ވޮޝިންޓަން (23 ޖޫން 2026) : އެމެރިކާއާއި އީރާން މިދިޔަ ހަފްތާގައި ސޮއިކުރި އެމްއޯޔޫގެ ދަށުން އެމެރިކާ ދޫކުރި އީރާނުގެ އެތައް ބިލިޔަން ޑޮލަރެއްގެ ފައިސާއިން އީރާނަށް ބޭނުންވާ ތަކެތި ގަންނަން ޖެހޭނީ އެމެރިކާއިން ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް، އޭނާގެ ޓްރުތް ސޯޝަލްގައި ވިދާޅުވެފައިވަނީ އެމެރިކާއިން އެތައް އަހަރެއްގެ ކުރިން ހިފަހައްޓާފައިވާ އެތައް ބިލިޔަން ޑޮލަރެއް މިހާރު އީރާނަށް ދޫކޮށްފިކަމަށާއި މި ފައިސާއިން އީރާނަށް ބޭނުންވާ ކާބޯތަކެއްޗާއި ބޭހާއި އެނޫންވެސް ތަކެތި ގަންނަންވާނީ އެމެރިކާއިން ކަމުގައެވެ. މިކަމަށް އީރާން އެއްބަސްވާނެކަމަށް ވެސް ޓްރަމްޕް ވިދާޅުވިއެވެ.
އެމްއޯޔޫގެ ދަށުން އެމެރިކާ ދޫކުރި ފައިސާގެ އަދަދެއް ޓްރަމްޕް ހާމައެއް ނުކުރައްވައެވެ. އީރާނުގެ ރައީސް ޑރ. މަސްއޫދު ޕަޒެޝްކިއާން ވިދާޅުވިގޮތުގައި ސިޔާސީ މަގްސަދުތައް ހާސިލް ކުރުމަށްޓަކައި އެމެރިކާ އެތައް އަހަރެއް ވަންދެން ގަދަބާރުން ހިފަހައްޓާފައިވާ އީރާނުގެ އެތައް ބިލިޔަން ޑޮލަރެއްގެ ތެރެއިން 12 ބިލިޔަން ޑޮލަރު ދޫކުރުމަށް އެމެރިކާވަނީ އެއްބަސްވެފައެވެ. މިފައިސާ އިރާނަށް ލިބޭނީ ގަތަރުގެ މަރުކަޒީ ބޭންކް މެދުވެރިކޮށެވެ. މިމުއާމަލާތް ފުރިހަމަ ކުރުމަށްޓަކައި އީރާނުގެ މަރުކަޒީ ބޭންކުގެ ވަފްދެއް މިހާރުވަނީ ގަތަރަށް ވަޑައިގެންފައެވެ.
މިއީ އީރާނުގެ ފައިސާ ކަމަށް ވިޔަސް އެމެރިކާ ސަރުކާރުން މިފައިސާ ދޫކުރީ މަދަނީ ކަންކަމަށް ބޭނުންކުރުން ޝަރުތު ކޮށްފައެވެ. އެއީ ކާބޯތަކެއްޗާއި ބޭހާއި ޓެކްސްޓައިލް ފަދަ އާންމު މުދަލުގެ އިތުރުން މެޑިކަލް ސާމާނާއި މެޝިނަރީ ފަދަ މަދަނީ އާލާތްތަކެވެ.
ރިޕޯޓްތައް ބުނާގޮތުން މިފައިސާ ދޫކުރީ މި ފައިސާގެ ބޭނުންކޮށްގެން ހަމައެކަނި އެމެރިކާއިން ވިޔަފާރި ކުރުން ޝަރުތުކޮށްފައެއް ނޫނެވެ. އެހެންކަމުން މި ފައިސާއިން އެމެރިކާގެ އުފެއްދުންތައް ގަތުމަށް ޓްރަމްޕަށް ރަސްމީ ގޮތެއްގައި އަމުރެއް ނުކުރެވޭނެއެވެ. މި ފައިސާއިން އެމެރިކާގެ މުދާ ގަތުމަށް ޓްރަމްޕް އެދުނު އެދުމާބެހޭގޮތުން އީރާނުގެ މަސްއޫލުވެރިން އިތުރު އެއްޗެއް ވިދާޅުވެފައެއް ނުވެއެވެ.
އީރާނުގެ 100 ބިލިޔަނަށް ވުރެގިނަ ފައިސާ އެމެރިކާއިން ވަނީ ހިފަހައްޓާފައެވެ. މީގެތެރޭގައި ހިމެނެނީ އެކި ގައުމުތަކުން އީރާނުން ތެލާއި ގޭސް އަދި އެނޫންވެސް ތަކެތި ގަތުމަށްފަހު އޭގެއަގު ދެއްކުމުގެ ގޮތުން އީރާނަށް ދައްކަންޖެހޭ ފައިސާއެވެ. މިފައިސާ އީރާނަށް ނުދީ ހިފަހައްޓާފައިވަނީ އެމެރިކާގެ ބުލީކުރުންތަކާއި ބިރުދެއްކުންތަކާ އަދި ޕްރެޝަރުތަކުގެ ސަބަބުންނެވެ. މިފައިސާ ހިފެހެެއްޓުމުގައި އެމެރިކާގެ ބޭނުމަކީ އީރާނުގެ އިގްތިސާދު ބަލިކަށި ކޮށްގެން ސަރުކާރުދެކެ ރައްޔިތުން ނަފްރަތު ކުރުވުމެވެ. އެމެރިކާއާއި އީރާނުގެ އެމްއޯޔޫ ގެ ދަށުން މިހާރު މިދޫކުރަނީ މީގެތެރެއިން 12 ބިލިޔަން ޑޮލަރު ކަމަށް ރިޕޯޓްތައް ބުނެއެވެ.