އެޕަލް ކުންފުނިން ދެން އެންމެ އަވަހަށް ބާޒާރަށް ނެރުމަށް ތައްޔާރުވަމުންދާ ފްލެގްޝިޕް ފޯނު، "އައިފޯން 18 ޕްރޯ މެކްސް" ގެ ބޭރުގެ ފަރުމާއަށް ބޮޑު ބަދަލެއް ނާންނާނެ ކަމަށް ލީކުތަކުން ދައްކައިފިއެވެ.
ޗައިނާގެ ސޯޝަލް މީޑިއާ ޕްލެޓްފޯމް ވީބޯގައި ހިއްސާކޮށްފައިވާ ރިޕޯޓުތަކަށް ބަލާއިރު، މި ފޯނުގެ ބޯމިން ހުންނާނީ މިހާރު ބާޒާރުގައި ހުރި އައިފޯން 17 ޕްރޯ މެކްސް އާ ދާދި އެއްވަރަކަށެވެ. މިއީ މީގެ ކުރިން މި ފޯނުގެ ފަރުމާއަށް ބޮޑެތި ބަދަލުތަކެއް އަތުވެދާނެ ކަމަށް ދެކެވުނު ވާހަކަތަކާ ހިލާފު މައުލޫމާތެކެވެ.
ފޯނުގެ މައުލޫމާތު ކުރިއާލާ ހާމަކުރުމުގައި މަގުބޫލުކަން ހޯދާފައިވާ "އައިސް ޔުނިވާސް" އާ ހަވާލާދީ ފެތުރެމުންދާ ޚަބަރުތައް ބުނާގޮތުން، އައިފޯން 18 ޕްރޯ މެކްސްގެ ބޯމިނުގައި ހުންނާނީ 8.75 މިލިމީޓަރެވެ. މިއީ މިހާރު ބާޒާރުގައި ހުރި އައިފޯން 17 ޕްރޯ މެކްސް އާ ދާދި އެއްވަރުގެ ބޯމިނެކެވެ. މީގެ ކުރިން މި އަހަރުގެ މާރިޗު މަހު ބައެއް ފަރާތްތަކުން ލަފާކޮށްފައިވަނީ އާ ފޯނު ކުޑަކޮށް ބޯވެ، 8.8 މިލިމީޓަރަށް ބަދަލުވެދާނެ ކަމަށެވެ.
ބޯމިނަށް ބަދަލެއް ނައި ނަމަވެސް، އާ އައިފޯނުގެ ބަރުދަނަށް ބަދަލުތަކެއް އައުން އެކަށީގެންވާ ކަމަށް ރިޕޯޓުތައް ބުނެއެވެ. ބައެއް މަސްދަރުތަކުން ބުނާ ގޮތުގައި މި ފޯނުގެ ބަރުދަން 240 ގްރާމަށް ވުރެ މަތިވުން އެކަށީގެންވެއެވެ. މިއީ އައިފޯން 14 ޕްރޯ މެކްސް އަށް ފަހު އެޕަލްއިން ނެރޭ އެންމެ ބަރު ފޯނަށް ވުމުގެ ފުރުސަތު އެބައޮތެވެ. ބަރުދަން އިތުރުވަނީ ފޯނުގެ އެތެރޭގެ ހާޑްވެއާ ބައިތަކަށް ގެންނަ ބަދަލުތަކުގެ ސަބަބުންނެވެ.
މިގޮތުން އެންމެ ފާހަގަކޮށްލެވޭ އެއް ބަދަލަކީ ފޯނުގެ ބެޓެރީގެ ކެޕޭސިޓީ ބޮޑުވުމެވެ. އައިފޯން 18 ޕްރޯ މެކްސްގައި ހިމެނުމަށް ހަމަޖެހިފައިވަނީ 5،100 އާއި 5،200 އެމްއޭއެޗް އާ ދެމެދުގެ ބެޓެރީއެކެވެ. މިއީ ކުރީގެ މޮޑެލްގައި ހުންނަ 5،088 އެމްއޭއެޗްގެ ބެޓެރީއަށް ވުރެ ބޮޑު އަދަދެކެވެ.
ފޯނުގެ ބޯމިން ހިފަހައްޓަމުން ބެޓެރީ ބޮޑުކުރުމަށްޓަކައި އެޕަލްއިން އެތެރޭގެ އެހެން ބައިތަކުގެ ސައިޒު ކުޑަކުރާނެ ކަމަށް ބެލެވެއެވެ. މި ފޯނުގައިވެސް ބޭނުންކުރާނީ 6.9 އިންޗީގެ ސްކްރީނެކެވެ.
މީގެ އިތުރުން، އާ އައިފޯނު ސީރީޒްއާ އެކު އެޕަލްއިން ފުރަތަމަ ފަހަރަށް ފަތްޖަހާލެވޭ (ފޯލްޑަބަލް) އައިފޯނެއް ތައާރަފުކުރުމަށް ގިނަ މަސައްކަތްތަކެއް ކުރަމުންދާ ކަމަށްވެސް ލީކުތަކުން ހާމަވެއެވެ. މި ފޯލްޑަބަލް ފޯނަށް "އައިފޯން އަލްޓްރާ" ގެ ނަން ދެވިދާނެ ކަމަށް ބެލެވޭއިރު، އެޕަލްގެ މައިގަނޑު ސަމާލުކަން މި އަހަރު ހުރީ މި ފަރުމާއަށް ކަމަށްވެއެވެ.
އައިފޯން 18 ޕްރޯ މޮޑެލްތަކުން ފެންނާނެ އެހެނިހެން ބަދަލުތަކުގެ ތެރޭގައި، ކުޑަ ޑައިނެމިކް އައިލެންޑަކާއި، އާ ސީ2 މޮޑެމްގެ އިތުރުން، ކެމެރާގެ އެޕަޗާ ބަދަލުކޮށްލެވޭ ފެންވަރު ރަނގަޅު ޕްރައިމަރީ ކެމެރާއެއް ހިމެނެއެވެ.
މި ހުރިހާ އާ އުފެއްދުންތަކެއް އެޕަލްއިން ރަސްމީކޮށް ދައްކާލާނީ މިއަހަރުގެ ތިންވަނަ ކުއާޓަރުގެ ތެރޭގައި، އާންމުކޮށް ފޯނުތައް ނެރޭ ސެޕްޓެމްބަރު މަހުގެ ތެރޭގަ އެވެ.