އެމެރިކާގެ 30 އަހަރުގެ ޓްރެޝަރީ ބޮންޑުގެ އިންޓަރެސްޓް ރޭޓް ނުވަތަ ޔީލްޑް 5.327 ޕަސެންޓަށް އުފުލި، ފާއިތުވި 19 އަހަރުގެ ތެރޭގައި ނުދާހާ މައްޗަށް އަރައިފިއެވެ.
މިއީ 2007 ވަނަ އަހަރަށް ފަހު މި ރޭޓް މިހާ މައްޗަށް ދިޔަ ފުރަތަމަ ފަހަރެވެ.
ރޮއިޓާސްއިން ރިޕޯޓުކޮށްފައިވާ ގޮތުގައި، މި ބަދަލު އައިސްފައިވަނީ އެމެރިކާއާއި އީރާނާ ދެމެދު ހިނގަމުންދާ ހަނގުރާމަ ހުއްޓާލުމަށް ކުރެވޭ މަޝްވަރާތައް މަޑުޖެހި، ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެންނެވެ. މީގެ އިތުރުން، އެމެރިކާގެ އިގުތިސާދީ ދުވެލި މަޑުޖެހިފައިވާކަން ދައްކާ ތަފާސްހިސާބުތަކާ ގުޅިގެން، މަރުކަޒީ ބޭންކުން އިންޓަރެސްޓް ރޭޓް މައްޗަށް ޖައްސާނެ ކަމަށް ކުރިން ލަފާކުރި މިންވަރު ވިޔަފާރިވެރިން ވަނީ ދަށްކޮށްފައެވެ.
އެމެރިކާގެ 10 އަހަރުގެ ޓްރެޝަރީ ނޯޓުގެ ޔީލްޑް ވެސް ވަނީ 1.7 ބޭސިސް ޕޮއިންޓް އުފުލި، 4.739 ޕަސެންޓަށް އަރާފައެވެ. އެމެރިކާގެ އިތުރުން ދުނިޔޭގެ އެހެން ބޮޑެތި އިގުތިސާދުތަކުގެ ބޮންޑު މާކެޓަށް ވެސް މި ބަދަލު އަންނަމުންދާ ކަމަށް މާލީ އިދާރާތަކުން ބުނެއެވެ. އެގޮތުން ޖަޕާނުގެ 10 އަހަރުގެ ސަރުކާރު ބޮންޑުގެ ޔީލްޑް ފާއިތުވި 30 އަހަރުގެ ތެރޭގައި އެންމެ މައްޗަށް އަރާފައިވާއިރު، ޖަރުމަނުވިލާތުގެ 10 އަހަރުގެ ބޮންޑު ޔީލްޑް ވަނީ 2011 ވަނަ އަހަރުގެ މެއި މަހަށް ފަހު އެންމެ މައްޗަށް ގޮސްފައެވެ. އަދި ފަރަންސޭސިވިލާތުގެ 10 އަހަރުގެ ބޮންޑު ޔީލްޑް ވަނީ 17 އަހަރުގެ ތެރޭގައި ނުދާހާ މައްޗަށް އުފުލިފައެވެ. ހަމައެއާއެކު، ޖަރުމަނުވިލާތާއި ފަރަންސޭސިވިލާތުގެ ބޮންޑު ފިއުޗާސް ވަނީ 0.2 ޕަސެންޓް ދަށަށް ގޮސްފައެވެ.
ބޮންޑުގެ ރޭޓުތައް މައްޗަށް ދިއުމުގެ މައިގަނޑު ސަބަބެއް ކަމަށް އިންވެސްޓަރުން ފާހަގަކުރަނީ އިންފްލޭޝަން މައްޗަށް ހިނގައިދާނެ ކަމުގެ ބިރު އޮތުމެވެ. ޚާއްސަކޮށް ދުނިޔޭގެ ތެލުގެ ވިޔަފާރިއަށް މުހިންމު ހޮރުމުޒް ކަނޑުއޮޅި ބަންދުވެފައި އޮތުމާއި، އެމެރިކާއާއި އީރާނުގެ މައްސަލައަށް ހައްލެއް ނުލިބުމުގެ ސަބަބުން ސާފުނުކުރާ ތެޔޮ ފީފާއެއްގެ އަގު ވަނީ 90 ޑޮލަރަށް ވުރެ މައްޗަށް އަރާފައެވެ.
ޖޫން މަހު ވެފައިވާ ހަމަލާތައް މެދުކަނޑާލުމުގެ އެއްބަސްވުމުގެ މުއްދަތު އިތުރުނުކުރަން އެމެރިކާއިން ނިންމުމާ ގުޅިގެން، އީރާނުން ފުރިހަމަ އަސްކަރީ ހަމަލާގެ ހާލަތަކަށް ބަދަލުވާނެ ކަމަށް އެ ގައުމުގެ އިސް އޮފިޝަލަކާ ހަވާލާދީ ރޮއިޓާސްއިން ބުނެފައިވެއެވެ. މެކުއަރީ ގްރޫޕްގެ ސްޓްރެޓެޖިސްޓް ތިއެރީ ވިޒްމަން ބުނި ގޮތުގައި، ކުރު މުއްދަތެއްގައި އެންމެ ރަނގަޅު ގޮތަކަށް ވެސް ވާނެ ކަމަށް ބެލެވެނީ ކަނޑުއޮޅީގެ މައްސަލައިގައި ތެޔޮ ސަޕްލައިކުރުން ހުއްޓިފައި އޮތުމެވެ. އަދި އެންމެ ގޯސް ހާލަތެއްގައި އަލުން ހަމަލާބަދަލުކުރަން ފެށުން އެކަށީގެންވާ ކަމަށް އޭނާ ފާހަގަކުރިއެވެ.
މީގެ އިތުރުން، އެމެރިކާ ސަރުކާރުގެ ދަރަނި ބޮޑުވަމުންދާތީ އެކަމުގެ ކަންބޮޑުވުން ވެސް މާކެޓުގައި އެބައޮތެވެ. އޯސީބީސީގެ އިންވެސްޓްމަންޓް ސްޓްރެޓެޖީގެ މެނޭޖިން ޑިރެކްޓަރު ވަސޫ މެނަން ބުނި ގޮތުގައި، އާޓިފިޝަލް އިންޓެލިޖެންސް (އޭއައި) ކުންފުނިތަކުން ގިނަ އަދަދަކަށް ލޯނު ނެގުމާއި، އެމެރިކާގެ ބަޖެޓް ޑެފިސިޓް ބޮޑުވުމުގެ އިތުރުން ފެޑެރަލް ރިޒާވްގެ ޗެއާމަން ކެވިން ވޯޝްގެ ސިޔާސަތުތައް ހާމަކަން ބޮޑު ގޮތެއްގައި ކުރިއަށް ނުގެންދިއުމަކީ ވެސް ޔީލްޑް މައްޗަށް ދިއުމަށް މެދުވެރިވާ ސަބަބުތަކެވެ.
އެހެންކަމުން، މި ހިރާސްތަކުން ސަލާމަތްވުމަށްޓަކައި ކުރު މުއްދަތުގެ ބޮންޑުތަކަށް އިންވެސްޓަރުން އިސްކަންދިނުމަށް އޭނާ ލަފާދިނެވެ. އެމެރިޕްރައިސް ފައިނޭންޝަލްގެ ޗީފް މާކެޓް ސްޓްރެޓެޖިސްޓް އެންތަނީ ސަގްލިމްބޭން ފާހަގަކުރި ގޮތުގައި، ފާއިތުވި 15 ވަރަކަށް އަހަރު އިންވެސްޓަރުން މަސައްކަތްކުރީ އިންޓަރެސްޓް ރޭޓުތައް ދަށްކޮށް އޮތް މާހައުލެއްގައެވެ. ނަމަވެސް ދާދި ފަހުން އެމެރިކާގެ 10 އަހަރުގެ ނޯޓު 4.683 ޕަސެންޓުގައި އަދި 30 އަހަރުގެ ބޮންޑު 5.216 ޕަސެންޓުގައި ވިއްކާފައިވުމަކީ މާކެޓުގެ މިސްރާބު ބަދަލުވަމުންދާ ކަމުގެ ހެއްކެއް ކަމަށް އޭނާ ބުންޏެވެ.