ފުލުހުން ހައްޔަރުކޮށްފައި ވަނިކޮށް، 18 އަހަރުގެ ޒުވާނަކު ފިލި މައްސަލައެއްގައި އޭނާ ޝަރީއަތް ނިމެންދެން ބަންދުކުރަން ކްރިމިނަލް ކޯޓުން އަމުރުކޮށްފިއެވެ.
އިއްޔެ ނެރުނު ކޯޓު އަމުރުގައިވާ ގޮތުން، ބަންދުގައި ހުއްޓައި ފިލައިފައި ވަނީ ދ. ކުޑަހުވަދުއަށް ނިސްބަތްވާ ޒުވާނެކެވެ.
އެ އަމުރުގައިވާ ގޮތުން، އޭނާ ތަކުރާރުކޮށް ފުލުހުންގެ އަމުރަށް ނުކިޔަމަންތެރިވެފައިވާ ކަމަށް ބެލެވޭ ހެކިތައް ކޯޓަށް ވަނީ ހުށަހަޅައިފައިވެއެވެ. އަދި އޭނާއަކީ ފުލުހުންގެ ބެލުމުގެ ދަށުގައި ކޯޓު އަމުރެއްގެ ދަށުން ހައްޔަރުގައި އިންދައި، އެ ތަނުން ފިލައިގެން ގޮސްފައިވާ މީހެއް ކަމަށް އިންވެސްޓިގޭޝަން އޮފިސަރު (އައިއޯ) ވިދާޅުވި ކަމަށް އަމުރުގައިވެއެވެ.
ކޯޓު އަމުރުގައި ވަނީ، މައްސަލައިގެ ތަހުގީގު ފުރިހަމަވަންދެން ފުލުހުންގެ ބެލުމުގެ ދަށުގައި ކަސްޓޯޑިއަލް ޖަލުގައި އޭނާ ބެހެއްޓުމުގެ އިޚުތިޔާރު އޮތް ކަމަށެވެ.
އެ އަމުރުގައިވާ ގޮތުން، ބަންދުގައި ހުއްޓައި ނުދިޔުމަށާއި އެގޮތަށް ދިޔުމަކީ މަނާކަމެއް ކަމަށް ފުލުހުން އޭނާގެ ގާތުގައި ބުނެފައިވެއެވެ. ނަމަވެސް އޭނާ ފުލުހުންގެ މަރުކަޒުން ނުކުމެގެން ގޮސްފައިވާ ކަމަށް އަމުރުގައިވެއެވެ.
އެ އަމުރުގައި ވަނީ ފުލުހުންގެ މަސައްކަތަށް ހުރަސް އަޅައި، ގާނޫނު ތަންފީޒު ކުރާ އިދާރާގެ މުވައްޒަފުންގެ މަސައްކަތަށް ހުރަސް އެޅުމަކީ ސީރިއަސް ކަމެއްކަން ފާހަގަކޮށްފައެވެ. އަދި ގާނޫނު ހިންގުމަށް ގަސްދުގައި ހުރަސް އަޅައިފައިވާ ކަމަށް ބެލެވޭ ސަބަބުތައް ހުރި ކަމަށް ބުނެފައިވެއެވެ.
މީގެ އިތުރުން އޭނާ ބަންދުކޮށްފައި ވަނިކޮށް ފުލުހުންގެ މަރުކަޒުން ނުކުމެގެން ދިޔުމުގެ ކުރިން، އެ މަރުކަޒުގެ ތެރޭގައި އިތުރު މީހުންނާއެކު އޭނާ ހަރަކާތްތެރިވެފައިވާ ކަމަށް ބެލެވޭ ކަންކަން ހުރި ކަމަށް ވެސް ކޯޓު އަމުރުގައިވެއެވެ.
އެ ކަންތައްތަކަށް ރިއާޔަތްކޮށް ކްރިމިނަލް ކޯޓުގެ އިސް ގާޒީ އާދަމް މުހައްމަދު ވަނީ އެ ޒުވާނާ ޝަރީއަތް ނިމެންދެން ބަންދުކުރަން އަމުރުކުރައްވައިފައެވެ.