ދުނިޔޭގެ ލޭ ހަދިޔާކުރާ މީހުންގެ ދުވަހާ ގުޅިގެން، އަމިއްލަ އިޚުތިޔާރުގައި ލޭ ހަދިޔާކުރާ މީހުން ކުރާ އަގުހުރި މަސައްކަތް ފާހަގަކުރައްވައި، އެކަން އިތުރަށް ކުރިއެރުވުމަށް ސަރުކާރުން އަހަންމިއްޔަތު ދެއްވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަ ކުރައްވައިފިއެވެ.
ރައީސްގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވީ، އަމިއްލަ އެދުމެއް ނެތި ލޭ ހަދިޔާކުރާ މީހުންގެ ސަބަބުން، އުމުރުދުވަހަށް ބޭސްފަރުވާ ބޭނުންވާ މީހުންނާއި ކުއްލި ފަރުވާ ބޭނުންވާ ބަލިމީހުންނަށް އެންމެ ބޭނުންތެރި ވަގުތުގައި އެހީތެރިކަން ލިބިގެންދާ ކަމަށެވެ. އަދި ބޭސްވެރިކަމާއި ޓެކްނޮލޮޖީގެ ރޮނގުން ކިތަންމެ ބޮޑު ކުރިއެރުމެއް ހޯދާފައިވީ ނަމަވެސް، ލެޔަކީ އޭގެ ބަދަލުގައި އެހެން އެއްޗެއް ބޭނުންކުރެވެން ނެތް މުހިންމު ވަސީލަތެއްކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި، އާންމު ސިއްހަތު ރައްކާތެރިކުރުމަށާއި، ސިއްހީ ފަރުވާ އެންމެ ފުރިހަމަ ގޮތުގައި ފޯރުކޮށްދިނުމަށާއި، ގައުމީ ފެންވަރުގައި ކުއްލި ހާލަތްތަކަށް ތައްޔާރުވެފައިވާ މިންވަރު ހަރުދަނާކުރުމަށްޓަކައި އަމިއްލަ އިޚުތިޔާރުގައި ލޭ ހަދިޔާކުރުމަކީ ކޮންމެހެން ބޭނުންތެރި ކަމެކެވެ. މީގެ އިތުރުން، ދިވެހިރާއްޖެ ފަދަ ޖަޒީރާ ގައުމެއްގައި، ސިއްހީ ކުއްލި ހާލަތްތަކުގައި ވަގުތުން ވަގުތަށް ލޭ ލިބެން ހުރުމަކީ ފުރާނަ ސަލާމަތްކުރުމަށް ވަރަށް މުހިންމު ކަމެއްކަން އެމަނިކުފާނު ފާހަގަކުރެއްވިއެވެ. އެހެންކަމުން، ދިވެހިންގެ ސިއްހަތާއި ދުޅަހެޔޮކަން ރައްކާތެރިކުރުމުގައި އެންމެން ގުޅިގެން މަސައްކަތްކުރުމުގެ ސަގާފަތެއް އާލާކުރުމުގެ މުހިންމުކަމުގެ މައްޗަށް ރައީސް އަލިއަޅުއްވާލެއްވިއެވެ.
ރައީސް ތެލެސީމިއާ ސެންޓަރުގައި: އެ މަނިކުފާނު ވަނީ ތަފާތު ކުރުމެއްނެތި، ކޮންމެ ފުރުސަތެއް ތެލެސީމިއާ ކުދީންނަށް ފަހިކޮށް ދޭން ޖެހޭ ކަމަށް ވިދާޅުވެފައި -- ފޮޓޯ/ ރައީސް އޮފީސް
މި ދުވަހާ ގުޅިގެން ފަސްޓް ލޭޑީ ސާޖިދާ މުޙައްމަދު ވެސް ވަނީ އެކަމަނާގެ ރަސްމީ އެކްސް އެކައުންޓުގައި ޕޯސްޓެއް ކުރައްވައި، ލޭ ހަދިޔާކުރާ ފަރާތްތަކުގެ އޯގާތެރިކަމުގެ އަގުވަޒަންކުރައްވާފައެވެ. އެކަމަނާ ވިދާޅުވީ، އަމިއްލަ އެދުމެއް ނެތި ލޭ ހަދިޔާކުރާ މީހުންގެ އެ އަމަލުގެ ސަބަބުން، ބަލިމީހުންނާއި އެ މީހުންގެ އާއިލާތަކަށް ކުރިމަތިވާ އެންމެ އުނދަގޫ ވަގުތުތަކުގައި އުންމީދު ގެނެސްދޭ ކަމަށެވެ.
ފަސްޓް ލޭޑީ ފާހަގަކުރެއްވި ގޮތުގައި، ލޭ ހަދިޔާކުރާ ކޮންމެ ފަހަރެއްގެ ފަހަތުގައި ވަނީ އޯގާތެރިކަމުގެ ވާހަކައެކެވެ. އަދި ކްރިޓިކަލް ކެއާގައި ފަރުވާ ހޯދަމުންދާ ބަލިމީހުންނާއި އެ މީހުންގެ އާއިލާތަކަށް، ލޭ ހަދިޔާކުރާ މީހެއްގެ އެހީތެރިކަމަކީ ބިރުވެރިކަމާއި އުންމީދާ ދެމެދު އޮންނަ ފަރަގު ކަމުގައި ވެދާނެކަން އެކަމަނާ ފާހަގަކުރެއްވިއެވެ.
މީހެއްގެ ފުރާނަ ސަލާމަތްކުރުމަށް އަބަދުވެސް ބޮޑެތި ކަންތައްތަކެއް ކުރުން ލާޒިމު ނޫން ކަމަށާއި، އޯގާތެރިކަމުގެ ކުޑަކުޑަ އަމަލަކުން ވެސް މީހެއްގެ ދިރިއުޅުމަށް ވަރަށް ބޮޑު ބަދަލެއް ގެނެސްދެވިދާނެކަމަށް ސާޖިދާ ވިދާޅުވިއެވެ.