އިންޑިއާގެ ބޮކްސް އޮފީހުގައި ބޮޑު ކާމިޔާބީއެއް ހޯދި ޑައިރެކްޓަރު އަދިތްޔާ ދާރްގެ ފިލްމު "ދުރަންދަރު" މިދިޔަ ހުކުރު ދުވަހު ޖަޕާނުގެ ސިނަމާތަކުގައި ދައްކަން ފެށިއިރު މިހާތަނަށް ފިލްމަށް ލިބުނީ ފިނި ތަރުހީބެއް ކަމަށް ރިޕޯޓުތަކުން ބުނެފިއެވެ.
މި ފިލްމާ ގުޅޭ ވިޔަފާރި ރިޕޯޓްތައް ބުނާގޮތުން، ބޮލީވުޑްގެ އެކްޓަރު ރަންވީރު ސިންގް ލީޑް ރޯލް ކުޅެފައިވާ "ދުރަންދަރު" ބަލަން ފުރަތަމަ ދުވަހު ވަދެފައިވަނީ އެންމެ 900 ބެލުންތެރިންނެވެ. މީގެ ސަބަބުން އެ ގައުމުގެ ހަފުތާ ބަންދުގެ އެންމެ މަގުބޫލު 25 ފިލްމުގެ ލިސްޓުން ވެސް މި ފިލްމަށް ޖާގަ ވަނީ ނުލިބިފައެވެ.
ފިލްމު ދައްކަން ފެށި ދުވަހުގެ މެންދުރުފަހު 2 ޖެހުމާ ހަމައަށް 57 ސިނަމާއަކުން 449 މީހުން ފިލްމު ބަލާފައިވީ ނަމަވެސް، ދުވަހުގެ ބާކީ ބައިގައި ފިލްމަށް ލިބުނު ތަރުހީބު އިތުރުވެފައެއް ނުވެއެވެ. ދުވަސް ނިމުނުއިރު 80 ސިނަމާއަކުން ޖުމްލަ ވަދެފައިވަނީ 900 ބެލުންތެރިންނެވެ.
ފިލްމު "ދުރަންދަރު"ގެ ކާސްޓުގައި ހިމެނޭ މުހިއްމު ތަރިން ފެންނަ ޕޯސްޓަރެއް--ފޮޓޯ/ޓެލެގްރާފްއިންޑިއާ
ޖަޕާނުގައި މިހާތަނަށް ފުރަތަމަ ދުވަހު އެންމެ ގިނަ ބެލުންތެރިން ސިނަމާއަށް ވަން އިންޑިއާ ފިލްމުގެ ރެކޯޑް އަދިވެސް އޮތީ ޑައިރެކްޓަރު އެސްއެސް ރާޖަމޯލީގެ "އާރްއާރްއާރް" އަތުގައެވެ. އެ ފިލްމު ބަލަން ފުރަތަމަ ދުވަހު 8,230 މީހުން ވަދެފައިވެއެވެ. މި ލިސްޓުގެ ކުރީގައި ދެން ހިމެނޭ ފިލްމުތަކަކީ ޕްރަބާސް އަދި ބަތަލާ ޝްރައްދާގެ ފިލްމު "ސާހޯ"، "ކަލްކީ 2898 އޭޑީ"، "ޕަޓާން"، "ސަލާރު"، "ޖަވާން"، "ރަންގަސްތަލަމް"، "ދޭވަރާ"، "ބާހުބަލީ 2" އަދި "ޓައިގަ 3"އެވެ.
މިދިޔަ އަހަރުގެ ޑިސެމްބަރު މަހު ސިނަމާތަކަށް ގެނެސްދިން ފިލްމު "ދުރަންދަރު"އަށް އިންޑިއާގެ ބޮކްސް އޮފީހުގައި މިހާތަނަށް ލިބުނު އާމްދަނީގެ އަދަދު 1،428 ކްރޯޑު ރުޕީސްއަށް އަރާއިރު މި އަހަރުގެ މާޗް މަހު ރިލީޒްކުރި މި ފިލްމުގެ ދެވަނަ ބަޔަށް 1،852.44 ކްރޯޑު ރުޕީސްގެ އާމްދަނީއެއް ވަނީ ލިބިފައެވެ.