ވޯލްޑް ކަޕްގެ ފުރަތަމަ މެޗުގައި މިއަދު ކޭޕް ވާޑޭއާ ދެކޮޅަށް ކުޅެން ސްޕެއިން ނުކުންނައިރު، އަނިޔާގެ ސަބަބުން ބާސެލޯނާގެ ސީޒަންގެ ފަހު މެޗުތައް ގެއްލުނު ޒުވާން ހުނަރުވެރި ވިންގަރ ލަމީން ޔަމާލް މެޗަށް ފިޓްވެފައިވާ ކަމަށް ސްޕެއިންގެ ހެޑް ކޯޗު ލުއިސް ޑެ ލަ ފުއެންޓޭ ކަށަވަރުކޮށްދީފިއެވެ.
މިދިޔަ އެޕްރީލް މަހު ފަލަމަސްގަނޑަށް ލިބުނު އަނިޔާއަކާ ގުޅިގެން ކުޅުމާ ދުރުގައި ހުރުމަށްފަހު، އުމުރުން އެންމެ 18 އަހަރުގެ ޔަމާލް ވަނީ މުބާރާތަށް ފިޓްވުމަށް ވަރަށް ބޮޑަށް މަސައްކަތް ކޮށްފައެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ކޯޗު ޑެ ލަ ފުއެންޓޭ ބުނީ، ޔަމާލް ހުރީ ޓީމުން އުއްމީދު ކުރި ފަދަ ހާލަތެއްގައި ކަމަށެވެ. އަދި އޭނާގެ އިތުރުން އަނިޔާގެ ކަންބޮޑުވުންތަކެއް ހުރި ނިކޯ ވިލިއަމްސް އާއި ވިކްޓަރ މުނޯޒް ވެސް މެޗަށް ތައްޔާރުވެފައިވާ ކަމަށް ކޯޗު ފާހަގަކުރިއެވެ.
ސްޕެއިންގެ ފަރިތަކުރުންތަކުގެ ތެރެއިން ކޯޗު އަދި ޔަމާލް--
ނަމަވެސް، އަނިޔާއިން ސަލާމަތްވިތާ ކުރު މުއްދަތެއް ވެފައިވުމުން، މެޑިކަލް ޓީމުގެ ލަފާގެ މަތިން ޔަމާލް އާއި ވިލިއަމްސް މުޅި މެޗުގައި ކުޅުމުގެ ބަދަލުގައި، އެ ކުޅުންތެރިން މެޗުގައި ހޭދަކުރާ ވަގުތު ވަރަށް ބޮޑަށް މެނޭޖު ކުރާނެ ކަމަށް ކޯޗު ބުންޏެވެ.
ދެ އަހަރު ކުރިން ޖަރުމަނުގައި ބޭއްވި ޔޫރޯ މުބާރާތް ކާމިޔާބުކުރި ސްޕެއިންގެ އަމާޒަކީ، ޔޫރަޕްގެ ތަޚުތާއި ދުނިޔޭގެ ތަޚުތު ޖެހިޖެހިގެން ހޯދި ހަތަރުވަނަ ގައުމަށްވުމެވެ.
2010 ވަނަ އަހަރުގެ ކާމިޔާބީއަށްފަހު ވޯލްޑް ކަޕްތަކުގައި އެ ގައުމުގެ ރެކޯޑުތައް ހުރީ ވަރަށް ދަށުގައެވެ. އެންމެ ފަހުން ބޭއްވި ދެ މުބާރާތުގައި ވެސް އެޓީމު ކަޓާފައިވަނީ ގަދަ 16 ގެ ބުރުން ޕެނަލްޓީ ޖަހައިގެންނެވެ.
މި ނޫސްވެރިންގެ ބައްދަލުވުމުގައި، ޗެލްސީއަށް ކުޅެމުންދާ ސްޕެއިންގެ ޑިފެންޑަރު މާކް ކުކުރެއްލާ ރެއާލް މެޑްރިޑަށް ބަދަލުވާން އުޅޭ ކަމަށް ދެކެވޭ ވާހަކަތަކަށް ވެސް ކޯޗު ވަނީ ރައްދުދީފައެވެ.
ޑެ ލަ ފުއެންޓޭ ބުނީ އެފަދަ ވާހަކަތަކުގެ ސަބަބުން ކުކުރެއްލާގެ ކުޅުމަށް އެއްވެސް ބަދަލެއް ނާންނާނެ ކަމަށާއި، އޭނާއަކީ މިވަގުތު ދުނިޔޭގައި ހުރި އެންމެ މޮޅު އެއް ވާތު ބެކް ކަމަށެވެ. އަދި ކުޅުންތެރިޔާއަށް ފައިދާހުރި ކޮންމެ ނިންމުމަކަށް ޓީމުން މަރުހަބާ ކިޔާނެ ކަމަށްވެސް ކޯޗު ބުންޏެވެ.
ފީފާ ވޯލްޑް ކަޕްގެ ގްރޫޕް އެޗްގައި ހިމެނޭ ސްޕެއިން އަދި ކޭޕް ވާޑޭ ބައްދަލުކުރާ ފޯރިގަދަ މެޗު ކުޅުމަށް ހަމަޖެހިފައިވަނީ މިރޭ ރާއްޖެ ގަޑިން 9:00 ގައެވެ.
އެމެރިކާގެ އެޓްލާންޓާ ސްޓޭޑިއަމްގައި ކުޅޭ މި މެޗަކީ މި ދެ ގައުމުން ވެސް މިފަހަރުގެ ވޯލްޑް ކަޕްގައި ކުޅޭ ފުރަތަމަ މެޗެވެ.