އެމެރިކާގައި މިހާރު ކުރިއަށްދާ 2026 ވަނަ އަހަރުގެ ވޯލްޑް ކަޕް މުބާރާތުގައި ވާދަކުރާ އިރާން ގައުމީ ފުޓްބޯޅަ ޓީމަށް ކުރިމަތިވެފައިވާ ދަތުރުފަތުރުގެ ހަރުކަށި ފިޔަވަޅުތަކަށް ލުޔެއް ދިނުމަށް ވައިޓް ހައުސް އިން ވިސްނަމުންދާ ކަމަށް ރިޕޯޓްތައް ބުނެފިއެވެ.
މިހާރު އޮތް ގަވާއިދުގެ ދަށުން، މުބާރާތް ބާއްވާ ތިން ގައުމުގެ ތެރެއިން އެމެރިކާގައި ކުޅޭ މެޗުތަކަށް އިރާން ޓީމަށް އެތެރެވުމުގެ ހުއްދަ ލިބެނީ މެޗު އޮންނަ ދުވަހުގެ އެއްދުވަސް ކުރިންނެވެ. އަދި މެޗު ނިމޭ ދުވަހު އެ ގައުމުން ފުރަންޖެހޭ ގޮތަށް ވިސާގެ ޝަރުތުތައް ވަނީ ހަމަޖައްސާފައެވެ.
މި ހަރުކަށި ގަވާއިދުތަކާ ހުރެ އިރާންގެ ހެޑް ކޯޗު އާމިރު ގަލެނޮއީ ވަނީ އެ ޓީމަކީ މުބާރާތުގައި އޮތް އެންމެ ބޭއިންސާފު ޓީމު ކަމަށް ބުނެފައެވެ.
އިރާނުން ކުޅުނު ފުރަތަމަ މެޗުގައި ނިއުޒިލޭންޑާ ވާދަކޮށް 2-2 އިން ވަނީ އެއްވަރުވެފައެވެ. އެ ޓީމުގެ ބޭސް ކޭމްޕް މެކްސިކޯގެ ޓިހުއާނާގައި ހުރުމާއެކު، ލޮސް އެންޖެލިސްއަށް ކުރާ 30 މިނެޓުގެ ކުރު ދަތުރުތަކަށް މި ގަވާއިދުގެ ދަށުން މާބޮޑު މައްސަލައެއް ނެތް ނަމަވެސް، ޖޫން 27 ގައި ސިއެޓްލްގައި މިސްރާ ދެކޮޅަށް ކުޅޭ މެޗަށް ތިން ގަޑިއިރުގެ ދިގު ފްލައިޓެއް ކުރަންޖެހޭތީ ވައިޓް ހައުސް އިން އަންނަނީ ދަތުރުގެ ވަގުތުތަކަށް ބަދަލުތަކެއް ގެނައުމަށް މަޝްވަރާ ކުރަމުންނެވެ.
ވައިޓް ހައުސްގެ ވޯލްޑް ކަޕް ޓާސްކް ފޯސްގެ އެގްޒެކެޓިވް ޑިރެކްޓަރު އެންޑްރޫ ޖިއުލިއާނީ ވިދާޅުވީ، ގައުމީ ސަލާމަތަށް ނުރައްކާ ނުވާނެފަދަ ގޮތަކަށް، ހަމަހަމަ ފުރުސަތުތަކެއް ދިނުމަށް ރައީސް ޑޮނަލްޑް ޓްރަމްޕް ބޭނުންފުޅުވާ ކަމަށެވެ. އަދި އިރާން ޓީމަށް މުބާރާތުގައި ވާދަކުރުމުގެ ފުރުސަތު ދިނުމަށް ރައީސް ޓްރަމްޕް ހާއްސަ ރިޔާސީ އަމުރެއްގައި ސޮއިކުރައްވާފައިވާކަން އޭނާ ފާހަގަކުރެއްވިއެވެ.
އިރާން ފުޓްބޯޅަ ފެޑެރޭޝަނުން ބުނާ ގޮތުގައި، މެޗުތައް އޮންނަ ސިޓީތަކަށް މެޗުގެ ދެދުވަސް ކުރިން ދިއުމުގެ ހުއްދައާއި، މެޗު ނިމޭ އަނެއް ދުވަހު އެނބުރި ބޭސް ކޭމްޕަށް ދިއުމުގެ ފުރުސަތު ލިބެންޖެހެއެވެ.
މިފަދަ ހުރަސްތަކުގެ ސަބަބުން ޓީމުގެ ތައްޔާރުވުންތަކަށް ނޭދެވޭ އަސަރުކުރާ ކަމަށް ބުނެ، އިރާނުން އަންނަނީ ފީފާއަށް ރަސްމީ މައްސަލައެއް ހުށަހެޅުމަށް ތައްޔާރުވަމުންނެވެ.
އިރާން ދެން ކުޅޭ މެޗުގައި އާދިއްތަ ދުވަހުގެ ރޭ ރާއްޖެގަޑިން 00:00 ގައި ލޮސް އެންޖެލިސްގައި ބެލްޖިއަމްއާ ދެކޮޅަށް ނުކުންނާނެއެވެ.