ޔޫއެސްބީ ކޭބަލްތަކާއި ޕޯޓްތަކުގެ އެތެރެއިން އާންމުކޮށް ފެންނަ ކަޅު، ހުދު ނުވަތަ ނޫ ކުލައިގެ ބަދަލުގައި ބައެއް ފަހަރު ދަނބު ނުވަތަ ޕާޕަލް ކުލަ ފެނުމުން މިއީ ކީއްވެގެން ހުންނަ ކުލައެއް ބާވައޭ ގިނަ ބައެއްގެ ހިތަށް އަރައެވެ.
މިގޮތަށް ޕޯޓްތައް ދަނބު ކުލައިގައި ހުންނަނީ ހަމައެކަނި ރީތިކޮށްލާކަށް ނޫނެވެ. މިއީ އެ ކޭބަލަކުން ނުވަތަ ޕޯޓަކުން ފޯރުކޮށްދޭ ޑޭޓާ ޓްރާންސްފާ ކުރާ ދުވެއްޔާއި، ފޯނު ފަދަ ތަކެތި ޗާޖުކޮށްދޭ މިންވަރުގެ މަތިކަން ރަމްޒުކޮށްދޭ ސިފައެކެވެ.
ޔޫއެސްބީގެ މިންގަނޑުތައް ކަނޑައަޅާ ބައިނަލްއަގުވާމީ އިދާރާ ކަމަށްވާ ޔޫއެސްބީ އިމްޕްލިމެންޓާސް ފޯރަމް (ޔޫއެސްބީ-އައިއެފް) އިން ރަސްމީކޮށް ބޭނުންކުރަނީ ހުދު، ކަޅު އަދި ނޫ ކުލައެވެ.
އެހެންކަމުން ދަނބު ނުވަތަ އޮރެންޖު ފަދަ ކުލަތަކަކީ އެ އިދާރާގެ ރަސްމީ މިންގަނޑުތަކުގެ ތެރޭގައި ހިމެނޭ ކުލަތަކެއް ނޫނެވެ. ނަމަވެސް، މިއީ ބައެއް ކުންފުނިތަކުން އެ މީހުންގެ އަމިއްލަ ޓެކްނޮލޮޖީ ފާހަގަކުރުމަށް ބޭނުންކުރާ ނުރަސްމީ ސިފައެކެވެ.
ކޭބަލްތަކުގެ ކުލައަށް އެކަނި ބަލައިގެން އެއީ ފެންވަރު ރަނގަޅު އެއްޗެއްކަން ކަނޑައެޅުމަކީ ރައްކާތެރިކަމެއް ނޫން ---
މިގޮތުން ދަނބު ކުލަ އެންމެ ބޮޑަށް ގުޅިފައިވަނީ ޗައިނާގެ ހުއާވޭ ކުންފުނީގެ "ސުޕަޗާޖް" ޓެކްނޮލޮޖީއާއެވެ. މި ޕޯޓްތަކުން 40 ވޮޓަށްވުރެ މަތިން ފޯނު އަވަހަށް ޗާޖުކޮށްދިނުމުގެ ގާބިލުކަން ލިބިގެންވެއެވެ.
މީގެ އިތުރުން، ބައެއް އެހެން ކުންފުނިތަކުން ވެސް ޔޫއެސްބީ 3.1 ގެ ހައި-ސްޕީޑް (10ޖީބީޕީއެސް) ކޭބަލްތައް ފާހަގަކުރުމަށް ދަނބު ކުލަ ބޭނުންކުރެއެވެ.
އެމެރިކާ ފަދަ ގައުމުތަކުގައި މިފަދަ ދަނބު ކުލައިގެ ޔޫއެސްބީ ޕޯޓްތައް ފެނުން މަދީ، ވިޔަފާރީގެ ދަތިކުރުމުގެ ފިޔަވަޅުތަކުގެ ސަބަބުން ހުއާވޭގެ އުފެއްދުންތައް އެ ގައުމުގައި ރަސްމީކޮށް ވިއްކުން މަނާވެފައިވުމުންނެވެ. އަދި މިހާރު ހުއާވޭ އިން ވެސް ދަނބު ކުލައިގެ ބަދަލުގައި އޮރެންޖު ކުލަ ބޭނުންކުރަން ފަށާފައިވުމަކީ ވެސް މި ކުލަ ފެނުން މަދުވާ ސަބަބެކެވެ.
ކޭބަލްތަކުގެ ކުލައަށް އެކަނި ބަލައިގެން އެއީ ފެންވަރު ރަނގަޅު އެއްޗެއްކަން ކަނޑައެޅުމަކީ ރައްކާތެރިކަމެއް ނޫން ކަމަށް ތަޖުރިބާކާރުން ބުނެއެވެ. އޮޅުވާލުމުގެ ގޮތުން ދެރަ ކޭބަލްތަކުގައި ވެސް މިފަދަ ކުލަތައް ބޭނުންކޮށްފައި ހުރެދާނެއެވެ.
އެހެންކަމުން ކޭބަލެއް ބައްލަވައިގަންނައިރު، އެއީ ޔޫއެސްބީ-އައިއެފް ސެޓިފައިޑް ކޭބަލެއްތޯ ބެލުމަކީ ބެޓެރީ ހަލާކުވުމާއި އަލިފާނުގެ ހާދިސާތަކުން ރައްކާތެރިވުމަށް އެންމެ އެދެވިގެންވާ ގޮތެވެ.