ފެނަކަ ކޯޕަރޭޝަނުގެ ހިންގުން ހަރުދަނާކުރުމަށް ކުންފުންޏަށް ގެންނަ ބަދަލުތަކުގެ ތެރެއިން އެ ކުންފުނީގެ މުވައްޒަފުންނަށް ޕޭ ލީވް އާއި ނޯ ޕޭ ލީވް ދިނުން މަޑުޖައްސާލަން ނިންމައިފިއެވެ.
ފެނަކަ ކޯޕަރޭޝަނުގެ ބްރާންޗްތަކާއި ޑިޕާޓްމެންޓުތަކަށް މިއަދު ފޮނުވާފައިވާ ސާކިއުލާއެއްގައި ވަނީ ކުންފުނި ރައިޓްސައިޒްކުރުމުގެ މަސައްކަތްތައް މިހާރު ކުރަމުން އަންނަ ކަމަށެވެ. އެގޮތުގެ މަތިން ކުންފުނީގެ މުވައްޒަފުންނަށް މުސާރަ ލިބޭ ގޮތަށް ދޭ ޗުއްޓީ (ޕޭ ލީވް)އާއި މުސާރަ ނުލިބޭ ގޮތަށް ދޭ ޗުއްޓީ (ނޯޕޭ ލީވް) މިއަދުން ފެށިގެން ވަގުތީގޮތުން މެދުކަނޑާލައިފައިވާ ކަމަށް އެ ސާކިއުލާގައިވެއެވެ.
ފާހަގަކޮށްލެވޭ ގޮތުގައި މިދިޔަ އޭޕްރިލް މަހުގައި ފެނަކައިގެ މެނޭޖިން ޑިރެކްޓަރުގެ މަގާމަށް މުޙައްމަދު އަފީފް ހަވާލުވެވަޑައިގަތުމަށްފަހު އެ ކުންފުންޏަށް ބޮޑެތި ބަދަލުތަކެއް އަންނަނީ ގެންނަމުންނެވެ. އެގޮތުން ދާދި ފަހުން ވަނީ އެ ކުންފުނީގެ މުވައްޒަފުންނަށް ހަތަރު މަހުގެ މުސާރައާއެކު ވަކިވުމުގެ ފުރުސަތު ވެސް ހުޅުވާލާފައެވެ.
މިއަދު އެ ކުންފުނިން ނެރެފައިވާ އިންޓާނަލް މެމޯއެއްގައި ވަނީ ހުރިހާ ޑިޕާޓްމަންޓްތަކާއި ބްރާންޗްތަކުގައި މަސައްކަތްކުރާ މުވައްޒަފުންގެ ޕޮލިސް ރިޕޯޓް ހޯދުމަށްފަހު އަންނަ ހަފުތާ ބުރާސްފަތި ދުވަހުގެ ރަސްމީގަޑި ނިމުމުގެ ކުރިން ހެޑް އޮފީހަށް ފޮނުވަން ޖެހޭނެ ކަމަށް ބުނެފައެވެ.
އަފީފް ވަނީ ކުންފުނީގެ މާޒީގައި ކުންކުފުނީގެ މެނޭޖްމެންޓުން މަސައްކަތްކޮށްފައިވާ ގޮތުން, އޮޑިޓުތަކުންނާއި އެހެނިހެން އިދާރާތަކުން ބެލި ބެލުންތަކުން ވަރަށް ގިނަ ކަންތައްތަކެއް ރަނގަޅުކުރަން ހުރިކަން ފާހަގަވެފައިވާ ކަމަށް ވިދާޅުވެފައެވެ.
ފެނަކައިގެ މުވައްޒަފުންގެ އޮނިގަނޑު އިސްލާހުކޮށް އޮނިގަނޑަށް ގެންނަންޖެހޭ ބަދަލުތައް ގެނައުމަށް ވިސްނާ ކަމަށް އަފީފް މީގެ ކުރިން ވަނީ ވިދާޅުވެފައެވެ.
އޭނާ ވަނީ އެ ކުންފުނީގައި މިހާރު ވެސް 8000 އެއްހައި މުވައްޒަފުން މަސައްކަތް ކުރަމުންދާ ކަމަށް ވިދާޅުވެފަވެ. ގިނަ އަދަދެއްގެ މުވައްޒަފުން މަސައްކަތްކުރާއިރު އެންމެ އެކަށޭނެ ގޮތެއްގައި މަސައްކަތްކުރާ މުވައްޒަފުންނާއި އެކަށޭނެ ގޮތެއްގައި މަސައްކަތް ނުކުރެވޭނެ މުވައްޒަފުން ތިބޭނެކަމަށާއި އެ ކަންކަން ބަލައި އިސްލާހުކުރާނެ ކަމަށް އޭނާ ވަނީ ފާހަގަކުރައްވާފައެވެ.