ޖަޕާނުގެ ފެއާ ޓްރޭޑް ކޮމިޝަން (ޖޭއެފްޓީސީ) އިން އެ ގައުމުގައި އައިސްކްރީމް އުފައްދާ އެންމެ ބޮޑެތި ކުންފުނިތަކުގެ ތެރެއިން ބައެއް ކުންފުނިތައް ރޭޑުކޮށްފިއެވެ.
މި ކުންފުނިތައް ރޭޑުކޮށްފައިވަނީ، އައިސްކްރީމްގެ އަގު ބޮޑުކުރުމަށްޓަކައި އެ ކުންފުނިތައް ގުޅިގެން ކާޓެލްއެއް ހަދާފައިވާ ކަމަށް ތުހުމަތުކުރެވޭ މައްސަލައެއްގެ ތަހުގީގަށެވެ.
އިއްޔެ ޖޭއެފްޓީސީން ރޭޑުކޮށްފައިވާ ހަ ކުންފުންޏަކީ މެއިޖީ، މޮރިނާގާ މިލްކް އިންޑަސްޓްރީ، ލޮޓޭ، މޮރިނާގާ، އެޒާކީ ގްލިކޯ އަދި އަކާގީ ނިއުގްޔޯއެވެ. މީގެ ތެރެއިން މެއިޖީ އަދި ޕޮކީ އުފައްދާ އެޒާކީ ގްލިކޯ ފަދަ ކުންފުނިތަކުން ވަނީ، ގަނޑުކުރި ފޮނިކާތަކެތީގެ އަގު ކަނޑައެޅުމުގައި ގަވާއިދާ ޚިލާފަށް އަމަލުކޮށްފައިވާ ކަމުގެ ތުހުމަތުގައި އެ ކުންފުނިތަކުގެ އޮފީސްތައް ބަލައި ފާސްކޮށްފައިވާކަން ހާމަކޮށްފައެވެ.
ނަމަވެސް، މި ތަހުގީގާ ގުޅޭގޮތުން ރަސްމީ ބަޔާނެއް ނެރެން ނިންމާފައިނުވާ ކަމަށް ޖޭއެފްޓީސީން ބުނެފައިވެއެވެ.
މި ކުންފުނިތަކުގެ މައްޗަށް ތުހުމަތުކުރެވެނީ، އައިސްކްރީމް އުފެއްދުމަށް ބޭނުންކުރާ ރޯމެޓީރިއަލްގެ އަގު ބޮޑުވި މިންވަރަށްވުރެ މާ ބޮޑަށް އައިސްކްރީމްގެ އަގު އުފުލާފައިވާ ކަމަށެވެ.
ޖަޕާނުގެ ބްރޯޑްކާސްޓަރު އެންއެޗްކޭއިން ނަން ހާމަނުކުރާ މަސްދަރުތަކަކާ ހަވާލާދީ ރިޕޯޓުކޮށްފައިވާ ގޮތުގައި، ފާއިތުވި އަހަރުތަކުގެ ތެރޭގައި މި ކުންފުނިތަކުން ވަނީ އާންމުންގެ މެދުގައި މަގުބޫލު އައިސްކްރީމްތަކުގެ އަގު އެތައް ފަހަރެއްގެ މަތިން ފަހަކާއި ދިހަޔަކާ ދެމެދުގެ އިންސައްތައަކުން ބޮޑުކޮށްފައެވެ. މި ބްރޭންޑްތަކަކީ މުޅި ޖަޕާނުގެ ސުޕަމާކެޓްތަކަށާއި ކޮންވީނިއަންސް ސްޓޯރުތަކަށް ހޯލްސޭލްކޮށް އައިސްކްރީމް ފޯރުކޮށްދޭ ކުންފުނިތަކެކެވެ.
މި މައްސަލައާ ގުޅިގެން މޮރިނާގާ މިލްކް، ގްލިކޯ އަދި މެއިޖީން ވަކިވަކިން ނެރުނު ބަޔާންތަކެއްގައި ބުނެފައިވަނީ ކަމާބެހޭ ފަރާތްތަކުގެ ތަހުގީގަށް ފުރިހަމައަށް އެއްބާރުލުން ދޭނެ ކަމަށެވެ. މެއިޖީން ބުނި ގޮތުގައި، އެންޓިމޮނޮޕޮލީ ގާނޫނާ ޚިލާފަށް އައިސްކްރީމްގެ އަގު ކަނޑައަޅާފައިވާ ކަމުގެ ތުހުމަތުގައި އެ ކުންފުނީގެ އޮފީސްތައް ބަލައި ފާސްކޮށްފައިވާ ކަމަށާއި، މިކަން ވަރަށް ސީރިއަސްކޮށް ނަގާ ކަމަށެވެ. އަދި ގްލިކޯއިން ވެސް ވަނީ ތަހުގީގަށް ފުރިހަމައަށް އެއްބާރުލުން ދޭނެކަން ހާމަކޮށްފައެވެ.
އައިސްކްރީމްގެ އަގު ބޮޑުކުރި މައްސަލަ ފެންމަތިވެފައި މިވަނީ، ޖަޕާނަށް އާދަޔާޚިލާފަށް ހޫނުގަދަ މޫސުމަކާ ކުރިމަތިލާން ޖެހިފައިވާ ދަނޑިވަޅެއްގައެވެ. ފާއިތުވި 2025 ވަނަ އަހަރަކީ ޖަޕާނުގެ ތާރީޚުގައި ވެސް އެންމެ ހޫނުގަދަ އަހަރު ކަމަށް ރެކޯޑުކުރެވިފައިވާއިރު، މި އަހަރުގެ ކުރީކޮޅު އެ ގައުމުން ވަނީ ފިނިހޫނުމިން 40 ޑިގްރީ ސެލްސިއަސްއަށް ވުރެ މައްޗަށް ދާ ދުވަސްތަކަށް ކިޔާނެ އާ ނަމެއް ތަޢާރަފުކޮށްފައެވެ.
"ކޮކުޝޯބީ" ގެ ނަމުން ނަންދީފައިވާ މި ލަފްޒުގެ މާނައަކީ "އާދަޔާޚިލާފަށް ހޫނުގަދަ" ދުވަސް ކަމަށް ޖަޕާނާއި ބައިނަލްއަގުވާމީ މީޑިއާތަކުން ތަރުޖަމާކޮށްފައިވެއެވެ.