އާޓިފިޝަލް އިންޓެލިޖެންސްގެ ޚިދުމަތްތައް ފޯރުކޮށްދޭ މަޝްހޫރު ކުންފުނި، އޯޕަންއޭއައިގެ ޗެޓްބޮޓްތަކަށް އަމާޒުކޮށްގެން ދޭ "ޕްރޮމްޕްޓް އިންޖެކްޝަން" ހަމަލާތަކުން ސަލާމަތްވުމަށް ސައިބާ ސެކިއުރިޓީ ވަރުގަދަކުރުމަށް ޓަކައި "ލޮކްޑައުން މޯޑް" ގެ ނަމުގައި އާ ފީޗާއެއް ތައާރަފުކޮށްފިއެވެ.
މި ފީޗާގެ މައިގަނޑު ބޭނުމަކީ ވެބްޕޭޖުތަކާއި އެހެނިހެން ވަސީލަތްތަކުގައި ފޮރުވައިގެން ޗެޓްބޮޓްތަކަށްދޭ ނުރައްކާތެރި އިރުޝާދުތަކުން ނުވަތަ ހަމަލާތަކުން ސިސްޓަމްތައް ސަލާމަތްކޮށް، ރައްކާތެރިކަން އިތުރުކުރުމެވެ.
މި އާ ލޮކްޑައުން މޯޑް އެކްޓިވް ކުރުމުން، އިންޓަނެޓް މެދުވެރިކޮށް ވަގުތުން ވަގުތަށް މައުލޫމާތު ހޯދުން (ލައިވް ވެބް ބްރައުޒިން) މެދުކަނޑާލެވޭނެއެވެ.
މީގެ އިތުރުން ވެބުން ފޮޓޯ ނެގުމާއި ދެއްކުމަށް ބޭނުންކުރާ "ޑީޕް ރިސާޗް" ޓޫލް، އަދި އޭޖެންޓް މޯޑް ފަދަ މުހިންމު ބައިތަކެއް މި މޯޑުގައި ބްލޮކްވެގެންދާނެއެވެ. ނަމަވެސް މި މޯޑް އޮންކޮށްފައި ހުއްޓަސް އަމިއްލައަށް ފޮޓޯ އުފެއްދުމުގެ (އިމޭޖް ޖެނެރޭޝަން) ޚިދުމަތް ބޭނުންކުރޭނެ ކަމަށް އެ ކުންފުނިން ހާމަކުރެއެވެ.
އޯޕަންއޭއައި އިން ހާމަކުރާ ގޮތުގައި މި މޯޑް އެކްޓިވްކޮށްފައި ހުރި ނަމަވެސް، ކުރިން ސޭވްކޮށްފައި ހުންނަ ވެބް މައުލޫމާތު ނުވަތަ ޔޫޒަރުން އަޕްލޯޑްކުރާ ފައިލްތަކުގެ ޒަރީއާއިން ޕްރޮމްޕްޓް އިންޖެކްޝަންގެ ނުރައްކާ މުޅިން ނައްތައެއް ނުލެވޭނެއެވެ. އެހެންނަމަވެސް، މި ފީޗާގެ ސަބަބުން ކުންފުނިތަކުގެ ނުވަތަ އަމިއްލަ ފަރުދުންގެ ސިއްރު އަދި ހައްސާސް މައުލޫމާތުތައް ބޭރުވުމުގެ ފުރުސަތު ވަރަށް ބޮޑަށް ކުޑކޮށްދޭނެއެވެ.
މި ފީޗާއަކީ އާންމު ހުރިހާ ބޭނުންތެރިންނަށް ޚާއްސަކޮށްގެން ނެރުނު ފީޗާއެއް ނޫން ކަމަށާއި، މިއީ ހަމައެކަނި ރައްކާތެރިކަން އެންމެ މަތީ ދަރަޖައަށް ބޭނުންވާ މުއައްސަސާތަކަށާއި ޖަމްއިއްޔާތަކަށް އަމާޒުކޮށްފައިވާ ފީޗާއެއް ކަމަށް އޯޕަންއޭއައި އިން ބުނެއެވެ.
މިހާރު މި ފީޗާ ރޯލްއައުޓް ކުރަން ފަށާފައިވަނީ ޗެޓްޖީޕީޓީ ބިޒްނަސް އެކައުންޓްތަކަށާއި، މިކަމަށް ޝަރުތުހަމަވާ ބައެއް އަމިއްލަ ޕާސަނަލް އެކައުންޓްތަކަށެވެ.
ޕްރޮމްޕްޓް އިންޖެކްޝަން ހަމަލާއަކީ އޭއައި ސިސްޓަމްތަކަށް ނުވަތަ ޗެޓްބޮޓްތަކަށް އޮޅުވާލައިގެން، އޭގެ އަސްލު ސެކިއުރިޓީ އުސޫލުތަކާ ޚިލާފަށް ކަންކަން ކުރުވުމަށް ދޭ ސައިބާ ހަމަލާއެކެވެ. މިއީ އާންމުކޮށް ވެބްޕޭޖުތަކުގެ ތެރޭގައި ނުވަތަ ފައިލްތަކުގައި ފޮރުވާފައި ހުންނަ ނުރައްކާތެރި ކޯޑުތަކެއް ނުވަތަ އިރުޝާދުތަކެއް، އޭއައި ސިސްޓަމުން ކިޔައިގަންނަ ވަގުތު އޭގެ ކޮންޓްރޯލް އަތުލުމަށް ބޭނުންކުރާ އުކުޅެކެވެ.
މީގެ ކުރިންވެސް ބައެއް ބޮޑެތި އޭއައި ޕްލެޓްފޯމްތަކަށް މިފަދަ ހަމަލާތައް އަމާޒުވެ، ޔޫޒަރުންގެ ސިއްރު މައުލޫމާތުތައް ހޯދުމާއި ސިސްޓަމްތަކުގެ ނިޒާމު ހަލާކުކޮށްލަން މަސައްކަތްކޮށްފައިވާތީ، މިއީ މިހާރު އޭއައި ސެކިއުރިޓީ ދާއިރާގައި ހުރި އެންމެ ބޮޑު އެއް ގޮންޖެހުމެވެ.