ޙައްޖުގެ މަތިވެރި އަޅުކަން އަދާކުރުމަށްފަހު ދިވެހި ޙައްޖާޖީންގެ ފަހު ގްރޫޕް ރޭ މާލެ އައުމާއެކު، މިއަހަރު ރާއްޖެއިން ޙައްޖަށް ދިޔަ ހުރިހާ ޙާޖީން އެނބުރި ގައުމަށް އައިސް ނިމިއްޖެއެވެ.
ގައުމީ އެއާލައިން މޯލްޑިވިއަންގެ ފްލައިޓެއްގައި ރޭ ރާއްޖެ އައި މި ގްރޫޕުގައި 261 ޙާޖީން ހިމެނެއެވެ.
މަދީނަތުލް މުނައްވަރާގެ އަމީރު މުޙައްމަދު ބިން އަބްދުލްޢަޒީޒް އިންޓަނޭޝަނަލް އެއާޕޯޓުން ފުރައިގެން ސީދާ ވެލާނާ އިންޓަނޭޝަނަލް އެއާޕޯޓަށް ދަތުރުކުރި މި ފްލައިޓް ޖައްސާފައިވަނީ ރޭ 10:40 ހާއިރުއެވެ.
ވެލާނާ އެއާޕޯޓުން ޙައްޖުވެރިންނަށް އެމީހުންގެ ޢާއިލާތަކުން ވަނީ ހޫނު މަރުހަބާއެއް ކިޔާފައެވެ.
ޙައްޖުވެރިންނަށް އެއާޕޯޓުން ފަސޭހަ އިންތިޒާމުތަކެއް ހަމަޖައްސާފައިވާއިރު، އަވަހަށް އުޅަނދުތައް ހޯދުމަށާއި ދާގީނާ އުފުލުމުގައި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާއި އެކި އިދާރާތަކުގެ މުވައްޒަފުން ވަނީ އެހީތެރިކަން ފޯރުކޮށްދީފައެވެ.
ރާއްޖެއިން މިފަހަރު ޙައްޖަށް ދިޔަ ކޮންމެ ގްރޫޕެއް ސައުދީ އަރަބިއްޔާގައި ތިން ހަފުތާ ހޭދަކޮށްފައިވާއިރު، މައްކާގެ އިތުރުން މަދީނާގައިވެސް ދެ ދުވަސް މަޑުކޮށްފައިވެއެވެ.
ދިވެހި ޙައްޖު މިޝަނުން ބުނި ގޮތުގައި، ޙައްޖު ކޯޕަރޭޝަނުގެ އިންތިޒާމުތަކާއެކު މިއަހަރުގެ ޙައްޖުގެ ކަންކަން ކުރިއަށްދިޔައީ ވަރަށް އަމާންކަމާއި އޮމާންކަމާއެކު ފުރިހަމައަށެވެ.
މިއަހަރުވެސް ދިވެހި ޙައްޖުވެރިން ސައުދީއަށް ދަތުރުކުރީ "މައްކާ ރޫޓް އިނީޝިއޭޓިވް" ގެ ދަށުންނެވެ.
މީގެ ސަބަބުން ރާއްޖެއިން އިމިގްރޭޝަންގެ ހުރިހާ ކަމެއް ނިންމާލުމަށްފަހު، ޖިއްދާ އެއާޕޯޓުގައި މަޑުކުރަން ނުޖެހި ސީދާ މައްކާއަށް ދިއުމުގެ ފުރުސަތު ޙައްޖުވެރިންނަށް ލިބިގެންދިޔައެވެ.
ކޮންމެ އަހަރަކުވެސް ރާއްޖެއަށް ލިބޭ 1000 ކޯޓާގެ ދަށުން ޙައްޖަށް ދިއުމަށް ފައިސާ ދައްކާފައިވާ ފަރާތްތައް ފޮނުވަމުންދަނީ ކިއު ތަރުތީބުންނެވެ.
މި ފަހަރުގެ ޙައްޖު ދަތުރަކީވެސް އެ އުސޫލުގެ ދަށުން އިންތިޒާމުކުރެވުނު ކާމިޔާބު ދަތުރެއްކަން ފާހަގަކުރެވެއެވެ.