އިންޑިއާގެ ތަޢުލީމީ ނިޒާމު އިސްލާހުކުރުމަށާއި އެޑިއުކޭޝަން މިނިސްޓަރު ދަރުމެންދުރަ ޕްރަދާންގެ އިސްތިއުފާއަށް ގޮވާލައި، 'ކޮކްރޯޗް ޖަންތާ ޕާޓީ' (ސީޖޭޕީ) އިން ދިއްލީގައި ކުރަމުންދާ މުޒާހަރާތައް ވަރުގަދަވެ، ބޮޑުވަޒީރު ނަރެންދުރަ މޯދީގެ ސަރުކާރަށް ޕްރެޝަރު ބޮޑުވެއްޖެއެވެ.
ރޮއިޓާސްއިން މިއަދު ރިޕޯޓުކޮށްފައިވާ ގޮތުގައި، ބޯކޮށް ވާރޭވެހެމުންދިޔަ ނަމަވެސް، އެތައް ހާސް ބަޔަކު ދަނީ ދިއްލީގެ ޖަންތަރު މަންތަރުގައި މުޒާހަރާ ކުރަމުންނެވެ. މި މުޒާހަރާތަކަށް އިތުރު ބާރެއް ލިބުނީ، މައި އިދިކޮޅު ޕާޓީ ކަމަށްވާ ކޮންގްރެސްގެ އިސް ލީޑަރުން ބޮޑުވަޒީރުގެ ގެކޮޅު ކައިރީގައި އަންގާރަ ދުވަހު މުޒާހަރާ ކުރެއްވުމާ ގުޅިގެންނެވެ.
ކޮންގްރެސްއިން ބުނި ގޮތުގައި، އެ ބޭފުޅުން މުޒާހަރާ ކުރެއްވީ ހޯމަ ދުވަހު ސީޖޭޕީން ކުރި މުޒާހަރާ ރޫޅާލުމަށް ފުލުހުން ބާރުގެ ބޭނުންކުރުމާ ގުޅިގެންނެވެ. އެ ހަމަނުޖެހުންތަކުގައި 60 މީހުންނަށް އަނިޔާވެފައިވާ ކަމަށް ރިޕޯޓުތައް ބުނެއެވެ.
ކޮންގްރެސްގެ ލީޑަރު ރާހުލް ގާންދީ އާއި އެހެނިހެން ބައެއް ބޭފުޅުން ފުލުހުންގެ ބެލުމުގެ ދަށަށް ގެންދިޔުމަށްފަހު ފަހުން ވަނީ ދޫކޮށްލާފައެވެ. ރާހުލް ގާންދީ ވިދާޅުވި ގޮތުގައި، ފުލުހުންގެ އަމަލުތަކާ ގުޅިގެން ސަރުކާރުން ދަރިވަރުންގެ ކިބައިން މާފަށް އެދެން ޖެހޭނެއެވެ. އަދި ބޮޑުވަޒީރުގެ ގެކޮޅު ކައިރީގައި މުޒާހަރާ ކުރައްވަން ނިންމެވީ ޕާލަމެންޓުގައި އެ މައްސަލައަށް ބަހުސްކުރުމަށް ސަރުކާރުން ފުރުސަތު ނުދިނުމުން ކަމަށް އޭނާ ވިދާޅުވިއެވެ.
ނަމަވެސް، ފެޑެރަލް މިނިސްޓަރު ޖިތެންދުރަ ސިންގް ވަނީ މި ތުހުމަތުތައް ދޮގުކުރައްވައި، ބަހުސްކުރުމަށް ސަރުކާރުން އެއްބަސްވެފައިވާ ކަމަށް ވިދާޅުވެފައެވެ.
މި ހަމަނުޖެހުންތަކާ ގުޅިގެން އެޑިއުކޭޝަން މިނިސްޓަރު ޕްރަދާން ވިދާޅުވީ، ކޮންގްރެސްއިން ދަރިވަރުން ބޭނުންކުރަމުންދަނީ ސިޔާސީ ހަތިޔާރެއްގެ ގޮތުގައި ކަމަށެވެ. އަދި ސަރުކާރުން އޮތީ ދަރިވަރުންނަށް ޖަވާބުދާރީވެ، ނިޒާމު އިސްލާހުކުރުމަށް ތައްޔާރަށް ކަމަށް އޭނާ ވިދާޅުވިއެވެ.
މި މުޒާހަރާތަކުގައި ބައިވެރިވި އެކްޓިވިސްޓް ސޯނަމް ވަންގްޗުކް ބަނޑުހައިހޫނުކަމުގެ ހަޅުތާލެއް ފަށާފައިވަނިކޮށް، ހޮނިހިރު ދުވަހު ފުލުހުން ވަނީ އޭނާ މުޒާހަރާކުރާ ސަރަހައްދުން ނެރެ، ހޮސްޕިޓަލަށް ގެންގޮސްފައެވެ. ރިޕޯޓުތައް ބުނާ ގޮތުން އޭނާ އަދިވެސް އޮތީ ހޮސްޕިޓަލުގައެވެ. ދިއްލީގެ އިތުރުން މުމްބާއީ، ހައިދަރުއާބާދު އަދި ބެންގަލޫރު ފަދަ ބޮޑެތި އެހެން ސަހަރުތަކުގައި ވެސް މިހާރު ދަނީ ސީޖޭޕީއަށް ތާއީދުކޮށް މުޒާހަރާތައް ބާއްވަމުންނެވެ.