އިނގިރޭސިވިލާތުގެ އިރުމަތީ ސަރަހައްދުގައި މިދިޔަ ހަފްތާ ބަންދުގައި ބޭއްވި އިސްލާމީ ޖަލްސާއަކަށް އަމާޒުކޮށް ޓެރަރިޒަމްގެ އިންޒާރު ދިނުމާ ގުޅިގެން 12 މީހުން ހައްޔަރުކޮށްފިއެވެ.
ބަންދުގައި ތިބި މީހުންގެ ތެރޭގައި 27 އަހަރާއި 82 އަހަރާ ދެމެދުގެ މީހުން ހިމެނޭއިރު، ޝައްކު ކުރެވޭ މީހުންގެ ތެރެއިން އެގާރަ މީހުންނަކީ ފިރިހެނުން ކަމަށް އަލް ޖަޒީރާއިން ރިޕޯޓުކޮށްފައިވެއެވެ.
"މިހާރު ބާރަ މީހަކު ހައްޔަރުކޮށްފައިވޭ. އަޅުގަނޑަށް އެނގޭ މިއީ އިނގިރޭސި މުސްލިމުންނަށް ވަރަށް ބޮޑަށް ކަންބޮޑުވާ ޚަބަރެއްކަން. ނަފްރަތާ ދެކޮޅަށް ތެދުވަންޖެހޭ." އިނގިރޭސިވިލާތުގެ ހޯމް ސެކްރެޓަރީ ޝަބާނާ މަހްމޫދު ވިދާޅުވިއެވެ.
އިޖްތިމާ ފެސްޓިވަލްގައި ގާތްގަނޑަކަށް 15،000 މީހުން ބައިވެރިވިއެވެ. ފުލުހުންގެ ލަފާގެ މަތިން ރޭވިފައިވާ ވަރަށް ވުރެ ކުރިން މި އިވެންޓް ނިންމާލާފައިވާއިރު، ފުލުހުންނަށް ވަނީ ކުރިމަތިވެދާނެ ނުރައްކަލެއްގެ މައުލޫމާތު ކުރިން ލިބިފައެވެ.
ހައްޔަރުކުރި މީހުންގެ ތެރެއިން އަށް މީހުން ބަންދުކޮށްފައި ވަނީ ޓެރަރިޒަމްގެ ތުހުމަތުގައެވެ. ބާކީ ތިބި ތިން މީހުން ބަންދުކޮށްފައި ވަނީ މީހަކު މަރާލަން ރޭވި ކަމުގެ ތުހުމަތުގައެވެ. އަންހެން މީހާ ހައްޔަރުކޮށްފައިވަނީ ކުށްވެރިއަކަށް އެހީތެރިވެދިން ކަމުގެ ތުހުމަތުގައެވެ.
އާންމުންނަށް ނުރައްކަލެއް އޮތް ކަމަކަށް ނުބެލެވޭ ކަމަށް ފުލުހުން ބުނެފައިވާއިރު، މުޅި އިނގިރޭސިވިލާތުގެ ބައެއް ގެތައް އަދިވެސް ދަނީ ބަލައި ފާސްކުރަމުންނެވެ.
މި މީހުން ހައްޔަރުކޮށްފައި ވަނީ އިނގިރޭސިވިލާތުގައި ނަސްލީ ހަމަނުޖެހުންތަކާއި ނަފްރަތުގެ ޖަރީމާތައް އިތުރުވަމުންދާ ދަނޑިވަޅެއްގައެވެ.
އިނގިރޭސިވިލާތުގެ ޕަބްލިކް ޕްރޮސެކިއުޝަން އެޖެންސީ ކްރައުން ޕްރޮސެކިއުޝަން ސާވިސް (ސީޕީއެސް) އިން ބުނެފައިވާ ގޮތުގައި އެ އިދާރާގެ ތާރީހުގައި ވެސް ނަފްރަތުގެ ކުށުގެ އެންމެ ގިނަ މައްސަލަތައް ބަލަމުން އަންނަނީ މިއަހަރުއެވެ.
މިދިޔަ އަހަރު ޖުލައި މަހާއި ސެޕްޓެމްބަރު މަހާއި ދެމެދު 4،350 އަށް ވުރެ ގިނަ މައްސަލަ ސީޕީއެސްއަށް ފޮނުވާފައިވާއިރު، މިއީ އޭގެ ކުރީ ކުއާޓަރާއި އަޅާބަލާއިރު 14.7 ޕަސެންޓް އިތުރު އަދަދެކެވެ.