ދުނިޔޭގެ ފުޓްބޯޅަ ތާރީޚު ދުށް އެންމެ ވަރުގަދަ އެއް ޝަޚުޞިއްޔަތު، ކްރިސްޓިއާނޯ ރޮނާލްޑޯ މިފަހަރުގެ 2026 ގެ ފީފާ ވޯލްޑް ކަޕަށް ކުރިމަތިލާއިރު، އޭނާ ހުރީ ޕޯޗުގަލްގެ ފުޓްބޯޅަ ތާރީޚުގައި މުޅިން އާ ރެކޯޑެއް ގާއިމުކުރުމާ ވަރަށް ގާތުގައެވެ.
ވޯލްޑް ކަޕް މުބާރާތްތަކުގައި ޕޯޗުގަލްއަށް އެންމެ ގިނަ ލަނޑު ޖަހައިދީގެން ރެކޯޑު ހަދާފައިވާ މަޝްހޫރު ކުޅުންތެރިޔާ އެއުސެބިއޯގެ ލަނޑުގެ އަދަދާ ހަމަކުރުމަށް ރޮނާލްޑޯއަށް މިހާރު ބޭނުންވަނީ އެންމެ ލަނޑެކެވެ.
އެއުސެބިއޯ 1966 ވަނަ އަހަރުގެ ވޯލްޑް ކަޕްގައި 9 ލަނޑު ޖަހާފައިވާއިރު، ރޮނާލްޑޯ މިހާތަނަށް ވަނީ ވޯލްޑް ކަޕްގައި 8 ލަނޑު ކާމިޔާބުކޮށްފައެވެ. އެހެންކަމުން މިފަހަރުގެ މުބާރާތުގައި ޖަހާ ފުރަތަމަ ލަނޑާއެކު އޭނާ ލެޖެންޑް އެއުސެބިއޯގެ ރެކޯޑާ ހަމަކުރާނެއެވެ. ކޮންގޯއާ ދެކޮޅަށް ޕޯޗުގަލް ކުޅޭ ފުރަތަމަ މެޗުގައި އެ ޝަރަފް ހޯދުމުގެ ފުރުސަތު ރޮނާލްޑޯއަށް އެބައޮތެވެ.
ރޮނާލްޑޯއަކީ ވޯލްޑް ކަޕްގެ ތާރީޚުގައިވެސް ފާހަގަކޮށްލެވޭ ފަދަ ޚާއްޞަ ކާމިޔާބީތަކެއް ހާސިލުކޮށްފައިވާ ކުޅުންތެރިއެކެވެ. އޭނާގެ ވޯލްޑް ކަޕް ދަތުރު ފެށުނީ 2006 ވަނަ އަހަރު ޖަރުމަނުވިލާތުގައި ބޭއްވުނު މުބާރާތުންނެވެ.
ޕޯޗުގަލްގެ ފަރިތަކުރުންތަކުގެ ތެރެއިން ކްރިސްޓިއާނޯ ރޮނާލްޑޯ--
އޭގެ ފަހުން 2010، 2014، 2018، އަދި 2022 ގެ ވޯލްޑް ކަޕްގައި އޭނާ ވަނީ ލަނޑު ޖަހާފައެވެ. މިއާއެކު އޭނާ ވެފައިވަނީ ދުނިޔޭގެ ފުޓްބޯޅަ ތާރީޚުގައި ތަފާތު 5 ވޯލްޑް ކަޕެއްގައި ލަނޑު ޖެހި ހަމައެކަނި ކުޅުންތެރިޔާ އަށެވެ.
ބައިނަލްއަގުވާމީ ފުޓްބޯޅައިގައި އެންމެ ގިނަ މެޗު ކުޅެ، އެންމެ ގިނަ ލަނޑު ޖެހުމުގެ ޝަރަފްވެސް އޮތީ ރޮނާލްޑޯ އަށެވެ. އޭނާ ވަނީ ގައުމީ ޓީމަށް ކުޅުނު 228 މެޗުން 143 ލަނޑު ކާމިޔާބުކޮށްފައެވެ. މީގެ އިތުރުން ޔޫރޯ މުބާރާތްތަކުގައި 14 ލަނޑު ޖަހައިގެން އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑުވެސް އޮތީ އޭނާގެ އަތުގައެވެ.
މިއަހަރު އެމެރިކާ، މެކްސިކޯ އަދި ކެނެޑާގައި ކުރިއަށްދާ ފީފާ ވޯލްޑް ކަޕްގައި ޕޯޗުގަލް ވާދަކުރަނީ ގްރޫޕް ކޭ ގައެވެ.
މި ގްރޫޕްގައި ޕޯޗުގަލްގެ އިތުރުން ދެން ހިމެނެނީ ދެކުނު އެމެރިކާގެ ބާރެއް ކަމަށްވާ ކޮލަމްބިއާއާއި، އެފްރިކާގެ ކޮންގޯގެ އިތުރުން އޭޝިއާގެ އުޒްބެކިސްތާނެވެ. ކޯޗު ރޮބާޓޯ މާޓިނޭޒްގެ އިރުޝާދުގެ ދަށުން ނުކުންނަ ޕޯޗުގަލް ޓީމަކީ ޒުވާން ހުނަރުވެރި ކުޅުންތެރިންނާއި ތަޖުރިބާކާރު ކުޅުންތެރިން ހިމެނޭ ވަރުގަދަ ސްކޮޑެކެވެ. މިއީ ވޯލްޑް ކަޕްގެ ތާރީޚުގައި ޕޯޗުގަލް ވާދަކުރާ 9 ވަނަ ފަހަރެވެ.
މިފަހަރުގެ މުބާރާތުގައި ރޮނާލްޑޯއަށް އެތައް އާ ރެކޯޑުތަކެއް މުގުރާލުމުގެ ފުރުސަތު އެބައޮތެވެ. އެގޮތުން މިއަހަރުގެ މުބާރާތުގައި ދަނޑަށް ނުކުތުމާއެކު، އޭނާ ވެގެންދާނީ ދުނިޔޭގެ ފުޓްބޯޅަ ތާރީޚުގައިވެސް 6 ވޯލްޑް ކަޕް މުބާރާތެއްގައި ކުޅޭ ފުރަތަމަ ކުޅުންތެރިޔާ އަށެވެ.
ހަމައެއާއެކު އެއުސެބިއޯގެ 9 ލަނޑުގެ ރެކޯޑު މުގުރާލުމަށް ރޮނާލްޑޯއަށް ބޭނުންވަނީ އެންމެ 2 ލަނޑެވެ. މީގެ އިތުރުން ރޮނާލްޑޯގެ މުޅި ކެރިއަރުގައި ރަސްމީ މެޗުތަކުގައި 1000 ލަނޑު ހަމަކުރުމާ ވަރަށް ގާތަށް ވަނީ ޖެހިލާފައެވެ.
އުމުރުން 41 އަހަރުގައިވެސް ރޮނާލްޑޯ ދައްކަމުންދާ ހިތްވަރާއި ފެންވަރާއެކު، މިއަހަރުގެ ވޯލްޑް ކަޕަކީ އޭނާގެ ފުޓްބޯޅަ ހަޔާތުގެ އެންމެ ފަހު އަދި އެންމެ ކާމިޔާބު ސަފުހާއަށްވުމަކީ އެކަށީގެންވާ ކަމެކެވެ.