މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ 22 އުޅަނދު ހަވާލުކޮށްފިއެވެ.
އެންވަޔަރަންމަންޓް މިނިސްޓްރީން މިއަދު އާންމުކުރި މައުލޫމާތުގައި ބުނެފައިވާ ގޮތުން، މީގެ ތެރޭގައި ހިމެނެނީ 10 ރަށު ޕިކަޕާއި، 350 ކިލޯގެ ބަރުދަން އުފުލޭ 12 ޕިކަޕް ޓްރަކެވެ.
މި އުޅަނދުތައް ވެމްކޯއާ ހަވާލުކޮށްފައިވަނީ އެ ކުންފުނިން ރަށްރަށުގައި ފަށަން ތައްޔާރުވަމުންދާ ކުނި އުފުލުމުގެ މަސައްކަތްތަކަށް ބޭނުންވާ ވަސީލަތްތައް ހަމަކުރުމުގެ ގޮތުންނެވެ.
މި އުޅަނދުތަކަކީ ރާއްޖޭގެ އެކި ކަންކޮޅުތަކުގައި ވެމްކޯއިން ދެމުންގެންދާ ޚިދުމަތްތައް އިތުރަށް ހަރުދަނާކޮށް، އައު ސަރަހައްދުތަކަށް ޚިދުމަތް ފުޅާކުރުމަށް ބޭނުންވާ ވަސީލަތްތައް ފޯރުކޮށްދިނުމުގެ ގޮތުން ހޯދާފައިވާ އުޅަނދުތަކެކެވެ. އެންވަޔަރަންމަންޓް މިނިސްޓްރީން މައުލޫމާތު ދިން ގޮތުގައި، މި ޕިކަޕްތައް މައިގަނޑު ގޮތެއްގައި ބޭނުންކުރުމަށް ހަމަޖެހިފައިވަނީ އަތޮޅުތަކުގެ ވެރިކަންކުރާ ރަށްރަށާއި، އާބާދީ ބޮޑެތި އާބަން ސެންޓަރުތަކުގައެވެ.
ރަށު ޕިކަޕްތަކަކީ ރަށްރަށުގެ ހަނި މަގުތަކުގައި ދުއްވުމަށާއި ގޭބިސީތަކުން ކުނި ނެގުމަށް އެންމެ އެކަށީގެންވާ ގޮތަށް ފަރުމާކޮށްފައިވާ އުޅަނދުތަކެކެވެ. އަދި 350 ކިލޯގެ ކެޕޭސިޓީ ހުންނަ ޕިކަޕް ޓްރަކްތައް ބޭނުންކުރާނީ ގިނަ އަދަދެއްގެ ކުނި އެއްފަހަރާ އުފުލުމަށާއި، ރަށުގެ އެކި ސަރަހައްދުތަކުން ކުނިކޮށިތަކަށް ކުނި ޖަމާކުރުމުގެ މަސައްކަތަށެވެ.
މީގެ އިތުރުން، ވިޔަފާރިތަކާއި އާންމު މުއައްސަސާތަކުން އުފެދޭ ކުނި ގަވާއިދުން ނެގުމުގެ އިންތިޒާމުވެސް މި އުޅަނދުތަކުގެ އެހީގައި ހަމަޖެހިގެންދާނެ ކަމަށް އެ މިނިސްޓްރީން ފާހަގަކުރިއެވެ. މި ވަސީލަތްތަކާއެކު، ރަށްރަށުގައި ކުނި މެނޭޖުކުރުމަށް ދިމާވެފައިވާ ދަތިތަކަށް ބޮޑު ހައްލެއް ލިބި، މަގުމައްޗަށް ކުނި އެޅުން ފަދަ މައްސަލަތައް މަދުކުރެވޭނެ ކަމަށް އެ މިނިސްޓްރީން ބުނެފައިވެއެވެ.
ސަރުކާރުގެ އަމާޒަކީ ރާއްޖޭގެ އެކި ސަރަހައްދުތަކުގައި ވެމްކޯގެ އޮޕަރޭޝަންތައް ފަށައި، ރައްކާތެރި ގޮތުގައި ކުނި މެނޭޖުކުރުމުގެ ޚިދުމަތް މެދުކެނޑުމެއްނެތި ރައްޔިތުންނަށް ފޯރުކޮށްދިނުން ކަމަށް މިނިސްޓްރީން ބުނެއެވެ.
މިހާރުވެސް ވެމްކޯއިން ދަނީ މާލެ ސަރަހައްދުގެ އިތުރުން ބައެއް އަތޮޅުތަކުގައި ކުނި ނެގުމުގެ ޚިދުމަތް ދެމުންނެވެ. ނަމަވެސް، އަތޮޅުތެރޭގެ ގިނަ ރަށްރަށުގައި އެކަށީގެންވާ ވަސީލަތްތައް ނެތުމުގެ ސަބަބުން ކުނި މެނޭޖުކުރުމަށް ވަނީ ބޮޑެތި ގޮންޖެހުންތަކާ ކުރިމަތިވެފައެވެ. އެންވަޔަރަންމަންޓް މިނިސްޓްރީން ބުނި ގޮތުގައި، މި އުޅަނދުތަކުގެ ސަބަބުން ވެމްކޯގެ ޚިދުމަތް އަތޮޅުތަކަށް ފުޅާކުރުމަށް ފަސޭހަވެގެންދާނެއެވެ. އަދި ކުރިއަށް އޮތް ތަނުގައިވެސް އިތުރު ރަށްރަށަށް ބޭނުންވާ ވަސީލަތްތައް ފޯރުކޮށްދިނުމުގެ މަސައްކަތް ސަރުކާރުން ކުރިއަށްގެންދާނެ ކަމަށް އެ މިނިސްޓްރީން ހާމަކުރިއެވެ.