ގޫގުލް ކްރޯމް ބްރައުޒާގައި ހިމެނޭ އާޓިފިޝަލް އިންޓެލިޖެންސް (އޭއައި) އެސިސްޓެންޓް "ޖެމިނައި" އަށް "ސެލެކްޓް ފްރޮމް ސްކްރީން" ގެ ނަމުގައި އައު ފީޗާއެއް ތައާރަފުކޮށްފިއެވެ.
މި ފީޗާގެ އެހީގައި ކޮމްޕިއުޓަރުގެ ސްކްރީނުން ފެންނަން ހުންނަ މައުލޫމާތުތައް ފަސޭހަކަމާއެކު ސެލެކްޓްކޮށް، އެއާ ގުޅޭގޮތުން ޖެމިނައިއާ ސުވާލުކޮށް އޮޅުންފިލުވުމުގެ ފުރުސަތު ބޭނުންކުރާ ފަރާތްތަކަށް ލިބިގެންދާނެއެވެ.
މި އައު ފީޗާ މަސައްކަތްކުރަނީ ފޯނުތަކުގައި ބޭނުންކުރާ "ސާކަލް ޓު ސާޗް" ފީޗާއާ ދާދި އެއްގޮތަކަށެވެ. މީގެ ސަބަބުން ސްކްރީނުން ފެންނަ އެއްޗެއްގެ ތަފްސީލު ހޯދުމަށްޓަކައި އެ އެއްޗެއްގެ މައުލޫމާތު އަމިއްލައަށް ލިޔެގެން ހޯދުމުގެ ބަދަލުގައި، ކާސަރު ބޭނުންކޮށްގެން އެ ބައެއް ފާހަގަކޮށްލުމުން ސީދާ ޖެމިނައިއަށް އެ ބައި ފޮނުވާލެވޭނެއެވެ. ގޫގުލްއިން ހާމަކުރި ގޮތުގައި މި ފީޗާ ލިބޭނީ ކްރޯމް ބްރައުޒާގެ ވާޝަން 149 ބޭނުންކުރާ ފަރާތްތަކަށެވެ.
މި ފީޗާ ބޭނުންކުރުމަށްޓަކައި ކްރޯމް ބްރައުޒާގެ މަތީގައި އިންނަ "އާސްކް ޖެމިނައި" އަށް ފިތާލުމަށްފަހު، ޕްލަސް (+) އައިކަންއަށް ފިތާލުމުން ފެންނަ "ސެލެކްޓް ފްރޮމް ސްކްރީން" އިޚްތިޔާރު ކުރަންޖެހެއެވެ. އެއަށްފަހު ވެބްޕޭޖުން ބޭނުންވާ ބައެއްގެ ވަށައިގެން ގޮޅިއެއް ކުރަހައި، އެއާ ގުޅޭގޮތުން ކުރަން ބޭނުންވާ ސުވާލު ޓެކްސްޓް ބޮކްސްގައި ލިޔެލުމުން ޖެމިނައިއިން އެއަށް ޖަވާބު ދޭނެއެވެ. އަދި ސެލެކްޓްކުރާ ގޮޅީގެ ބޮޑުމިނާއި އިންނަ ތަން ބަދަލުކުރުމުގެ ފުރުސަތުވެސް ބޭނުންކުރާ ފަރާތްތަކަށް ލިބިގެންދެއެވެ.
މި ފީޗާގެ އެހީގައި ވެބްޕޭޖެއްގައި ހުންނަ ކުރެހުންތަކާއި، ޑަޔަގްރާމްތަކުގެ އިތުރުން އެކި ކަހަލަ އުފެއްދުންތަކުގެ ފޮޓޯ ސެލެކްޓްކޮށްގެން އެ އެއްޗެއްގެ ތަފްސީލީ މައުލޫމާތު ވަގުތުން ހޯދައިގަނެވޭނެއެވެ. މި އައު އަޕްޑޭޓް އަދި ނުލިބޭ ފަރާތްތަކުން ބްރައުޒާގެ ސެޓިންގްސްގެ "އެބައުޓް ކްރޯމް" އަށް ގޮސް ބްރައުޒާ އަޕްޑޭޓްކޮށްލުމުން މި ފީޗާ ލިބިގެންދާނެ ކަމަށް ވެއެވެ.