ކުރީ ޒަމާނުގައި މީހުން ކައިބޮއި އުޅުނީ ވަކި މާއްދާއަކަށް މާބޮޑު ސަމާލުކަމެއް ދީގެނެއް ނޫނެވެ. ލިބެން ހުންނަ ތާޒާ ކާނާ ބޭނުންކުރުމަކީ އޭރުގެ އާދައެވެ. ނަމަވެސް މިއަދުގެ ޒަމާނީ ދިރިއުޅުމުގައި، ހަށިގަނޑަށް ބޭނުންވާ މާއްދާތަކުގެ ތެރެއިން ވަކި މާއްދާއަކަށް މީހުން ދޭ ސަމާލުކަން ވަނީ ވަރަށް ބޮޑަށް އިތުރުވެފައެވެ. ޚާއްސަކޮށް ބަރުދަން ލުއިކުރުމަށާއި ހަށިގަނޑު ރީތިކޮށް ބެހެއްޓުމުގެ ނަމުގައި، ޕްރޮޓީން ގިނައިން އެކުލެވޭ ކާނާ ކެއުމަކީ މިހާރު ވަރަށް އާންމު ޓްރެންޑެކެވެ.
އެހެންނަމަވެސް، ސިއްހީ ދާއިރާގެ ލިޔުންތައް ޝާއިއުކުރާ 'ހެލްތްލައިން' އިން ރިޕޯޓުކޮށްފައިވާ ގޮތުގައި، ޕްރޮޓީންއެކޭ އެއްފަދައިން ފައިބަރަކީ ވެސް ހަށިގަނޑަށް ކޮންމެހެން ބޭނުންތެރި، އަދި ގިނަ ފަހަރަށް އަޅައިނުލެވޭ މުހިންމު މާއްދާއެކެވެ.
ޕްރޮޓީންއަކީ ހަށިގަނޑުގެ މަސްތަކާއި ގުނަވަންތައް އުފެދުމަށާއި މަރާމާތުވުމަށް އެހީތެރިވެދޭ މެކްރޯނިއުޓްރިއެންޓެކެވެ. ކެއުމުގައި ހިމެނޭ ޕްރޮޓީން ހަށިގަނޑުގެ ތެރޭގައި އަމިނޯ އެސިޑްތަކަށް ބަދަލުވެ، ސެލްތަކަށް ހަކަތަ ފޯރުކޮށްދެއެވެ. މީގެ އިތުރުން، އުމުރުން ދުވަސްވަމުންދާ ވަރަކަށް މަސްތައް ވިރުން ކުޑަކޮށްދިނުމަށާއި، ކަށިތައް ވަރުގަދަކުރުމަށް ވެސް ޕްރޮޓީން އެހީތެރިވެދޭކަމަށް ދިރާސާތަކުން ދައްކައެވެ. ގިނަ މީހުންނަށް ދުވަހެއްގެ މައްޗަށް ބޭނުންވާ ވަރަށް ޕްރޮޓީން ކެއުމުގައި ހިމެނޭކަމަށް ތަފާސްހިސާބުތަކުން ދައްކައެވެ. ޕްރޮޓީން ލިބޭ އާންމު ކާނާގެ ތެރޭގައި ކުކުޅު، ރަތް މަސް، ކަނޑުމަސް، ބިސް، ކިރު އަދި މުގުގެ ބާވަތްތައް ހިމެނެއެވެ.
އަނެއްކޮޅުން، ފައިބަރަކީ ގިނަ ބަޔަކަށް ފަރުވާކުޑަކޮށްލެވޭ މާއްދާއެކެވެ. އެމެރިކާގެ ތަފާސްހިސާބުތަކާ ހަވާލާދީ ހެލްތްލައިންގައި ބުނެފައިވާ ގޮތުގައި، އާބާދީގެ 94 އިންސައްތަ މީހުންނަށް ދުވަހެއްގެ މައްޗަށް ބޭނުންވާ ވަރާ ގާތަށް ވެސް ފައިބަރު ނުލިބެއެވެ. ފައިބަރަކީ ހަޖަމުކުރުމުގެ ނިޒާމު ރަނގަޅުކޮށްދީ، ބަނޑުހިކުމުން ސަލާމަތްކޮށްދޭ މާއްދާއެކެވެ. މީގެ އިތުރުން، ލޭގައި ހަކުރު ހުންނަ މިންވަރު ކޮންޓްރޯލްކުރުމަށާއި، ހިތުގެ ބަލިތަކާއި ކޮލެސްޓްރޯލް ދަށްކުރުމަށް ވެސް ފައިބަރު މުހިންމު ދައުރެއް އަދާކުރެއެވެ.
ބައެއް ދިރާސާތަކުން ދައްކާ ގޮތުގައި ފައިބަރު ގިނައިން ބޭނުންކުރުމަކީ ހަށިގަނޑުގައި އުފެދޭ ދުޅަތައް ކުޑަކޮށްދީ، ޑިޕްރެޝަން ފަދަ ނަފްސާނީ މައްސަލަތަކުން ވެސް ދުރުކޮށްދޭ ކަމެކެވެ.
މި ދެ މާއްދާގެ ތެރެއިން ވަކި މާއްދާއަކަށް އިސްކަންދިނުމުގެ ބަދަލުގައި، ކެއުމުގައި ދެ މާއްދާ ވެސް އެކުލެވޭނެހެން ކެއުން ބައްޓަންކުރުމަށް ސިއްހީ މާހިރުން ލަފާދެއެވެ. މިގޮތުން ކެއުމުގައި ހިމެނިދާނެ ބައެއް ރަނގަޅު ބާވަތްތައް ތިރީގައި އެވަނީއެވެ:
ހެނދުނުގެ ނާސްތާ: އޯޓްސް އާއެކު ތާޒާ މޭވާ އަދި ޗިއާ ސީޑްސް ބޭނުންކުރުން.
މެންދުރުގެ ކެއުން: ބްރައުން ރައިސް އާއެކު ކުކުޅު ނުވަތަ މަސް، އަދި ގިނައިން ތަރުކާރީ ހިމެނުން.
ރޭގަނޑުގެ ކެއުން: މުގު ނުވަތަ ބީންސް ހިމެނޭ ސެލެޑަކާއެކު ފިހުނު މަސްކޮޅެއް ބޭނުންކުރުން.
ނަމަވެސް، ކޮންމެ އެއްޗެއް ވެސް މާގިނައިން ބޭނުންކުރުމަކީ ގެއްލުންވެދާނެ ކަމެކެވެ. އެމެރިކަން ހާޓް އެސޯސިއޭޝަނާ ހަވާލާދީ ރިޕޯޓުގައި ފާހަގަކޮށްފައިވާ ގޮތުގައި، ޖަނަވާރުން ލިބޭ ޕްރޮޓީން މާގިނައިން ކެއުމަކީ ކޮލެސްޓްރޯލް މައްޗަށް ގޮސް، ކިޑްނީގެ މައްސަލަތަކަށް މަގުފަހިވެދާނެ ކަމެކެވެ. ހަމައެފަދައިން، ކުއްލިއަކަށް މާގިނައިން ފައިބަރު ބޭނުންކުރަން ފެށުމުން ބަނޑަށް އުނދަގޫވުމާއި ގޭސްޓްރިކް މައްސަލަތައް ދިމާވުން އެކަށީގެންވެއެވެ.
އެހެންކަމުން، ދުޅަހެޔޮ ސިއްހަތެއްގައި ހުރުމަށްޓަކައި އެންމެ މުހިންމީ ހުރިހާ ބާވަތެއްގެ ކާނާ ވެސް އެކަށީގެންވާ މިންވަރަކަށް ހިމެނޭ ބެލެންސްޑް ޑައިޓެއް ޚިޔާރުކުރުމެވެ. ޕްރޮޓީން އާއި ފައިބަރަކީ ވެސް ހަށިގަނޑުގެ ތަފާތު މަސައްކަތްތަކަށް ބޭނުންތެރި ދެ މާއްދާއަށް ވާއިރު، ކޮންމެ ދުވަހެއްގެ ކެއުމުގައި ވެސް މި ދެ ބާވަތް ހިމެނުމަށް އާދަކުރުމަކީ ދިގު މުއްދަތެއްގައި ސިއްހަތަށް އޭގެ އެންމެ ހެޔޮ ފައިދާ ކުރާނެ ކަމެކެވެ.