ޔޫކްރެއިންގެ ރައީސް ޒެލެންސްކީ، ރަޝިޔާގެ ރައީސް ވްލަޑިމިއާ ޕޫޓިންއާ ބައްދަލުކުރައްވައި މަޝްވަރާކުރެއްވުމަށް ހުށަހަޅުއްވައިފިއެވެ.
މިކަން ހުށަހަޅުއްވާފައިވަނީ ހަނގުރާމަ ނިމުމަކަށް ގެނައުމަށް ބާރުއެޅުއްވުމުގެ ގޮތުން ޕޫޓިންއަށް ފޮނުއްވި ސިޓީފުޅެއްގައެވެ.
ޒެލެންސްކީ ވިދާޅުވި ގޮތުގައި، އެމެރިކާގެ ސަމާލުކަން މިހާރު އީރާނުގެ މައްސަލައަށް ހުއްޓިފައިވާއިރު، އަލުން ޔޫރަޕްގެ ހަނގުރާމައަށް އެމެރިކާގެ ސަމާލުކަން އެނބުރެންދެން މަޑުކުރުމަކީ ގޯހެކެވެ. އަދި ސުލްހަ ގާއިމުކުރެވޭނީ ދެ ގައުމުގެ ދެމެދުގައި ސީދާ މަޝްވަރާކޮށްގެން ކަމަށް އޭނާ ފާހަގަކުރެއްވިއެވެ.
ޒެލެންސްކީގެ ސިޓީފުޅުގައި ރަޝިޔާގެ ރައީސަށް ފާޑުވިދާޅުވެފައިވާއިރު، ޕޫޓިން ވެރިކަމުގައި ހޭދަކުރެއްވި 26 އަހަރުގެ ސަބަބުން އުމުރުފުޅުގެ އަސަރު ފެންނަން ފަށާފައިވާ ކަމަށް ލިޔުއްވާފައިވެއެވެ. މީގެ އިތުރުން، މި މަޝްވަރާތައް ކުރިއަށްދާ ވަގުތު އެއްކޮށް ހަމަލާތައް މެދުކަނޑާލުމަށްވެސް ޒެލެންސްކީ ވަނީ ގޮވާލައްވާފައެވެ.
ނަމަވެސް، ޕޫޓިން ވަނީ މިކަމަށް ދެކޮޅުހައްދަވާފައެވެ.
ރަޝިޔާގެ ރިޔާސީ ގަނޑުވަރު ކްރެމްލިންއިން ވަނީ ޒެލެންސްކީގެ ސިޓީފުޅު ލިބިފައިވާކަން ކަށަވަރުކޮށްދީފައެވެ. އަދި ޒެލެންސްކީ މޮސްކޯއަށް ވަޑައިގެންފިނަމަ މަރުހަބާ ކިޔާނެ ކަމަށްވެސް ބުނެފައިވެއެވެ.
ސެންޓް ޕީޓާސްބާގްގައި ނޫސްވެރިންނާ ވާހަކަދައްކަވަމުން ޕޫޓިން ވިދާޅުވީ، ޔޫކްރެއިންއާއެކު އެއްބަސްވުމަކަށް އައުމަށް ތައްޔާރަށް ހުންނެވި ކަމަށެވެ. އެހެންނަމަވެސް، އެކަން ކުރެވޭނީ ދެ ފަރާތުންވެސް ދޫތަކެއް ދީގެން ކަމަށް ޕޫޓިން ވިދާޅުވިއެވެ. ޕޫޓިން ބޭނުންފުޅުވަނީ ރަޝިޔާއިން ހިފާފައިވާ ޔޫކްރެއިންގެ ހަތަރު ސަރަހައްދެއް ކަމަށްވާ ޑޮނެޓްސްކް، ލުހާންސްކް، ޚަރްސަން އަދި ޒަޕޮރީޜިއާ ދޫކޮށްލުމަށާއި، ނޭޓޯއާ ގުޅުމަށް ޔޫކްރެއިންއިން ކުރާ މަސައްކަތް ހުއްޓާލުމަށެވެ. ޔޫކްރެއިންއިން ވަނީ ބިންތައް ދޫކޮށްލަން ދެކޮޅުހަދާފައެވެ.
މި މައްސަލައާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ދެ ލީޑަރުން ބައްދަލުކުރެއްވުމަކީ ވަރަށް ރަނގަޅު ކަމެއް ކަމަށާއި، އެކަން ކުރަންޖެހޭ ކަމަށެވެ. ޒެލެންސްކީ ހުށަހަޅުއްވާފައިވަނީ ސްވިޓްޒާލޭންޑް ނުވަތަ ތުރުކީ ފަދަ ގައުމެއްގައި މި ބައްދަލުވުން ބޭއްވުމަށެވެ. މީގެ ކުރިން ޖެނީވާ، އަބޫދާބީ އަދި އިސްތަންބޫލްގައި ބޭއްވި ސުލްހައިގެ މަޝްވަރާތައް ވަނީ ނާކާމިޔާބުވެފައެވެ.
ޕޫޓިން ވަނީ ޒެލެންސްކީއަކީ ޔޫކްރެއިންގެ ގާނޫނީ ވެރިޔާތޯ ސުވާލު އުފައްދަވާފައެވެ. ސަބަބަކީ 2024 ވަނަ އަހަރުގެ މެއި މަހު ޒެލެންސްކީގެ ރިޔާސީ ދައުރު ހަމަވެފައިވުމެވެ. ނަމަވެސް ރަޝިޔާއިން ޔޫކްރެއިންއަށް އެރުމާ ގުޅިގެން އެ ގައުމުގައި އިއުލާނުކޮށްފައިވާ ކުއްލި ނުރައްކަލުގެ ހާލަތުގެ ދަށުން އިންތިޚާބުތައް ވަނީ ފަސްކޮށްފައެވެ.