބަހުން ލައިވް ކެޕްޝަން ދެއްކުން ފަދަ ގިނަ ފަސޭހަތަކެއް ގެނެސްދީފައެވެ.
އާ އެޕަލް ޓީވީ 4ކޭ ރަސްމީކޮށް ދައްކާލާނީ މިއަހަރުގެ ސެޕްޓެމްބަރު ނުވަތަ އޮކްޓޯބަރު މަހު ބާއްވާ އެޕަލްގެ ޚާއްސަ ހަފްލާގައެވެ. މި ހަފްލާގައި އާ ސްމާޓް ހޯމް ހަބަކާއި އަޕްޑޭޓްކޮށްފައިވާ ހޯމްޕޮޑް މިނީ ވެސް ދައްކާލުމަށް ވަނީ ހަމަޖެހިފައެވެ.
އެންމެ ފަހުން 2022 ގައި އެޕަލް ޓީވީ ނެރުނު ފަހުން އަގުތައް މައްޗަށް ގޮސްފައިވާއިރު، މިހާރު އެމެރިކާ ބާޒާރުގައި 64 ޖީބީ ވައިފައި މޮޑެލް 199 ޑޮލަރަށް އަދި 128 ޖީބީ ވައިފައި + އީތަނެޓް މޮޑެލް 249 ޑޮލަރަށް ލިބެން ހުރިއިރު، އާ މޮޑެލްގެ އަގު މި ރޭންޖުގައި ހުންނާނެތޯ ނުވަތަ އަގު ބޮޑުވާނެތޯ އަދި ސާފެއް ނުވެއެވެ.