ދެކުނު އޭޝިއާ ސަރަހައްދުގެ ގައުމުތަކުގެ ތެރެއިން އުފެއްދުންތެރިކަމުގެ ނިސްބަތުން އެންމެ ދަރަނި ބޮޑު ގައުމެއްގެ ގޮތުގައި ދިވެހިރާއްޖެ ހިމެނިއްޖެއެވެ.
ދުނިޔޭގެ މާލީ އިދާރާ، އިންޓަނޭޝަނަލް މަނިޓަރީ ފަންޑު (އައިއެމްއެފް)އިން އާންމުކޮށްފައިވާ އެންމެ ފަހުގެ ހިސާބުތަކަށް ބަލާއިރު، ދެކުނު އޭޝިއާ ސަރަހައްދުގެ ގައުމުތަކުގެ ތެރެއިން އެންމެ ބޮޑު ދަރަނި އޮތް ގައުމަކަށް ދިވެހިރާއްޖެ ވަނީ ވެފައެވެ.
ރާއްޖޭގެ ދައުލަތުގެ ޖުމުލަ ދަރަނި މިހާރު ހުރީ ގައުމީ އުފެއްދުންތެރިކަމުގެ ނިސްބަތުން (ޖީޑީޕީ) 125.4 އިންސައްތައިގައެވެ. މިއީ ސަރަހައްދުގެ އެހެން ހުރިހާ ގައުމުތަކާ އަޅާބަލާއިރު ނިސްބަތުން މަތީ އަދަދެއް ކަމުން، މިއީ ރާއްޖޭގެ މެކްރޯ-އިގްތިސާދީ ހަމަޖެހުމަށް އޮތް ބޮޑު ގޮންޖެހުމެއްކަން މި ރިޕޯޓުން ހާމަވެއެވެ.
ރާއްޖެއަށް ފަހު ދެން އެންމެ ދަރަނި ބޮޑު ގައުމެއްގެ ގޮތުގައި އުޅެނީ ޖީޑީޕީގެ 103.6 އިންސައްތައިގެ ދަރަންޏަކާއެކު ބޫޓާނެވެ. ސަރަހައްދުގެ އެންމެ ބޮޑު އިގްތިސާދީ ބާރު ކަމަށްވާ އިންޑިއާގެ ދަރަނި 84.1 އިންސައްތައިގައި އުޅޭއިރު، އިގްތިސާދީ ގިނަ ހީނަރުކަމެއް ތަހައްމަލު ކުރަމުންދާ ޕާކިސްތާނުގެ ދަރަނި ހުރީ 72.8 އިންސައްތައިގައެވެ. މީގެ އިތުރުން ނޭޕާލްގެ ދަރަނި 48.1 އިންސައްތައިގައި ރެކޯޑު ކުރެވިފައިވާއިރު، މުޅި ދެކުނު އޭޝިއާއިން ވެސް އެންމެ ދަރަނި ކުޑަ ގައުމެއްގެ ގޮތުގައި ފާހަގަކުރެވެނީ ޖީޑީޕީގެ އެންމެ 42 އިންސައްތައިގެ ދަރަންޏެއް އޮތް ބަންގްލަދޭޝްއެވެ.
ރާއްޖޭގެ ދަރަނި މިހާރު ހުރި މިންވަރަކީ ބަންގްލަދޭޝް ފަދަ ގައުމުތަކާ އަޅާބަލާއިރު ގާތްގަނޑަކަށް ތިންގުނަ އިތުރު އަދަދެކެވެ. ރާއްޖެއަށް މިވަގުތު އޮތީ ދަރަނި މެނޭޖުކުރުމާއި ދައުލަތުގެ މާލިއްޔާއަށް ކުރިމަތިވެފައިވާ ފިއްތުންތަކުން ސަލާމަތްވުމަށް ހަރުދަނާ މާލީ އަދަބުވެރިކަމެއް ގާއިމުކުރުމުގެ މަޖުބޫރުކަން ބޮޑުވެފައެވެ. ސާކްގެ އެހެން ގައުމުތަކަށްވުރެ ރާއްޖޭގެ ދަރަނީގެ ނިސްބަތް މަތިވުމަކީ މާލީ އިސްލާހީ ފިޔަވަޅުތައް އަވަސްކުރަން ޖެހޭކަން އަންގައިދޭ މުހިންމު ނިޝާނެކެވެ.
މި އަހަރު ދައުލަތުން ފާސްކޮށްފައި ވަނީ ރެކޯޑު އަދަދެއްގެ ބޮޑު ބަޖެޓެއް ކަމަށްވާއިރު އޭގެ މައިގަނޑު ސަބަބަކަށްވީ މި އަހަރު ޖުމުލަ 1.1 ބިލިއަން ޑޮލަރުގެ ދަރަނި ދައްކަން ޖެހުމެވެ. ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުން ދައްކާ ގޮތުގައި މިދިޔަ މަހުގެ 14އާ ހަމައަށް ލޯނު އަނބުރާ ދެއްކުމަށް 8.7 ބިލިއަން ރުފިޔާ ވަނީ ޚަރަދުކޮށްފައެވެ.
ރާއްޖޭގެ ދަރަންޏާ މެދު ގިނަ ބަޔަކު ކަންބޮޑުވުން ފާޅުކުރާއިރު، މިފަހުން ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވަނީ ރައީސް ޑރ. މުޙައްމަދު މުއިއްޒު ކުރިއަށް އޮތް ދެ އަހަރު ދުވަހު ވެރިކަމުގައި ހުރެއްޖެނަމަ ރާއްޖޭގެ ދަރަނި 90 ބިލިއަން ރުފިޔާއަށް އިތުރުވެގެންދިއުން އެކަށީގެންވާ ކަމަށް ވިދާޅުވެފައެވެ.