މި އަހަރުގެ ސްކޫލު ފުރަތަމަ ޗުއްޓީ އާއި ދިވެހިރާއްޖޭގެ މިނިވަން ދުވަސް ކަމަށްވާ ޖުލައި 26 ގެ ބަންދާ ދިމާކޮށް، އަނެއްކާ ވެސް ގިނަ އަދަދެއްގެ ދިވެހީން އުމްރާގެ އަޅުކަމަށް ސައޫދީ އަރަބިއްޔާއަށް ދާން ފަށައިފިއެވެ.
މި ފަހަކަށް އައިސް ބަންދުތަކާ ދިމާކޮށާއި އަހަރުގެ އެކި ދުވަސްތަކުގައި އުމްރާގެ އަޅުކަމަށް ދިއުމަކީ ދިވެހީންގެ މެދުގައި ވަރަށް އާންމު ކަމެކެވެ. ފާއިތުވި ސްކޫލު ބަންދުގައި ވެސް 7،000 އަށް ވުރެ ގިނަ ދިވެހީން އުމްރާއަށް ގޮސްފައިވާއިރު، މިފަހަރުގެ ދިގު ބަންދުގެ ބޭނުން ހިފައިގެން އެތައް ސަތޭކަ ބަޔަކު ވަނީ މައްކާއަށް ގޮސްފައެވެ.
މި ވަގުތު މައްކާގެ މަގުތަކާއި ހަރަމްފުޅުގެ ސަރަހައްދުގައި ދިވެހީން އަންނަނީ ވަރަށް ގިނައިން ހަރަކާތްތެރިވަމުންނެވެ.
އުމްރާގެ އަޅުކަމަށް މި ވަގުތު މައްކާގައި ހުރި "ސަން" ގެ މަލްޓި މީޑިއާ އެޑިޓަރު މުޙައްމަދު ނާއިލް ހަފީޒު ވިދާޅުވި ގޮތުގައި، މައްކާގައި އެތައް ސަތޭކަ ދިވެހީންނެއް އުމްރާގެ އަޅުކަމުގައި އުޅެމުންދެއެވެ.
"ވަރަށް ދިވެހީން ގިނަ މިކޮޅުގައި. އާއްމުކޮށް ދިވެހީން މި ތިބެނީ އެއް ހިސާބެއްގައި. އެހެންވީމަ ވަރަށް ބޮޑަށް ފެނިދެނިވެ މި އުޅެނީ. ޖުމުލަކޮށް ހުރިހާ ދިވެހީންގެ ހާލު ވެސް ރަނގަޅު،" ނާއިލް ވިދާޅުވިއެވެ.
އޭނާ އިތުރަށް ވިދާޅުވި ގޮތުގައި ރޭ ވެސް އިތުރު ގުރޫޕެއްގެ ހަވާލުގައި ދިވެހީން މައްކާއަށް އައިއިރު، ކުރިއަށް އޮތް ދުވަސްތަކުގައި ވެސް އިތުރު ދިވެހީން އައުމަށް ވަނީ ހަމަޖެހިފައެވެ.
މި ބަންދުގައި ދިވެހީން އުމްރާއަށް ގޮސްފައިވަނީ އެކި ގޮތްގޮތުންނެވެ. އޭގެ ތެރޭގައި އަމިއްލަ އެކި ގުރޫޕުތަކާއި މޯލްޑިވްސް ޙައްޖު ކޯޕަރޭޝަންގެ ހަވާލުގައި ދިޔަ މީހުން ހިމެނެއެވެ. ގުރޫޕުތަކުން ގިނަ ޚިދުމަތްތަކެއް ފޯރުކޮށްދެމުން އަންނައިރު، އޭގެ ތެރޭގައި މައްކާ އާއި މަދީނާއާ ދެމެދު ހައި ސްޕީޑް ރޭލުގައި ދަތުރުކުރުމާއި، ދިވެހި ރަހަތައް ހިމެނޭ ކެއުމާއި، 24 ގަޑިއިރު ކްލިނިކްގެ ޚިދުމަތް ދިނުން ހިމެނެއެވެ. މީގެ އިތުރުން، އާއިލާތަކާއެކު ދާ ކުޑަކުދިންނަށް ޚާއްސަކޮށްގެން ދީނީ ހަވީރު ފަދަ ހަރަކާތްތައް ވެސް އެ ގުރޫޕްތަކުން އަންނަނީ ހިންގަމުންނެވެ.
މީގެ އިތުރުން، މިހާރު ފެންނަމުންދާ އާ އާދައަކީ އަމިއްލައަށް ވިސާ ނަގައިގެން ވެސް ބައެއް ދިވެހީން އުމްރާއަށް ދިއުމެވެ. ސައޫދީ އަރަބިއްޔާއިން އޮންލައިންކޮށް ފަސޭހައިން ޓޫރިސްޓު ވިސާ ދޫކުރަން ފެށުމާއެކު، ގުރޫޕުތަކަށް ބަރޯސާނުވެ އަމިއްލަ އިންތިޒާމުތަކުގެ ދަށުން އާއިލާތައް އުމްރާއަށް ދިއުން ވަނީ ވަރަށް ބޮޑަށް އިތުރުވެފައެވެ. މިގޮތަށް ދިއުމުން ދަތުރުގެ ޚަރަދު ކުޑަވުމާއި، އަމިއްލަ އިޚުތިޔާރުގައި ދަތުރުގެ ކަންކަން ރޭވުމުގެ މިނިވަންކަން ލިބިގެންދާ ކަމަށް އަމިއްލަ ގޮތުން ދަތުރުކުރާ ފަރާތްތަކުން ފާހަގަކުރެއެވެ. ޚާއްސަކޮށް ޒުވާނުންގެ މެދުގައި މިފަދައިން ދަތުރުކުރުން ވަނީ މަގުބޫލުވެފައެވެ.
އުމްރާގެ އަޅުކަމަށް ދާ ދިވެހީންގެ އުމުރުފުރާތަކަށް ވެސް ބޮޑު ބަދަލެއް އައިސްފައިވާކަން ފާހަގަކުރެވެއެވެ. ކުރިން ގިނައިން އުމުރުން ދުވަސްވީ މީހުން އުމްރާއަށް ދިޔަ ނަމަވެސް، މިހާރު ދެ ޖިންސުގެ އުމުރުން ދުވަސްވީ މީހުންގެ އިތުރުން ޒުވާނުންނާއި ކުޑަކުދިން ވެސް ގިނަ އަދަދަކަށް ހިމެނެއެވެ. މިއީ އާއިލީ ދަތުރެއްގެ ގޮތުގައި އުމްރާ ބަދަލުވަމުންދާ ކަމުގެ ހެއްކެކެވެ.
މި ބަންދުގައި އުމްރާއަށް ދިޔަ ސީދާ ދިވެހީންގެ އަދަދު ހޯދައިލުމަށް އިސްލާމިކް މިނިސްޓްރީއާ ސުވާލު ކުރުމުން، އެ މިނިސްޓްރީން ބުނީ އެ މައުލޫމާތު އަދި ލިބިފައި ނެތް ކަމަށެވެ.
ގިނަ އަދަދެއްގެ ބަޔަކު އެއްފަހަރާ އުމްރާއަށް ގޮސްފައިވާއިރު، އަޅުކަމަށް ފަހު އެނބުރި އަންނަ މީހުންގެ ފަރާތުން ބަލިތައް ފެތުރުން ހުއްޓުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ރައްކާތެރިކަމުގެ ޚާއްސަ އިރުޝާދުތަކެއް ވެސް އާންމުކޮށްފައެވެ. އުމްރާއިން އެނބުރި އަންނައިރު ގިނަ މީހުންނަށް އަރިދަފުސް ރޯގާ ޖެހިފައި ތިބޭކަން ފާހަގަކުރެވޭތީ، ބަލިޖެހިއްޖެ ނަމަ އެކަމަށް ސަމާލުވުމަށާއި، ކެއްސާ ކިނބިހި އަޅާއިރު އަނގަމައްޗާއި ނޭފަތް ނިވާކުރުމަށް އެ އެޖެންސީން އިލްތިމާސްކުރެއެވެ. އަދި ރާއްޖެ އަންނަތާ 14 ދުވަހުގެ ތެރޭގައި ހުން އައުމާއި، ކެއްސައި ނޭވާލާން އުނދަގޫވުން ފަދަ ކަމެއް ދިމާވެއްޖެ ނަމަ، ލަސްނުކޮށް ޑޮކްޓަރަށް ދެއްކުމަށް ވެސް ވަނީ އަންގައިފައެވެ.
ޗުއްޓީގެ ދުވަސްތައް އަދިވެސް ކުރިއަށް އޮތުމާއެކު، މައްކާއަށް ދަތުރުކުރާ ދިވެހީންގެ އަދަދު އިތުރުވާނެ ކަމަށް ބެލެވެއެވެ. ރާއްޖެއިން ފުރަން ހަމަޖެހިފައިވާ އިތުރު ފްލައިޓުތަކާއެކު، ކުރިއަށް އޮތް ހަފުތާގައި ވެސް އާ ގުރޫޕުތައް މައްކާއަށް އެތެރެވުމަށް ވަނީ ތާވަލުކުރެވިފައެވެ.