މިއަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕް ފުޓްބޯޅަ މުބާރާތުގައި ވާދަކުރާ އީރާނުގެ ގައުމީ ޓީމަކީ އެމެރިކާއާ ދެކޮޅަށް ފިކުރީ ހަނގުރާމައެއް ރާވަމުންދާ ބައެއް ކަމަށް ބުނެ، އެ ޓީމުގެ ކުޅުންތެރިންނަށް ދޫކޮށްފައިވާ ވިސާ ބާތިލްކުރުމަށް އެމެރިކާގެ ހާރިޖީ ވަޒީރު މާކޯ ރޫބިއޯއަށް ވޮޗްޑޮގް ޖަމާއަތަކުން ގޮވާލައިފިއެވެ.
ޔުނައިޓެޑް އެގެއިންސްޓް ނިއުކްލިއާ އީރާން (ޔޫއޭއެންއައި) އިން ފޮނުވި މި ސިޓީގައި ބުނެފައިވަނީ، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) ގެ ކޮމާންޑަރަކު ޓީމު ފުރުވުމުގެ ރަސްމިއްޔާތުގައި މި މުބާރާތަކީ ހަނގުރާމައިގެ މައިދާނެއް ކަމަށް ސިފަކޮށްފައިވާ ކަމަށެވެ. އަދި އީރާނުގެ ސަރުކާރުން މި މުބާރާތުގެ ބޭނުން ހިފައިގެން އެމެރިކާއަށް ނުރައްކާކުރަން އުޅޭކަމުގެ ހެކި އެބަހުރި ކަމަށްވެސް އެ ޖަމާއަތުން ވަނީ ތުހުމަތުކޮށްފައެވެ.
މި މައްސަލައިގެ ހޫނުކަން ބޮޑުވެފައިވާއިރު، އެމެރިކާ ސަރުކާރުން މިހާރުވެސް ވަނީ އީރާނު ޓީމުގެ ސަޕޯޓް ސްޓާފުންގެ ތެރެއިން 12 އަށްވުރެ ގިނަ މީހުންނަށް ވިސާ ދިނުން ހުއްޓުވާފައެވެ.
އީރާނުގެ ގައުމީ ފުޓުބޯޅަ ޓީމު--
އޭގެ ތެރޭގައި އައިއާރްޖީސީއާ ގުޅުންހުރި ކަމަށް ތުހުމަތު ކުރެވޭ ފަރާތްތައް ހިމެނެއެވެ. ޓީމުގެ ކުޅުންތެރިންނަށް އެމެރިކާއަށް އެތެރެވުމުގެ ވިސާ ލިބިފައިވީ ނަމަވެސް، ވިސާގެ ލަސްވުންތަކާ ހުރެ އެމެރިކާގެ އެރިޒޯނާގައި ކޭމްޕް ކުރުމަށް ރޭވި ރޭވުން ބަދަލުކޮށް، މިހާރު ޓީމު ގޮސްފައިވަނީ މެކްސިކޯގެ ޓިހުއާނާއަށެވެ.
މެކްސިކޯގެ ރައީސް ކްލައުޑިއާ ޝީންބައުމް ވަނީ އީރާނު ޓީމަށް އެ ގައުމުގައި ބޭސް ކޭމްޕް ހެދުމުގެ ފުރުސަތު ދެއްވާފައެވެ. އީރާނުން މުބާރާތުގެ ގްރޫޕް ސްޓޭޖް މެޗުތައް ކުޅެން ހަމަޖެހިފައިވަނީ އެމެރިކާގެ ކެލިފޯނިއާ އަދި ވޮޝިންގްޓަންގައެވެ.
ޔޫއޭއެންއައިގެ ސިޓީގައިވާ ގޮތުން، މިދިޔަ މޭ މަހުގެ 13 ވަނަ ދުވަހު ތެހެރާންގައި ބޭއްވި ޓީމު ފުރުވުމުގެ ރަސްމިއްޔާތު ކުރިއަށްދިޔައީ އައިއާރްޖީސީއާ ގުޅުންހުރި އެއްވުމެއްގެ ތެރޭގައެވެ.
އެ ރަސްމިއްޔާތުގައި ވާހަކަދެއްކެވި ސީނިއާ ކޮމާންޑަރު ހުސެއިން ޔެކްތާ ވަނީ، އީރާނުގެ މިސައިލް ޑިފެންސް ސިސްޓަމްތަކާއި ބެލިސްޓިކް މިސައިލް ލޯންޗަރުތަކުގެ ކައިރީގައި ތިބި ސިފައިންގެ ހަނދާނުގައި ކުޅުމަށް ކުޅުންތެރިންނަށް ގޮވާލާފައެވެ. އަދި އީރާނުގެ ސިފައިން ހޮރްމޫޒް ކަނޑުއޮޅި ބަލަހައްޓާ ފަދައިން، މި ކުޅުންތެރިން ފުޓްބޯޅަ ގޯލް ބަލަހައްޓާނެ ކަމަށް އޭނާ ބުންޏެވެ.
މި އެއްވުމުގައި ހިޒްބުالله ގެ ދިދަތަކާއި އައިއާރްޖީސީގެ ކޮމާންޑަރުންގެ ފޮޓޯތައް ބޭނުންކޮށް، އެމެރިކާ ހަލާކުވެދިއުމަށް ގޮވާލާފައިވާތީ އެމެރިކާގެ ގައުމީ ސަލާމަތަށް މީގެ ސަބަބުން ނުރައްކާވެދާނެ ކަމަށް ވޮޗްޑޮގް ޖަމާއަތުން ބުނެއެވެ.
މި ބޮޑު ސިޔާސީ ހަމަނުޖެހުމުގެ ތެރޭގައިވެސް އީރާނު ޓީމު މިހާރު ވަނީ މެކްސިކޯއަށް ގޮސްފައެވެ. ނަމަވެސް، ލިބިފައިވާ ރިޕޯޓްތަކަށް ބަލާއިރު އީރާނު ޓީމަށް އެމެރިކާގެ ވިސާ ދޫކޮށްފައިވަނީ ވަރަށް ހަރުކަށި ޝަރުތުތަކަކާއެކުއެވެ.
އެގޮތުން މެޗު އޮންނަ ދުވަހުގެ ހެނދުނު އެމެރިކާއަށް އެތެރެވުމަށްފަހު، މެޗު ނިމޭ ދުވަހު އެ ގައުމުން ފުރައިގެން ދާންޖެހޭނެއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްވެސް މީގެ ކުރިން ވަނީ، މަސްރަހު އޮތްގޮތުން އީރާނު ޓީމުގެ ސަލާމަތަށް ނުރައްކާވެދާނެތީ އެ ޓީމުން މުބާރާތުގައި ވާދަކުރުމަކީ ރަނގަޅު ކަމެއް ނޫން ކަމަށް ވިދާޅުވެފައެވެ.
ވިސާ ބާތިލްކުރުމަށް ގޮވާލާ ފޮނުވި ސިޓީއާ ގުޅޭގޮތުން އެމެރިކާގެ ސްޓޭޓް ޑިޕާޓްމަންޓުން އަދި ރަސްމީކޮށް އެއްޗެއް ބުނެފައެއް ނުވެއެވެ.