އެޕަލްގެ ވޯލްޑްވައިޑް ޑިވެލޮޕާސް ކޮންފަރެންސްގައި ދައްކާލި އައިއޯއެސް 27 ގެ އައު ފީޗާތަކުގެ ތެރެއިން އެންމެ އިންގިލާބީ އެއް ބަދަލަކީ ސައިބާ ސެކިއުރިޓީ ވަރުގަދަކުރުމަށްޓަކައި އޭއައި އެޖެންޓެއްގެ އެހީގައި ފޯނުން އަމިއްލައަށް ޕާސްވޯޑްތައް ބަދަލުކޮށްދޭން ފަށާ ފީޗާއެވެ.
މިއަހަރުގެ ފަހުކޮޅު އާންމުންނަށް ދޫކޮށްލާ މި އަޕްޑޭޓާއެކު، އައިފޯނު ބޭނުންކުރާ ފަރާތްތަކުގެ ޒާތީ މައުލޫމާތާއި އެކައުންޓްތައް ރައްކާތެރިކުރުން ކުރިއަށްވުރެ އެތައް ގުނައެއް ފަސޭހަވެގެންދާނެއެވެ.
މި އައު ފީޗާ މަސައްކަތްކުރަނީ އެކި ވެބްސައިޓްތަކުން ލީކުވެފައިވާ ޑޭޓާ ބްރީޗްތަކުގައި ޔޫޒަރުގެ އެކައުންޓެއް ހިމެނިފައިވޭތޯ ނުވަތަ ބޭނުންކުރަނީ ބަލިކަށި ޕާސްވޯޑެއްތޯ އޭއައި މެދުވެރިކޮށް ދެނެގަނެގެންނެވެ. އެއަށްފަހު، މީގެ ކުރިން މީހުން އަމިއްލައަށް އެކި ވެބްސައިޓްތަކަށް ވަދެ ސެޓިންގްސް ބަދަލުކުރަންޖެހޭ ބުރަ މަސައްކަތުގެ ބަދަލުގައި، މި ފީޗާ އިން ސެކިއުރިޓީ ބްރައުޒާ މެދުވެރިކޮށް އަމިއްލައަށް އެ ސައިޓްތަކަށް ސައިން-އިން ވެ، ވަރުގަދަ އައު ޕާސްވޯޑްތަކަށް ބަދަލުކޮށްދޭނެއެވެ.
އެޕަލް އިން ހާމކުރި ގޮތުގައި، މި ހުރިހާ މަސައްކަތެއް ހިނގަމުންދާނީ ޔޫޒަރުގެ ޕްރައިވެސީއަށް އެންމެ ފުރިހަމައަށް ރައްކާތެރިކަންދީގެން، ފޯނުގެ އެތެރޭގައި އެޕަލް އިންޓެލިޖެންސްގެ އެހީގައެވެ. މިއީ ސައިބާ ހަމަލާތަކުންނާއި މައުލޫމާތު ލީކުވުމުގެ ސަބަބުން އެކައުންޓްތައް ހެކްވުމުން ސަލާމަތްވުމަށް އައިފޯނު ބޭނުންކުރާ ފަރާތްތަކަށް ލިބިގެންދާނެ ވަރަށް ބޮޑު ސެކިއުރިޓީ އަޕްގްރޭޑެކެވެ.
އައިއޯއެސް 27 ގައި ހިމެނޭ މި އިންގިލާބީ ޕާސްވޯޑް ފީޗާގެ އިތުރުންވެސް، އެޕަލް އިން ވަނީ އޭއައިގެ އެހީގައި ދުވަހުން ދުވަހަށް ބޭނުންކުރެވޭނެ ފަސޭހަ ގިނަ ފީޗާތަކެއް ތައާރަފްކޮށްފައެވެ. އޭގެ ތެރޭގައި ރެސްޓޯރެންޓްތަކުގެ ބިލްތައް ފަސޭހަކަމާއެކު ރައްޓެހިންގެ މެދުގައި ބަހާލެވޭނެ "ބިލް ސްޕްލިޓިން" ފީޗާއެއް ހިމެނެއެވެ.
މި ފީޗާ މެދުވެރިކޮށް ބިލުގެ ފޮޓޯއެއް ނެގުމުން އޭއައި އިން އަމިއްލައަށް އަގުތަކާއި ޓެކްސް ވަކިކޮށް، ކޮންމެ މީހަކަށް ޖެހޭ ފައިސާ އެޕަލް ކޭޝްއިން ވަގުތުން ދައްކާލެވޭނެއެވެ. މީގެ އިތުރުން މެސެޖު އެޕްލިކޭޝަނަށްވެސް ބޮޑެތި ބަދަލުތަކެއް އަންނައިރު، ދެކެވޭ ވާހަކައަކަށް ބިނާކޮށް އެއް ފިއްތުމަކުން ކަލަންޑަރަށް އިވެންޓްތައް އިތުރުކުރުމާއި ފޮޓޯ ހޯދައިދިނުން ފަދަ ސަޖެޝަންތައް އޭއައި އިން ދައްކާނެއެވެ.
ހަމައެހެންމެ ފޯނު ކޯލުތައް ކުރާއިރު ކުންފުނިތަކުގެ ކަސްޓަމާ ސާވިސްއަށް ބޭނުންވާ މައުލޫމާތު، އީމެއިލްއިން ހޯދައި ފޯނުގެ ސްކްރީންމަތިން ދައްކައިދޭ "ކޯލް ކޮންޓެކްސްޓް" ފީޗާއެއްވެސް މީގައި ހިމެނެއެވެ. އަދި ފޯނުގައި އެކި މަސައްކަތްތައް އޮޓޮމޭޓްކުރަން ބޭނުންކުރާ "ޝޯޓްކަޓްސް" އެޕްލިކޭޝަންގައި، ދެން އައިފޯނު ބޭނުންކުރާ ފަރާތްތަކަށް ހަމައެކަނި ބޭނުންވާ ގޮތް ބުނެލުމުން އޭއައި އިން އަމިއްލައަށް އެ ޝޯޓްކަޓެއް ހަދާދޭނެއެވެ.
ސްމާޓް ހޯމް ގެންގުޅޭ ފަރާތްތަކަށް އަންނަ ބޭކާރު ނޮޓިފިކޭޝަންތައް މަދުކުރުމަށްޓަކައި، ގޭގެ ދޮރު ހުޅުވުމާއި ގަރާޖު ލެއްޕުން ފަދަ ގުޅުންހުރި ގިނަ ކަންތައްތަކެއް އެއްކޮށްލާފައި އެއް ނޮޓިފިކޭޝަނަކަށް ބަދަލުކޮށްލުމާއި، ސަފާރީ ބްރައުޒާގައި ހުޅުވާފައި ހުންނަ ޓެބްތައް އޭއައިގެ އެހީގައި އަމިއްލައަށް ވަކި ގްރޫޕްތަކަކަށް ބަހާލަދޭ ފީޗާވެސް މީގެ ތެރޭގައި ހިމެނެއެވެ.