ބޮޑު ކާސްޓަކާ އެކު ޑައިރެކްޓަރު އަހްމަދު ޚާން ގެނެސްދޭ ފިލްމު "ވެލްކަމް ޓު ދަ ޖަންގަލް"ގެ ޓްރެއިލާ ދައްކާލައިފިއެވެ.
މި މަހު 26ގައި ސިނަމާތަކަށް ގެންނަ މި ފިލްމަކީ، ޕްރޮޑިއުސަރު ފީރޯޒް ނަދިއަދުވާލާ ގެނެސްދެމުން އަންނަ "ވެލްކަމް" ފްރެންޗައިޒްގެ ތިން ވަނަ ބައެވެ.
ހަތަރު މިނެޓުގެ ޓްރެއިލާގައި ހެއްވާ މަޖާ ގިނަ ހާދިސާތައް އެކުލެވޭއިރު މިފަހަރުގެ ފިލްމުގެ ވާހަކަ ބިނާކޮށްފައި ވަނީ، މީހުން ދިރިއުޅޭ ސިޓީތަކާ ދުރަށް ބިޔަ ޖަންގަޔެއްގައި ހިނގާ ހާދިސާތަކެއްގެ މައްޗަށެވެ.
ތިން ވަނަ ފިލްމުގެ މުހިއްމު ރޯލަކުން އަކްޝޭ ކުމާރު ފެންނާނެއިރު، މި ފިލްމުގެ ކާސްޓުންގެ ލިސްޓުވެސް އެހާމެ ދިގެވެ. އެގޮތުން ފިލްމުން ފެންނާނެ އިތުރު ތަރިންގެތެރޭ، ސުނިލް ޝެޓީ، ރަވީނާ ޓަންޑަން، ސަންޖޭ ދަތު، ޑިޝާ ޕަޓާނީ، އަފްތާބް ޝިވްދަސާނީ، ޖެކްލީން ފެނާންޑޭޒް، ތުޝާރް ކަޕޫރު، އަރުޝަދު ވަރްސީ، މަނޫޝީ ޗިލާ، ރަންދީޕް ހޫޑާ، ލާރާ ދައްތާ، ޝްރެޔަސް ތަލްޕަޅޭ، ޝާރިބް ހާޝީމީ، ޕަރޭޝް ރާވަލް، ސުޕްރިޔާ ކަރްނިކާ، ރާޖްޕަލް ޔާދަވް، ޖޯނީ ލީވާ، ފަރީދާ ޖަލާލް، ޕުނީތު އިސާރް އަދި މަނޯޖް ޕަހްވާ ހިމެނެއެވެ.
"ވެލްކަމް ޓު ދަ ޖަންގަލް"ގެ ޓްރެއިލާގެ މަންޒަރެއްގައި އަކްޝޭ އަދި ތުޝާރު--ފޮޓޯ/މިޑްޑޭ
މި ފްރެންޗައިސްގެ ދަށުން އެންމެފަހުން ބެލުންތެރިންނަށް ގެނެސްދިން ފިލްމަކީ، 2015 ވަނަ އަހަރު ރިލީޒްކުރި ފިލްމު "ވެލްކަމް ބެކް"އެވެ. ޑައިރެކްޓަރު އަނީސް ބަޒްމީ ގެނެސްދިން އެ ފިލްމުގެ ކާސްޓުގައި އަނިލް ކަޕޫރު، ނާނާ ޕަޓޭކަރު، ޖޯން އަބްރަހަމް، ޝްރުތީ ހާސަން، ޝައިނީ އަހޫޖާ އަދި ޑިމްޕަލް ކަޕާޑިއާ ތަރިން ހިމެނެއެވެ.