ދެކުނު ކޮރެއާގެ ހެލްތު އެންޑް ވެލްފެއާ މިނިސްޓްރީން އާންމުކުރި ތަފާސްހިސާބުތަކުން ދައްކާ ގޮތުގައި، މިދިޔަ އަހަރު އެ ގައުމުން ސިއްހީ ފަރުވާ ހޯދި ބިދޭސީންގެ އަދަދު 2.01 މިލިއަނަށް އަރައިފިއެވެ.
މިއީ އޭގެ ކުރީ އަހަރާ އަޅައި ބަލާއިރު 71.7 ޕަސެންޓުގެ ކުރިއެރުމެކެވެ.
އެ ގައުމަށް އެންމެ ގިނައިން ސިއްހީ ފަރުވާ ހޯދަން ގޮސްފައިވަނީ ޗައިނާއާއި ޖަޕާނުގެ އިތުރުން ޓައިވާނާއި އެމެރިކާގެ ރައްޔިތުންނެވެ.
ފަތުރުވެރިންގެ މެދުގައި ކޮރެއާގެ މެޑިކަލް ޓޫރިޒަމް މަގުބޫލުވަމުން އަންނަނީ، ޗުއްޓީ ހޭދަކުރުމުގެ ތެރެއިން ފަސޭހަކަމާއެކު ހަށިގަނޑުގެ އެކި ޓެސްޓުތައް ހަދައިލެވޭތީއެވެ. ގިނަ ފަތުރުވެރިން މިހާރު ކޮރެއާއަށް ދަތުރުކުރާއިރު، މަންޒިލްތައް ބަލައިލުމުގެ އިތުރުން ލޭގެ ޓެސްޓުތަކާއި އަލްޓްރާސައުންޑް އަދި އެންޑޯސްކޮޕީ ފަދަ ޓެސްޓުތައް ހެދުމަށް ވަގުތު ކަނޑައަޅައެވެ.
ކްރިއޭޓްރިޕް ފަދަ ޓްރެވަލް ޕްލޭނަރުން ފާހަގަކުރާ ގޮތުގައި، ކޮރެއާގެ ސިއްހީ ނިޒާމަށް ފަތުރުވެރިން ޝައުގުވެރިވާ މައިގަނޑު ސަބަބަކީ އަގުހެޔޮވުމާއި ޚިދުމަތް އަވަސްވުމެވެ. އެމެރިކާ ފަދަ ގައުމުތަކުގައި އެމްއާރްއައިއެއް ހެދުމަށް ހިނގާ ޚަރަދުން، ކޮރެއާގައި މުޅި ހަށިގަނޑުގެ ފުލް ބޮޑީ ޗެކަޕެއް ހެދޭނެ ކަމަށް ކްރިއޭޓްރިޕްގެ ސީއީއޯ ހޭމިން ލީ ވިދާޅުވިއެވެ.
މިދިޔަ އަހަރުގެ ސީއީއޯވޯލްޑް ހެލްތުކެއާ އިންޑެކްސްގައި ދުނިޔޭގެ ދެވަނައަށް އެންމެ ރަނގަޅު ސިއްހީ ނިޒާމު އޮތް ގައުމުގެ ގޮތުގައި ކޮރެއާ ވަނީ ރޭންކުކޮށްފައެވެ. ސަރުކާރުން އަގުތައް ކޮންޓްރޯލްކޮށްފައި އޮތުމުން، ބިދޭސީންނަށް ވެސް އެކަށީގެންވާ އަގެއްގައި ފަރުވާ ލިބެއެވެ. މިސާލަކަށް، ލޭގެ ޓެސްޓާއި، މޭމަތީގެ އެކްސްރޭ، އަލްޓްރާސައުންޑް އަދި އެންޑޯސްކޮޕީ ހިމެނޭ ޕެކޭޖެއް 456،706 ވޮން (ގާތްގަނޑަކަށް 312 ޑޮލަރު) އަށް ހެދޭއިރު، އަންހެނުންނަށް ޚާއްސަ ފުލް ޗެކަޕެއް ޗާ ޔުނިވާސިޓީ މެޑިކަލް ސެންޓަރުން 754،951 ވޮން (ގާތްގަނޑަކަށް 516 ޑޮލަރު) އަށް ހެދެއެވެ. މި ޓެސްޓުތައް ހެދުމަށް ގިނަ ވަގުތު ހޭދަނުވުމަކީ ވެސް ފަތުރުވެރިންނަށް ލިބޭ ބޮޑު ފަސޭހައެކެވެ.
ކޮރެއާގެ ސަރުކާރުން އަންނަނީ މެޑިކަލް ޓޫރިޒަމަކީ އެކްސްޕޯޓް ސިނާއަތެއްގެ ގޮތުގައި ކަނޑައަޅައި، އެކަން ކުރިއެރުވުމަށް ގާނޫނީ ގޮތުން މަސައްކަތްތަކެއް ކުރަމުންނެވެ. މި ދާއިރާ ފުޅާވަމުން އަންނައިރު، ބިދޭސީންނަށް ފަސޭހައިން އެޕޮއިންޓްމަންޓް ހެއްދުމަށާއި ކްލިނިކްތައް ހޯދުމަށް އެހީތެރިވެދޭ ހައިމެޑީ އަދި ކްރިއޭޓްރިޕް ފަދަ މެޑިކަލް ކޮންސިއާޖް ޚިދުމަތްތައް ވަނީ އުފެދިފައެވެ. މި ކުންފުނިތަކުން ފަތުރުވެރިންނަށް ބޭނުންވާ ޕެކޭޖުތައް ހަމަޖައްސައިދީ، ޓެސްޓުތައް ހެދުމަށް ބޭނުންވާ އިރުޝާދުތައް ފޯރުކޮށްދެއެވެ.
ކޮރެއާ މެޑިކަލް އިންސްޓިޓިއުޓް (ކޭއެމްއައި) ގެ ހެޑް އޮފް ޑިވިޝަން ހިޔޮންއާ ހޮންގް ވިދާޅުވި ގޮތުގައި، ކޮރެއާގެ ސިއްހީ ނިޒާމު ބިނާވެފައިވަނީ ބަލިތައް ދުރާލާ ދެނެގަތުމުގެ މައްޗަށެވެ. އެހެންކަމުން، ފަތުރުވެރިންނަށް ވެސް ބަލިތައް އަވަހަށް ދެނެގަނެވޭނެ މާހައުލެއް ވަނީ ގާއިމުކުރެވިފައެވެ. ގިނަ ކްލިނިކްތަކުން އެއް ދުވަހުގެ ތެރޭގައި ހުރިހާ ޓެސްޓެއް ހަދައި ނިންމާލެވޭނެ އިންތިޒާމު ވަނީ ހަމަޖައްސާފައެވެ.
ބިދޭސީންނަށް ދިމާވާ އެންމެ ބޮޑު އެއް ގޮންޖެހުމަކީ ބަހުގެ މައްސަލަ ކަމަށް ވިޔަސް، ކޭއެމްއައި އަދި ސޯލް ނޭޝަނަލް ޔުނިވާސިޓީ ހޮސްޕިޓަލް ފަދަ ތަންތަނުން އިނގިރޭސި ބަހުން ފުރިހަމަ ޚިދުމަތްތައް ފޯރުކޮށްދެއެވެ. އަދި ހައިމެޑީ ފަދަ އެޖެންސީތައް މެދުވެރިކޮށް ތަރުޖަމާނުންގެ އެހީތެރިކަން ވެސް ހޯދެއެވެ.
ޓެސްޓުތަކުގެ ނަތީޖާ އާންމުގޮތެއްގައި ހަތް ދުވަހާއި 14 ދުވަހާ ދެމެދުގެ މުއްދަތެއްގައި އީމެއިލް މެދުވެރިކޮށް ލިބޭއިރު، އެ ނަތީޖާތައް އެކި ބަސްބަހުން ވެސް ލިބެން ހުރެއެވެ. ޓެސްޓަކުން އިތުރު ފަރުވާއެއް ބޭނުންވާ ކަމަށް ދައްކައިފިނަމަ، އެ ކްލިނިކަކާ ގުޅިފައިވާ ބޮޑެތި ހޮސްޕިޓަލްތަކަށް ބަލިމީހުން ފޮނުވައިދޭ ކަމަށް ކޭއެމްއައި އިން ބުނެފައިވެއެވެ. ފަތުރުވެރިންނަށް ދިމާވެދާނެ ސިއްހީ މައްސަލަތަކަށް ރައްކާތެރިވުމުގެ ގޮތުން، ދަތުރުމަތީގައި ބޭނުންކުރާނެ ޚާއްސަ އިންޝުއަރެންސް ޕެކޭޖުތައް ވެސް މިހާރު ލިބެން ހުރެއެވެ.
ފަތުރުވެރިންގެ ތަޖުރިބާތަކަށް ބަލާއިރު، ކްލިނިކްތަކުގައި ހޭދަކުރަންޖެހޭ ވަގުތު ކުޑަވުމަކީ ގިނަ ބަޔަކު ފާހަގަކުރާ ކަމެކެވެ. ބައެއް ފަތުރުވެރިން ބުނެފައިވާ ގޮތުގައި، އެކި ޓެސްޓުތައް ހެދުމަށް ކިޔޫގައި މަޑުކުރަން ޖެހެނީ ގިނަވެގެން 15 ވަރަކަށް މިނެޓުގައެވެ. އަދި ހެނދުނު ކްލިނިކަށް ގޮސް، މެންދުރުވުމުގެ ކުރިން ހުރިހާ ޓެސްޓެއް ހަދައި ނިންމާލެވެއެވެ. މީގެ ސަބަބުން، ދަތުރުގެ ބާކީ އޮންނަ ވަގުތުތަކުގައި އެހެނިހެން ހަރަކާތްތަކުގައި ބައިވެރިވުމަށް ފުރުސަތު ލިބެއެވެ.
ބައެއް ޓެސްޓުތަކަށް ހޭނައްތަން ޖެހުނު ކަމުގައި ވިޔަސް، މުޅި މަރުހަލާ ކުރިއަށްދަނީ ވަރަށް އޮމާންކޮށް ކަމަށް ފަތުރުވެރިންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ. ކޮރެއާގެ ސިއްހީ ޚިދުމަތްތަކުގެ ފެންވަރު ރަނގަޅުވުމާއި، ޒަމާނީ ވަސީލަތްތައް ބޭނުންކުރަމުން ދިއުމަކީ، މި ސިނާއަތް އިތުރަށް ފުޅާވުމަށް މަގުފަހިވާ ކަމެއް ކަމަށް ކަމާބެހޭ ފަރާތްތަކުން ވަނީ ފާހަގަކޮށްފައެވެ.